Erməni KİV-nin verdiyi məlumata görə, həmin ölkədə yüksək post tutan dövlət qulluqçularının hansı sosial paketlərdən istifadə edə biləcəklərilə bağlı yeni qaydalar müəyyənləşib. Bu barədə bu ölkənin əmək və sosial məsələlər naziri Jora Sarkisyan çıxış edib.
Onun sözlərinə görə, güc qurumlarının nümayəndələri reabilitasiyanı hökümətin hesabına keçə bilərlər. Ən maraqlısı budur ki, nazir dövlət qulluqçuları və onların yaxın qohumlarının Ermənistan və “Arsax”dakı mehmanxana komplekslərindən istifadəsinə icazənin verildiyini bildirib. Qeyd olunur ki, bu güzəşt nazirlərə, onların müavinlərinə, baş prokuror və onun müavinlərinə, konstitusiya məhkəməsinin sədri və insan haqları üzrə müəvəkkilə şamil olunmayacaq. Nazir bildirib ki, bu qanun layihəsi atrıq hökümət tərəfindən təsdiq edilərək parlamentə göndərilib. Parlament qərar qəbul edəndən 45 gün sonra qanun qüvvəyyə minmiş olacaq. Bilidirilib ki, bu hüquqdan təqribən 147500 vətəndaş istifadə edə biləcək. Çox maraqlıdır ki, Ermənistan bu sayda vətəndaşına Azərbaycan ərazisi sayılan Qarabağda qanunsuz olaraq istirahət hüququnu tanıyıb. Erməni hökumətinin bu qərarını necə izah etmək olar?
“Xalq Cəbhəsi” qəzetinin baş redaktoru Elçin Mirzəbəyli “Bakı-Xəbər”ə açıqlamasında bildirdi ki, bu, 10 noyabr Bəyanatının mahiyyətinə zidd olan addımdır: “Mənim qənaətimə görə, bu, daha çox populist bir gedişdir. Seçki öncəsi Paşinyan hakimiyyətinin mövqelərinin gücləndirilməsinə xidmət edir. Son günlər biz analoji populist addımların atılmasının şahidi oluruq. Prinsipial olaraq bu, proseslərə hansısa formada təsir göstərə bilməz. Ermənistan Azərbaycanın ərazi subyektlərinin adını dəyişib, onları öz qanunvericilik aktlarında hallandırmaq kimi hüquqa malik deyil. Belə bir addım atılarsa, buna adekvat cavab veriləcək. Son dövrlərdə 10 noyabr və 11 yanvar Bəyanatlarında nəzərdə tutulan prinsiplərin həyata keçirilməsi istiqamətində hökümətlərarası komissiyanın işinin intensivləşməsinin gündəmə gəldiyi bir dönəmdə belə bir qərarın qəbulu provokasiyadan başqa nəsə deyil. Yəqin ki, üçüncü tərəflər vasitəsilə bununla bağlı Ermənistana lazımi xəbərdarlıqlar olunacaq”.
Baş redaktor hesab edir ki, Azərbaycan ərazisinə “Laçın dəhlizi” vasitəsilə keçid tənzimlənməlidir: “Bu istiqamətdə hüquqi addımların atılmasının zamanı çatıb. Ermənistan vətəndaşlarının bizim ərazimizə gediş-gəlişi pasport nəzarəti ilə tənzimlənməlidir. Bu baxımdan da həmin dəhlizdəki gömrük və sərhəd nəzarətini mütləq mənada biz həyata keçirməliyik”.
Məhəmmədəli QƏRİBLİ
