“Təəssüflə qeyd edirəm ki, erməni kilsəsi qonşu xalqlara qarşı təcavüzü dəstəkləyir, erməni din xadimləri bir əlində xaç, bir əlində silah müharibəyə çağırışlar edirlər”. Bunu Qafqaz Müsəlmanları İdarəsinin sədri şeyxülislam Allahşükür Paşazadə KAİCİİD Beynəlxalq Dialoq Mərkəzinin sessiyasında iştirak çərçivəsində İstanbulda Rum Fənər Pravoslav Patriarxlığında Ekumenik Patriarx Varfolomeylə görüşdə deyib.
A.Paşazadə ümid etdiyini bildirib ki, erməni katolikosu II Qaregin dini liderə yaraşan, mənəvi öhdəliklərinə uyğun şəkildə müharibə deyil, sülhü və dialoqu təşviq edəcək, sülhpərvər və humanist ideyaları təbliğ edəcək, dini müstəvidə nifrət çağırışlarından çəkinəcək.
Patriarx Varfolomey bu mövqeni müdafiə etdiyini bildirib və Erməni Apostol Kilsəsinin məhz bu yöndə səy göstərməsinin vacib olduğunu vurğulayıb.
İndiyə qədər erməni katolikosunun və erməni kilsəsinin xristian dininin ana təməlinə uyğun hərəkət etmədiyi, dinin mənəvi öhdəliklərinə uyğun addım atmadığı məlumdur. II Qaregin, ümumiyyətlə, öz üzərinə düşən bütün mənəvi öhdəliklərin heç birinə əməl etməyib və bir əlində xaç, bir əlində silah təxribatlar törədib, revanşizmə rəvac verib.
“Allahşükür Paşazadə erməni katolikosunu nifrət çağırışlarından çəkinməyə çağırıb, gərək II Qaregin çağırışdan əməli nəticə çıxara”
Azərbaycan Milli Elmlər Akademiyasının (AMEA) Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev “Bakı-Xəbər”ə bildirdi ki, QMİ sədrinin bu açıqlaması ilə, birmənalı olaraq, erməni kilsəsinin və II Qareginin siması ifşa olunub. Xristian təəssübkeşliyinin arxasında gizlənən erməni kilsəsinin tutduğu yanlış, qeyri-humanizm, sülhə zidd mövqeyi ilə xristianlıq aləminin özünə ləkə vurduğunu deyən Q.Hacıyev hesab edir ki, erməni kilsəsi və onun rəhbərliyi H.A.Paşazadənin çağırışlarından nəticə çıxarmalı və nifrət toxumu əkməyi dayandırmalıdır. Erməniləri bir toplum olaraq erməni kilsəsinin idarə etdiyini və separatizmə, revanşizmə sürüklədiyini deyən Q.Hacıyevin sözlərinə görə, bütün xristian dünyası faşizmi açıq dəstəkləyən, irqçiliyin, şovinizmin başında dayanan erməni kilsəsinə “dayan, dur” deməlidir. “Bu yaxşı məlumdur ki, indiyə qədər erməni qriqoryan kilsəsinin qeyri-xristianlara qarşı tutduğu mövqe həddindən artıq kəskin, həddindən artıq siyasiləşmiş və erməni olmayanlara qarşı nifrət üzərində qurulub. Hətta bilirik ki, ermənilər üçün dövləti əvəz edən qriqoryan kilsəsi yarandığı gündən XX əsrin əvvəllərində Azərbaycan torpaqlarında Ermənistan dövləti yaradılana qədər ermənilər üçün dövləti əvəz edib.
QMİ sədrinin erməni katolikosuna, erməni kilsəsinə çağırışının mahiyyəti odur ki, uzun əsrlər başqa xalqlara, dinlərə qarşı nifrət, ayrıseçkilik kimi qeyri-humanist davranış, dini dözümsüzlük sərgiləməkdən əl çəkib, öz üzərilərinə düşən missiyanı daşımağın zamanıdır. Bir əlində xaç, bir əlində silah tutan erməni katolikosu, nəhayət, anlamalıdır ki, bir-birinə zidd olan iki məfhum erməni xalqını uçuruma yuvarlayır və bundan o xalqa heç bir xeyir gəlməyəcək. İndiyənə qədər onsuz da ermənilərin beynini uydurmalarla doldurublar, ölüm, qan, nifrətdən başqa onlara kilsə heç nə verməyib. Dini rəhbərlərin erməni katolikos kimi yol tutması nəinki bölgədə, eləcə də dünyada dinlər arasında sülhün bərqərar olmasına ziddir”.
Q.Hacıyevin sözlərinə görə, Azərbaycan torpaqlarının Ermənistanın işğalı altında olduğu dövrdə də katolikos sülhə doğru heç bir addım atmayıb. “Artıq müharibə başa çatıb və münaqişə öz həllini tapıb. İndən sonra katolikos və erməni kilsəsi ağıllarını başlarına yığıb erməniləri müharibəyə yox, sülhə, tərəqqiyə hazırlamalıdır ki, illər boyu nifrətdən, qandan başqa heç nə görməyən ermənilər onları bağışlasınlar. A.Paşazadə erməni katolikosunu nifrət çağırışlarından çəkinməyə çağırıb, gərək II Qaregin bu çağırışdan nəticə çıxara. Bu çox vacibdir” - deyə Q.Hacıyev vurğuladı.
İradə SARIYEVA
