Prezidenti İlham Əliyev Zaur Mikayılovu Azərbaycan Meliorasiya və Su Təsərrüfatı Açıq Səhmdar Cəmiyyətinin sədri vəzifəsinə təyin olunması ilə əlaqədar videoformatda qəbul edərkən bir sıra məsələlərə toxundu.
Ölkə başçısı çıxışında meliorasiya sistemində mövcud olan bir sıra nöqsanları sadaladı. Belə ki, Prezident meliorasiya sahəsində çatışmazlıqların çox olduğunu vurğuladı. Bu çatışmazlıqlar suyun ədalətsiz bölünməsindən tutmuş, digər nöqsanlardan ibarətdir. Qeyd etdi ki, bizdə mövcud problemlərdən biri də itkilərin böyük həcmdə olmasıdır. Dövlət başçısı xüsusilə vurğuladı ki, bu itkilər bəzi hallarda təbii xarakter alır, amma digər hallarda səhlənkarlıq ucbatından baş verir. Bu o deməkdir ki, qurumun əvvəlki rəhbərliyinin öz işinə səhlənkar yanaşması da su itkilərində ciddi rol oynayıb. Məlum oldu ki, sovet vaxtında çəkilmiş torpaq kanallarının böyük hissəsi bu gün də fəaliyyətdədir. Hansı ki, məhz bu kanallarda böyük si itkisi baş verir. Bununla yanaşı, meliorasiya sahəsində indiyə qədər müasir metodlardan istifadə edilmədiyi aydın oldu. Həmçinin, bununla bağlı təşəbbüs göstərilmədiyi ortaya çıxdı.
Bir sözlə, Prezidentin meliorasiya sahəsində mövcud olan və sadaladığı nöqsanlarda uzun illər bu sahəyə rəhbərlik etmiş Əhməd Əhmədzadənin də məsuliyyəti var. Nəzərə almaq lazımdır ki, ölkə başçısı bu sahədə nöqsanların cüzi bir hissəsini sadaladı. Bütün bu deyilənlərin fonunda, Ə.Əhmədzadə Azərbaycanın meliorasiya tarixində necə məmur kimi qalacaq?
“Həmin vəsaitlərdən səmərəli istifadə olunsaydı, bu gün bir sıra aran rayonları su çatışmazlığı problemi ilə üzləşməzdi”
Məsələyə münasibət bildirən AMİP sədri Arzuxan Əlizadənin sözlərinə görə, Ə.Əhmədzadə uğursuz məmur olaraq öz adını meliorasiya tarixinə yazdı: “Məsələ ondadır ki, Ə.Əhmədzadə uzun illər bu sahəyə rəhbərlik edib. Neft gəlirlərinin ölkəyə daxil olduğu dövrlərdə meliorasiya sahəsinə böyük həcmdə vəsait ayrılıb. Ancaq buna baxmayaraq, ölkədə torpaqların şoranlaşması azalmayıb, əksinə, artıb. Sovet dönəmində çəkilən və ciddi su itkisinə yol verən torpaq kanallar yenilənməyib. Hansı ki, neft gəlirlərinin böyük olduğu dövrdə bu işləri görmək daha məqsədəuyğun idi. Təəssüflər olsun ki, o vaxt bu imkan əldən verildi və bu işdə başlıca günahkar Əhmədzadədir. Düzdür, ötən illər ərzində meliorasiya sahəsində bir sıra layihələr həyata keçirilib. Ancaq təəssüflər olsun ki, məmurlar bundan daha çox pul qoparmaq məqsədilə istifadə edirlər. Həmin vəsaitlərdən səmərəli istifadə olunsaydı, bu gün bir sıra aran rayonları su çatışmazlığı problemi ilə üzləşməzdi. Kənd təsərrüfatında məhsuldarlıq daha böyük olardı. Texniki səbəblər üzündən bu qədər böyük su itkisi olmazdı. Təsadüfi deyil ki, Prezident Zaur Mikayılovu qəbul edərkən meliorasiya sahəsində müasir tələblərə uyğun yanaşmanın olmasının vacibliyini qabartdı. Çünki əvvəlki dövrdə sözügedən metodlardan, faktiki olaraq, istifadə edilməyib”.
Yekun olaraq partiya sədri onu da vurğuladı ki, bu sahədə nöqsanlar aradan qaldırılmasa, kənd təsərrüfatı bundan zərər görəcək.
Vidadi ORDAHALLI
