Rusiya və Ukrayna arasında baş verən son proseslər iki ölkənin hər an qanlı savaşa başlaya biləcəyini istisna etmir. Hazırda müşahidə edilən budur ki, Rusiya ordusu intensiv şəkildə Ukrayna ilə sərhədə qoşun qruplaşmaları cəmləşdirir.
Rusiya mənbələri bu fonda qatarlarla Ukrayna sərhədinə doğru zirehli və digər hərbi texnikanın daşınmasına dair görüntülər yayır. Bundan başqa, Rusiya ordusu Krım körpüsü üzərindən yarımadaya böyük sayda hərbi qüvvə yeridib. Ukrayna Silahlı Qüvvələrinin baş komandanı, general Ruslan Xomçak bəyan edib ki, ölkə sərhədləri boyu Rusiyanın 58 batalyon-taktiki qruplaюması cəmləşdirilib və döyüşə tam hazır vəziyyətdə gözləyir. Eyni zamanda general deyib ki, Ukrayna ordusu da 100 minlik qüvvə ilə Donbasa hücuma hazırdır: “Ukrayna Silahlı Qüvvələri bu gün müxtəlif variantlara hazırdır və əlbəttə, biz hücum etməyə hazırlaşırıq. Biz təlim bazaları yaradırıq, bizə bu işdə tərəfdaşlarımız kömək edir. Çünki başqa cür mümkün deyil. Əgər siz soruşsanız ki, bu gün biz hazırıqmı, bəli, hazırıq. Nəticələri, qüvvələri, ehtiyat qüvvələri, dövlətin imkanlarını hesablamaq lazımdır. Risqləri qiymətləndirmək lazımdır. Biz bu gün əlimizdə olanlarla vuruşsaq, əlbəttə ki, hədəfə çatmaq üçün çox böyük şanslarımız var”.
Ukrayna müdafiə naziri Andrey Taran bu fonda Birləşmiş Ştatların müdafiə naziri Lloyd Ostinlə Donbasdakı vəziyyəti və Rusiyanın Ukrayna sərhədlərinə qoşun cəmləşdirməsini müzakirə edib. Lloyd Ostin Andrey Tarana bildirib ki, Rusiya Ukrayna ilə münaqişəyə başlasa ABŞ müdaxilə edəcək. ABŞ müdafiə naziri qeyd edib ki, Rusiya aqressiyasının eskalasiyası halında Birləşmiş Ştatlar Ukraynanı tək qoymayacaq və Rusiya Federasiyasının Ukraynaya qarşı aqressiv cəhdlərinin həyata keçirilməsinə imkan verməyəcək. Bildirilir ki, bu, Lloyd Ostinlə Andrey Taran arasında son ay yarım ərzində ikinci telefon danışığıdır. Son telefon danışığı Amerika tərəfinin təşəbbüsü ilə baş tutub. Telefon danışığı barədə Pentaqon da məlumat yayıb, Lloyd Ostinin Ukraynaya dəstək vədi verdiyini təsdiqləyib. Pentaqonun rəsmi nümayəndəsi Con Kirbi jurnalistlərə bildirib ki, danışıqlar zamanı Ostin Rusiyanın Ukraynanın şərqində aqressiv və təxribatçı hərəkətlərinin eskalasiyasını pisləyir: “O təsdiq edib ki, ABŞ Rusiya təcavüzünə qarşı daha effektiv müdafiəni təmin etməsi üçün Ukrayna qüvvələrinin potensialının artırılmasına sadiqdir”. Pentaqon nümayəndəsi qeyd edib ki, 2015-ci ildən bu yana ABŞ Ukraynaya 2 milyard dollarlıq hərbi yardım ayırıb. Bu fonda Kiyev iddia edir ki, separatçılar ötən ilin iyulunda əldə olunmuş atəşkəs razılaşmasını dəfələrlə və sistematik şəkildə pozurlar. Kreml həm bunu, həm də Rusiya sərhədi boyunca qoşun cəmləşdirdiyinə dair Ukraynanın iddialarını rədd edib. Moskvanın sərhəd boyunca qoşun cəmləşdirməsinə dair Kiyevdən səslənən iddiaların ardınca Rusiyanın xarici işlər naziri Sergey Lavrov xəbərdarlıq edib ki, Ukraynanın şərqində hər hansı müharibə cəhdi bu ölkənin dağılması ilə nəticələnə bilər. Lavrov Rusiya prezidenti Vladimir Putinin aşağıdakı bəyanatını da yada salıb: “Donbasda yeni müharibə başlatmaq istəyənlər Ukraynanı xaraba qoyacaqlar”. Kremlin sözçüsü Dmitri Peskov isə deyib ki, Rusiya öz qoşunlarını öz ərazisində hərəkət etdirir və bunun heç kimə dəxli yoxdur. O bildirib ki, NATO qoşunlarının Rusiya sərhədləri boyunca intensiv fəaliyyəti Moskvanı ayıq-sayıq olmağa sövq edir.
Rusiyanın “Bloknot” regional informasiya portalının baş redaktoru Oleq Paxolkov bildirir ki, Rusiyada Ukrayna ilə müharibə variantı tamamilə ciddi şəkildə nəzərdən keçirilir. O, 44 günlük Qarabağ müharibəsini xatırladır, Ukrayna ordusunun da pilotsuz döyüş sistemləri ilə silahlandığını qeyd edir: “Biz Dağlıq Qarabağda nə baş verdiyini bilirik. Tamamilə yeni nəsil müharibə idi və bu müharibə göstərdi ki, nə qədər cəsur əsgər olursansa ol, istəyir dağlarda, istəyirsən düzənlikdə - pilotsuz aparat səni tapacaq və axırına çıxacaq. Ukrayna ordusu, əlbəttə ki, bu gün öz döyüş ruhunu qaldırıb və çox ciddi silahlanır. Pilotsuz aparatların sayı “tavana” çatır, onların sayı Qarabağda müharibə başlayarkən Azərbaycanda olanların sayından çoxdur. Bu, əl-qolu açır, Ukrayna ordusu hiss edir ki, DNR və LNR ordularını tapdalaya bilər. Onlar 30 il qabağın silahları ilə döyüşür, sayları da azdır”. Oleq Paxolkov daha sonra sual edir - Rusiya belə vəziyyətdə nə etsin? Əlavə edir ki, Rusiya sərhədə qoşun yığır və belə də etməlidir, çünki qarşıda çox qaynar münaqişə alovlana bilər: “Bəs DNR və LNR-ə qoşun yeridəcəkmi? Minsk razılaşmasına əsasən, Ukrayna DNR və LNR-ə hücum etsə Rusiya həmin ərazilərdəki rusdilli əhalini müdafiə etməlidir”. Paxolkovun qənaətinə görə, Rusiya rəsmən qoşun yeritməlidir, çünki separatçı “respublikalar” özləri duruş gətirə bilməyəcəklər. Və Rusiya 2008-ci ildə Gürcüstanda olduğu kimi “sülhə məcbur etmə” əməliyyatı keçirməlidir. Lakin Paxolkov təsdiq edir ki, Ukrayna Gürcüstan deyil və Rusiya qoşun yeritsə, bu əməliyyat çox mürəkkəb və qanlı olacaq: “Mən, əlbəttə, ordumuza inanıram və ona da inanıram ki, biz bu vəzifənin öhdəsindən gələcəyik, amma qorxuram ki, cəsədlərin sayı on minlərlə ölçülsün...”.
Bu durumda ATƏT-in Ukraynadakı mülki Xüsusi Monitorinq Missiyası son günlərdə atəşkəsin yüzlərlə dəfə pozulmasını qeydə alıb. Tərəflər ağır silahlardan və arrtilleriyadan istifadə edir. Analitiklər Donbasda irimiqyaslı hərbi əməliyyatların yaxın həftələrdə başlaya biləcəyini istisna etmir. Burada bir daha xatırladaq ki, Ukrayna ordusu Azərbaycan hərbçilərinin Qarabağdakı təcrübəsini öyrənib və Türkiyədən çoxsaylı “Bayraktar TB2” zərbə pilotsuz təyyarələri alıb.
Nahid SALAYEV
