Ermənistan prezidenti Armen Sarkisyan bəyan edib ki, ölkəsi çoxvektorlu böhran içərisindədir və ölkədən köç böhranlı miqyas ala bilər.
Ermənistan prezidenti sözügedən məsələlərlə bağlı bir sıra məqamları qabardıb: “Dövlət aparatı şok vəziyyətindədir, müharibə sonrası durum ağırdır, pandemiya ilə mübarizə müsbət nəticə vermir”.
O, Dağlıq Qarabağ mövzusu üzərində ayrıca dayanıb: “Biz Dağlıq Qarabağın əksər ərazisini və minlərlə gəncimizi itirmişik. Ermənistanda Dağlıq Qarabağdan olan qaçqınların çoxsaylı sosial problemi var və bu da ciddi böhran yaradıb”.
A.Sarkisyan Ermənistanda mənəvi-psixoloji böhran yaşandığını bu sözlərlə izah edib: “Minlərlə Ermənistan vətəndaşı Rusiya və Amerikaya köçmək barədə düşünür, bilet almağa çalışırlar. Ermənistandan köç böhranlı miqyas ala bilər”.
Bütün bunlar onu göstərir ki, Ermənistan tərəfi böyük böhran içində olduqlarını rəsmən təsdiq edir. Böhrandan çıxmağın yeganə yolu isə konstruktiv mövqe tutmaq, təcavüzkarlıq niyyətlərindən əl çəkməkdən keçir. Ermənistan nə qədər bunu tez başa düşsə, bu bir o qədər onların xeyrinə olacaq.
“Bu o deməkdir ki, Ermənistan mötədil mövqe sərgiləməsə, ölkədə adam qalmayacaq”
Sözügedən məsələ ilə bağlı fikirlərini “Bakı-Xəbər”lə bölüşən AMİP sədrinin müavini Afsəddin Nəbiyevin sözlərinə görə, Ermənistan prezidentinin məlum etirafı bir sıra məqamlardan xəbər verir: “Ermənistan prezidenti A.Sarkisyan, nəhayət, ölkəsinin düşdüyü vəziyyəti etiraf etmək məcburiyyətində qalıb. Ermənistanda illərdir hakimiyyətdə olan Ter-Petrosyan, Köçəryan, Serj Sarkisyan işğalçı mahiyyəti ört-basdır etməklə, bu xalqı geriyə dönüşü olmayan dərin bir uçuruma yuvarladılar. Həm keçmiş, həm də indiki hakimiyyətdə olan siyasi isteblişment reallığı dərk etmək gücündə olmadığı üçün, Ermənistanın bir dövlət kimi mövcudluğu sual altına düşdü. Əhali ölkəni çox sürətlə tərk etməkdə davam edir. Bir tərəfdən pandemiya, digər tərəfdən isə 44 günlük savaş Ermənistan cəmiyyətini çox ağır bir duruma gətirib və bu proses davam edəcək. Üstəlik, Ermənistanda iqtisadiyyatın tamamilə çökməsi erməni cəmiyyətinin böyük fəlakət qarşısında olacağını mümkün edir. Belə bir vəziyyətdə onların hələ də revanşist çağırışlarla çıxış etməsi bizim üçün çox təəccüblüdür. Rusiyadan imdad diləyərək həyatda qalmaq mücadiləsi aparan belə bir cəmiyyət özünü məhvə aparır. Ermənistan Rusiyanın hesabına birtəhər öz mövcudluğunu saxlaya bilir. Rusiya bir ay əlini Ermənistandan çəksə, bu ölkənin hansı duruma düşməsini təsəvvür etmək çətin deyil. Ona görə də ağıllarını başlarına yığıb Azərbaycanla ya normal qonşuluq münasibətləri qurmalıdılar, ya da birdəfəlik sonlarını yaxınlaşdıracaqlar. A.Sarkisyan bu etirafı etməklə, dolayı da olsa, cəmiyyətə mesaj verir. Bu o deməkdir ki, Ermənistan mötədil mövqe sərgiləməsə, ölkədə adam qalmayacaq”.
Sədr müavini hesab edir ki, Ermənistan reallığı dərk etməlidir.
Vidadi ORDAHALLI
