Rusiya Federal Təhlükəsizlik Xidmətinin hərbi əks-kəşfiyyat Departamenti Ermənistana qanunsuz ötürülmüş və Qarabağda tətbiq edilmiş “İsgəndər-M” raketləri ilə bağlı təhqiqat başladıb.
Məlum olub ki, həmin raketlər Qırmızı bayraqlı Suvorov ordenli Cənub hərbi dairəsinin anbarlarından qanunsuz əldə edilib, Livan və Rusiya bankları üzərindən ödəniş həyata keçirilməklə qeyri-leqal olaraq Ermənistana ötürülüb. Bu, Rusiya hərbi və xüsusi xidmət dairələri tərəfindən olduqca sərt cavab tələb edən situasiyadır.
Ötən ilin payızında Azərbaycan Prezidenti İlham Əliyevin Ermənistana Rusiyadan qanunsuz silah təchizatı barədə bəyanatından sonra Rusiya Müdafiə Nazirliyinin bəzi məmurlarının bu işə cəlb olunması ilə bağlı xidməti araşdırma başladılıb. Araşdırma şok nəticələr üzə çıxarıb.
Hərbi dairənin raket-artilleriya silahları anbarından verilmiş şübhəli qaimələr, hərbi-nəqliyyat aviasiyasının Ermənistana doğru izahedilməz reysləri, nəhayət Rusiyada yaşayan erməni biznesmen Karen Karapetyanın “metallom” qiymətinə aldığı İl-76 təyyarəsi əks-kəşfiyyat əməkdaşlarında şok effekti yaradıb. Rusiya tərəfinin bu açıqlamasını nə dərəcədə səmimi saymaq olar?
Hərbi ekspert, ehtiyatda olan polkovnik-leytenant İbrahim Rüstəmli “Bakı-Xəbər”ə açıqlamasında bildirdi ki, “İsgəndər” raketləri müasir hərbin uğurlarından sayılır: “Dağıdıcılıq və bir sıra parametrlərinə görə özündə üstün cəhətləri ehtiva edir. Belə bir silah müxtəlif yollarla ciddi qrif altında qorunur. Həm toxunulmazlıq, həm də informasiya amillərini bura aid edə bilərik. Bu, balaca avtomat və ya qubaraatan deyil ki, onu qoyasan hansısa maşının yük yerinə, aparasan. “İsgəndər” raketləri brend sayılan silahdı. Təbiidir ki, Rusiya hökuməti öz brendini xüsusi mühafizə altında saxlayır. Onun dünya bazarında yaxşı qiymətə satılması üçün əlindən gələni edir. Onun gizli yollarla Ermənistana ötürülməsi mümkün deyil. Rusiya hökumətinin xəbəri olmadan onların Ermənistana aparılması qeyri-mümkündür. Bununla Rusiya özünü proseslərdən kənarda saxlamaq yolunu tutur. Özünə bəraət qazandırmaq üçün belə açıqlama verir. Düşünürəm ki, bu hadisələrin sonunu gözləmək lazımdır. Görək FTX-nin apardığı istintaqın sonunda kimlər həbs ediləcək. Bu olmayacaqsa, deməli, Rusiyanın blefi tam ifşa olunacaq”.
Məhəmmədəli QƏRİBLİ
