Məlum olduğu kimi, Azərbaycan tərəfinin Laçın rayonunun Ermənistanla sərhəd ərazilərində öz dövlət sərhədini bərpa etməsi gərginliyə səbəb olub. Belə ki, yüksək dağlıq ərazilərdə qarın əriməsi və hava şəraitinin yumşalması ilə Azərbaycan sərhədçiləri ölkəmizə aid olan Qaragöl dövlət qoruğu ətrafında mövqe tutublar. Erməni tərəfi isə bunu “Ermənistan ərazisinə müdaxilə” kimi qiymətləndirərək hay-küy qaldırıb, təxribatçı bəyanatlar səsləndirir. Ancaq belə görünür ki, aparıcı böyük dövlətlərin Ermənistanın bu avantürasına dəstək verməməsi erməniləri məyus edib.
Bu baxımdan erməni mediası yazır ki, Ermənistan eyni gündə ABŞ və Rusiyadan zərbə aldı: “Ermənilər ABŞ və Rusiyadan Qaragöllə bağlı zərbə aldılar. ABŞ Dövlət Departamenti erməni saytının “niyə Departament əraziləri mübahisəli ərazilər adlandırıb” sualına cavab verib. Dövlət Departamenti qeyd edib ki, həmin ərazilərdə sərhədlərin müəyyənləşməsinə ehtiyac var və onlar dialoqu alqışlayırlar. İkincisi, Rusiya XİN rəhbəri Lavrov da Azərbaycanın tərəfini tutaraq həmin ərazilərdə delimitasiyanın və demarkasiyanın vacibliyini qeyd edib, Ermənistanı məsələni şişirtməkdə günahlandırıb”.
Görünən odur ki, Ermənistanın Qaragöl ətrafında yaratdığı şounun böyük dövlətlər tərəfindən dəstəklənməməsi onları çox məyus edib.
“İki böyük dövlətin sərhəd məsələsində ortaya qoyduğu mövqe Ermənistanı məyus edib”
Sözügedən məsələ ilə bağlı fikirlərini “Bakı-Xəbər”lə bölüşən AMİP-in sədr müavini Afsəddin Nəbiyev bununla bağlı bir sıra məqamlara toxundu: “Bir məsələni əvvəlcədən qeyd edim ki, 44 günlük qələbə savaşından sonra Azərbaycan bölgədə yeni təhlükəsizlik formatını yaratmağı bacardı. Bu, asan məsələ deyildi. Ancaq dövlətimiz bu formatı yaratmaqla bölgənin təhlükəsizliyinə, sülhün və sabitliyin təmin olunmasına zəmin yaratmış oldu. Ona görə də dünya dövlətlərinin əksəriyyəti Azərbaycanı etibarlı tərəfdaş kimi qəbul edir və dövlətimizə inanırlar. Azərbaycan bu gün nəinki bölgədə, həm də dünyada sülhün təmin olunması üçün bir çox beynəlxalq təşkilata rəhbərlik etməkdədir. O ki, qaldı Ermənistanın son hadisələrlə bağlı hay-həşirinə, bütün dünya bilir ki, seçkilərə bir ay qaldığı üçün ermənilər “nəlbəkidə fırtına” yaratmağı düşündülər. Bu da fiaskoya uğradı. İki böyük dövlətin sərhəd məsələsində ortaya qoyduğu mövqe Ermənistanı məyus edib. Azərbaycan dəfələrlə bəyan edib ki, heç bir dövlətin ərazisinə iddiamız yoxdur. Biz beynəlxalq hüquqla tanınmış ərazilərimizdə sərhədlərimizi bərpa edirik. Sərhədlərimizin demarkasiyası, delimitasiyası həyata keçirilərkən beynəlxalq hüququn bütün tələblərinə əməl olunacaq. Ona görə də artıq dünya dövlətləri Ermənistanı ciddi bir dövlət kimi qəbul etmirlər. Ermənilər bunu çox gözəl anlayır, sadəcə, diqqəti özlərinə cəlb etməklə var olma görüntüsü yaratmaq istəyirlər. Məhz buna görə ermənilərin boşboğazlığına onları oyuncaq kimi istifadə edən dövlətlərdən başqa, heç bir dövlət münasibət bildirmədi. Ermənilərin boşboğazlığına görə narahat olanlara da Azərbaycan dövləti yetərli cavabı verdi”.
Sədr müavini onu da qeyd etdi ki, Azərbaycan dövləti sərhədlərimizin bütövlüyünü çox yüksək səviyyədə təmin edəcək. Bizim buna həm insan resurslarımız, həm də iqtisadi gücümüz imkan verir.
Vidadi ORDAHALLI
