Türk Şurasının adı dəyişdirilir. Belə ki, Qazaxıstanın birinci prezidenti-elbası, Türkdilli Dövlətlərin Əməkdaşlıq Şurasının (Türk Şurası) fəxri sədri Nursultan Nazarbayevin təşkilatın adının dəyişdirilməsinə dair təklifi dəstəklənib.
APA-nın xəbərinə görə, bu barədə Türk Şurasına üzv dövlətlərin liderlərinin qeyri-formal görüşünün yekunu ilə bağlı qəbul olunan bəyanatda bildirilib. Qeyd olunub ki, bununla bağlı xarici işlər nazirlərinə və Baş Katibliyə 2021-ci ildə Türkiyədə keçiriləcək VIII Zirvə görüşündə qəbul ediləcək müvafiq qərar layihəsinin hazırlanmasına dair təlimat verilib.
Xatırladaq ki, Türk Şurasının 2019-cu ildə Bakıda keçirilmiş VII Zirvə görüşündə N.Nazarbayev Türkdilli Dövlətlərin Əməkdaşlıq Şurasının adının Türk Dövlətləri Təşkilatı olaraq dəyişdirilməsi təklifi ilə çıxış edib.
Türkdilli Dövlətlərin Əməkdaşlıq Şurasının adının Türk Dövlətləri Təşkilatı olaraq dəyişdirilməsi nəyi dəyisəcək ki, buna bu qədər təşəbbüsləri var? Ad dəyişimi hər hansı bir inkişafa yol açacaqmı, bu, türk birliyinin daha da möhkəmlənməsinə nə kimi təkanlar verəcək?
“...təklif verildiyi zamandan öz təsirlərini göstərməyə başlayıb”
“Türk Dünyası İnfo” İctimai Birliyinin sədri, Atatürk Mərkəzinin baş redaktoru Dəyanət Osmanlı “Bakı-Xəbər”ə bildirdi ki, Türk dünyasının birliyi ideyası və bu istiqamətdə fəaliyyətlər, təşəbbüslər həmişə olub. “Qədimlərdən gələn və Atatürk siyasəti ilə güclənərək, sonradan istər Türkiyədə, istərsə də digər türk dövlətlərində ictimai xadimlərin, yazarların, alimlərin fəaliyyətlərində və həyata, gələcəyə baxışlarında türk birliyi məsələləri böyük ideoloji-milli alt yapı təşkil edib. Hətta sovet dönəmində də xalqlarımızın düşüncəsindəki milli ideyalar inkişafdan qalmayıb. Məhz belə milli insanlarımızın, siyasətçilərimizin, aydınlarımızın sayəsində müstəqillik zamanında türkçülük, türk dövlətçiliyi və türk milliyyətçiliyi ideyaları mükəmməlləşərək indiki səviyyəyə gəlib çıxdı. Əlbəttə, indi bu ideya artıq qaçılmaz gerçəkdir, eyni zamanda, daha real, faydalı statusa çatdırılması üçün çalışmalar davam edir. Ancaq türk birliyini istəməyən qüvvələrin təsirləri aşkar görünür, eyni zamanda, təsirləri dəf edə-edə birliyimiz möhkəmlənir. Elə müasir dünyanın tələblərindən biri də budur ki, əvvəllər müəyyən siyasi səbəblərə görə bir-birindən ayrı düşmüş xalqlar və dövlətlər yaxınlaşır, doğmalaşırlar. Bunun bir ifadəsi də Türk Şurasının yaradılmasıdır. Şuranın fəaliyyəti və orada təmsil olunan dövlətlərin əməkdaşlıq münasibətləri təşkilatın adında, fəaliyyətində müəyyən konkretləşmələrə ehtiyac olduğunu göstərdi.
Belə düşünürəm ki, Türk dünyasının ağsaqqal dövlət xadimi N.Nazarbayevin Türkdilli Dövlətlərin Əməkdaşlıq Şurasının adının dəyişdirilərək Türk Dövlətləri Təşkilatı adlandırılması təklifi çox doğru, yerində, zamanında verilmiş təklifdir. Təklif haqlı olaraq türk dövlətləri səviyyəsində cəmiyyətlərdə dəstəklənir. Həqiqətdə "türkdilli dövlət" ifadəsinin özü qüsurludur. Onda belə çıxır ki, türkdilli deyilən o dövlət, nə də xalq türk deyil, sadəcə, türk dilində danışanlardan ibarətdir. Ona görə də adın dəqiqləşməsinə ciddi zərurət var. Bunun sonrakı fəaliyyətə nə kimi təsir edəcəyi məsələsinə gəldikdə isə, deyim ki, təklif verildiyi zamandan öz təsirlərini göstərməyə başlayıb”.
D.Osmanlının sözlərinə görə, öz milli kimliyi barədə tərəddüd edən bəzi qardaş toplumlar, quruluşlar da dünyadakı yerləri, birlik olub güclənmələri, inkişaf etmələri barədə düşünməyə başlayıblar. “Bax, elə Türk Şurasının yaranması bunun nəticəsi idi. Türk Dövlətləri Təşkilatı bütün sahələrdə qlobal güc, milli nüfuz məsələsidir. Hamılıqla çalışmalıyıq ki, türk dövlətlərinin qardaşlıq duyğularına əsaslanan birlik ideyası get-gedə həmin o qlobal gücə və böyük nüfuza sahib olsun, bunun həyata keçməsinə xalqlarımızın da, dövlətlərimizin də yaxşı imkanları var” - deyə D.Osmanlı qeyd etdi.
İradə SARIYEVA
