Qarabağ münaqişəsinin həlli ilə bağlı yaradılmış ATƏT-in Minsk Qrupu 28 il ərzində fəaliyyət göstərsə də, nəticə sıfıra bərabər olub. Halbuki, Minsk Qrupuna həmsədrlik edən ölkələr dünyanın aparıcı ölkələridir, nüvə dövlətləridir, BMT Təhlükəsizlik Şurasının daimi üzvləridir. Əlbəttə ki, Ermənistana işğalla bağlı ciddi təzyiq göstərilsəydi və Azərbaycanın tələbi nəzərə alınıb sanksiyalar tətbiq edilsəydi, məsələ çoxdan sülh yolu ilə öz həllini tapa bilərdi.
Bu fikirləri Prezident İlham Əliyev Türkdilli Dövlətlərin Əməkdaşlıq Şurasının videokonfrans formatında keçirilən qeyri-formal Zirvə görüşündə çıxışında söyləyib: “Əfsuslar olsun ki, bu baş vermədi. Əksinə, məsələnin dondurulması istiqamətində addımlar atılmışdır. Ermənistan faktiki olaraq danışıqlardan imtina etmişdir. Əgər əvvəlki illərdə danışıqların imitasiyası ilə məşğul idisə, son iki-üç il ərzində faktiki olaraq açıq, nümayişkaranə şəkildə bildirirdi ki, bir qarış da Azərbaycan torpağı Azərbaycana qaytarılmayacaq”.
Prezident İlham Əliyev deyib ki, bundan əlavə, Ermənistan rəhbərinin məsuliyyətsiz və təxribat xarakterli addımları və bəyanatları faktiki olaraq danışıqları mənasız etmişdi: “Ermənistan rəhbəri iki il bundan əvvəl bildirmişdi ki, “Qarabağ Ermənistandır və nöqtə”. Təbii ki, bizim buna cavabımız oldu və ən ciddi cavab döyüş meydanında verildi”.
Prezidentin bəyanatından bu nəticəyə gəlirik ki, münaqişənin gec həll edilməsində başlıca günahkar super dövlətlərdir. Həmin ölkələr bu məsuliyyətin bədəlini necə ödəməlidir?
Qarabağ Azadlıq Təşkilatının sədri Akif Nağı “Bakı-Xəbər”ə açıqlamasında bildirdi ki, Minsk Qrupu və bir sıra ölkələrin qeyri-konstruktiv fəaliyyətilə bağlı Azərbaycan Prezidenti dəfələrlə öz mövqeyni ortaya qoyub: “İkinci Qarabağ müharibəsindən əvvəl də bəyan etmişdi ki, ona müəyyən təzyiqlər göstərilir. Hesab edirdilər ki, Azərbaycan mövcud olan reallıqlarla razılaşmalıdır. Bizim ölkənin rəhbərliyi hər zaman prosesdən narazı olub. Biz dövlət olaraq öz vəzifəmizi yerinə yetirib torpaqları işğaldan azad edəndən sonra bunlar yenidən əl-ayağa düşüblər ki, gündəmdə olsunlar. Biz açıq şəkildə bəyan edirik ki, onların edə bilmədiklərini biz öz gücümüzlə etdik. Münaqişəyə son qoymaqla ərazi bütövlüyümüzü tam təmin etmişik. Ermənilərin kompakt yaşadığı bir sıra ərazilərdən də erməni silahlıları çıxmalıdır ki, Azərbaycan öz hakimiyyətini bərqərar etsin. Minsk Qrupunun yenidən fəaliyyətinə ehtiyac yoxdur. Təəssüf ki, qeyri-konstruktivlik nümayiş etdirən bir sıra ölkələr yenidən ölmüş təsisatı diriltməyə çalışırlar. Prezident aydın şəkildə bəyan etdi ki, o niyyətləri həyata keçməyəcək. İki gün əvvəl Ermənistanın xarici işlər naziri bəyanat verdi ki, güya Minsk Qrupunun fəaliyyətindən onlar da narazıdır. Çünki müharibənin qarşısını ala bilməyiblər. İstəkləri budur ki, güclü həmsədrlər olsun və onların istəklərini həyata keçirsinlər. Azərbaycan Prezidentinin bu sərt mövqeyi tam olaraq xalqın iradəsini əks etdirir. Yaxşı olardı ki, indiyə qədər qeyri-konstruktivlik göstərən təşkilat və dövlətlər bundan sonra sülhün dayanıqlaı olması istiqamətində fəaliyyət göstərməklə öz keçmiş günahlarını yumuş olsunlar. Anlasınlar ki, əvvəlki kontekstdə fəaliyyətin heç bir bəhrəsi olmayacaq”.
Məhəmmədəli QƏRİBLİ
