Bir neçə gün öncə Demokratik Qüvvələrin Milli Şurasının sədri Cəmil Həsənlinin qızının olduğu iddia edilən intim görüntülər yayılıb. Cəmil Həsənli ilk açıqlamasında qızına aid olduğu iddia edilən intim görüntülərin yayılması ilə bağlı hüquqi müstəvidə işlərin görüldüyünü bildirib. O, Facebook hesabında qızının görüntüsünün yayılmasını özünün siyasi fəaliyyəti ilə əlaqələndirərək, bunda ölkənin siyasi hakimiyyətini ittiham edib.
Cəmil Həsənli vurğulayıb ki, qızı yetkin insandır və öz şəxsi həyatını necə yaşamaq istəməsi onun şəxsi işidir. Ardınca Cəmil Həsənlinin qızı Günel Həsənli yayılmış videogörüntüdəki şəxsin özü olmadığını və belə bir şey yaşadığını xatırlamadığını bildirib. Cəmil Həsənli isə yayılmış ilk video ilə bağlı öz Facebook hesabında açıqlama verərək, 38 yaşlı qızının öz şəxsi həyatının ola biləcəyini bəyan edib:
"Mənim qızım Günel Həsənlinin 38 yaşı var və 10 ildən çoxdur ki, həyat yoldaşından ayrılıb. Onun öz şəxsi həyatı ola bilər və yenidən ailə də qura bilər. Bunu ona heç kim, o cümlədən mən də qadağan edə bilmərəm. Burada qeyri-adi bir şey yoxdur". O bildirib ki, əxlaqsızlıq başqasının intim həyatına burun soxmaqdır.
Martın 31-də isə Günel Həsənli baş verənlərlə bağlı ətraflı izahat verdi və görüntülərdə şəxsən özünün olmasını təsdiqlədi. Hətta videoda onunla birlikdə olan şəxsin adını da açıqladı. Günel Həsənli həmin açıqlamasına belə başlayır: "Mən, Həsənli Günel Cəmil qızı sosial şəbəkələrdə şəxsi həyatıma qanunsuz müdaxilə ilə bağlı yayılan məlumatların, xüsusilə həmin məlumatların ailəmin və atam Cəmil Həsənlinin şəxsiyyətinə ağır zərbə olduğunun dərin məyusluğunu və məsuliyyətini yaşayıram. Heç şübhəsiz ki, öz məsuliyyətsizliyim səbəbindən də yaşadıqlarım və doğmalarıma yaşatdıqlarımı özümə bağışlamıram…”
Cəmil Həsənlinin qızı bunların arxasında ustalıqla qurulmuş geniş bir əməliyyat olduğunu bildirir, özünü isə bu əməliyyatın hədəfi kimi təqdim edir. Mahir adlı şəxsin onunla evlənmək niyyətində olduğunu, hətta ona qızıl üzük də aldığını, etimadını qazandığını və sonda aldadıldığını bildirir. Günel Həsənli son görüşdə ona meyvə şirəsi verildiyini və sonra olanları xatırlamadığını bildirib. Bunun ardınca isə məhz həmin iki partnyor arasında olanları əks etdirən daha iki video yayıldı. Məlum iyrənc kadrlarda üzü gizlədilən kişi partnyoru Günel Həsənliyə pul verir. Cəmil Həsənlinin qızı həmin pul məsələsini belə izah edir: "Pul məsələsinə gəlincə, Mahir mənə yalnız bir dəfə 400 manat pul verib. 8 mart hədiyyəsi ala bilmədiyi üçün üzrxahlıq etdi, təkidlə bu pulu mənə verdi və özün nə istəyirsən al dedi. Tanış olduğumuz dörd ay ərzində bundan başqa ondan heç vaxt pul almamışam”.
Bunun ardınca videodakı kişinin kimliyi ilə bağlı sosial şəbəkələrdə maraqlı məlumatlar paylaşılıb. Bildirilir ki, videodakı Mahir Nizami oğlu Allahverdiyev ”Porchse” markalı avtomobillə 2 uşaq anasını vurub öldürən 14 yaşlı Ağaəli Fərəcovun atası ”Bentley” Fizulinin sürücüsü işləyib. F.Fərəcov koronovirusa yoluxub dünyasını dəyişəndən sonra Mahirin hansı işlə məşğul olması barədə məlumat yoxdur. Cəmil Həsənlinin qızının gizli video çəkilişində iştirak edən şəxsin kimliyi ilə bağlı yayılan digər məlumatda isə deyilir ki, Naxçıvan MR-in Ordubad rayonundan olan Mahir Cavadov uzun müddət “Avrora” şirkətində işləyib. Bütün bu faktlar bir daha onu deməyə əsas verir ki, bu video qalmaqalında siyasidən daha çox məişət motivləri görünür. Digər aspektdən yanaşdıqda isə görünür ki, hansısa qüvvə bu üsullarla ölkədəki gərginliyi artırmaq istəyir. Hətta ilk videonun məhz DTX-nın 102 illik bayramını qeyd etdiyi gündə yayılması da buna sübutdur. Bununla, sanki hansısa qüvvələr ölkənin onurğası sayılan bir qurumu hədəfə gətirməyə çalışır. Video qalmaqlaı üzərindən qurulan bu təxribatın qarşısını necə almaq olar?
Arzu Nağıyev: “Əgər DTX belə bir əməliyyat keçiribsə, onda niyə özü-özünə “sürpriz” edib, bunu öz peşə bayramında ortaya qoyurdu?”
Təhlükəsizlik qurumlarının sabiq əməkdaşı, millət vəkili Arzu Nağıyev “Bakı-Xəbər”ə açıqlamasında bildirdi ki, son vaxtlar KİV materiallarına nəzər saldıqda belə halların yalnız Azərbaycanda baş vermədiyinin şahidi oluruq: “ABŞ və Qərbin bir sıra dövlətlərində bu səpkili materiallar verilməkdədir. Sanki bunların hamısı bir mərkəzdən idarə olunur. Bəzi qüvvələr çalışır ki, bunu DTX-nın keçirdiyi əməliyyat kimi qələmə versin. Bu inandırıcı görünmür. DTX belə bir əməliyyat keçiribsə, onda niyə özü-özünə “sürpriz” edib, bunu öz peşə bayramında ortaya qoyurdu? Bir neçə video yayılıb. Görünür ki, bəzi insanların həyat tərzi orada göstərilən kimi olub. Hər bir insanın öz şəxsi həyatı var. Belə metodlardan istifadəni biz də kəskin qınayırıq. Azərbaycan Cinayət Məcəlləsinin belə materialların yayılmasına görə cəza nəzərdə tutan maddələri var. Bununla yanaşı, hər bir ictimai nüfuzlu şəxs və onun ailəsi də başa düşməlidir ki, onların ehtiyatsız davranışı cəmiyyətdə geniş müzakirə oluna bilər. Hər bir şəxs belə məsələlərdə həssas olmalıdır. Təbiidir ki, elə vəziyyətə düşmüş insan həmin videonu kiminsə boynuna atmağa çalışacaq. Bu inandırıcı görünmür. Bunda üçüncü qüvvələrin maraqlı olduğu üzə çıxır. İqtidar və müxalifət arasında gedən dialoq, görünür, kimlərisə narahat edir. Cəmiyyətimiz bu cür hallarla bağlı çox ehtiyatlı olmalıdır”.
Bədrəddin Quliyev: “Bu vəziyyətlə bağlı dövlətin əlaqədar qurumları çıxıb açıqlama verməlidir ki, xalqımız belə təxribatlara uymasın”
Müxalif mövqeli Cümhuriyyət Xalq Partiyasının (CXP) sədri Bədrəddin Quliyev isə “Bakı-Xəbər”ə açıqlamasında bildirdi ki, ölkənin indiki dönəmində belə bir hadisənin üzə çıxması təxribatdır: “Ölkədə müxalifətlə iqtidar arasında bir dialoq mühiti hakimdir. Mən dəfələrlə demişəm ki, Ermənistanda seçkilər keçirilənə qədər müəyyən qüvvələr ölkəmizin daxilində vəziyyəti gərginləşdirməyə çalışacaq. Cəmil Həsənlinin qızı ilə bağlı məsələ də bu planın tərkib hissəsi ola bilər. Kənar kəşfiyyat qüvvələri həm iqtidar, həm də müxalif qüvvələri üz-üzə qoymaqla öz maraqlarını təmin etməyə çalışırlar. DTX-nın 102 illik yubileyində belə bir videonun ortaya çıxması təxribatdan başqa nəsə deyil. Hesab edirəm ki, bu vəziyyətlə bağlı dövlətin əlaqədar qurumları çıxıb açıqlama verməlidir ki, xalqımız belə təxribatlara uymasın. Belə məsələlərin çox da qabardılmasının tərəfdarı deyiləm. Bunu edənlər hakimiyyətin daxilindədirlərsə, onların fəaliyyəti dərindən araşdırılmalıdır”.
Məhəmmədəli QƏRİBLİ
