Ermənilər İkinci Qarabağ müharibəsindən əvvəl regionda fəaliyyət göstərmiş Böyük Britaniyanın xeyriyyə, ABŞ-ın qeyri-kommersiya şirkəti olan “Halo Trust” minatəmizləmə təşkilatını casusluqda ittiham edirlər.
“Trend”in erməni KİV-nə istinadən məlumatına görə, təşkilat barəsində casusluq ittihamı ilə cinayət işi başlanıb. Sözügedən təşkilat müharibə dövründə Qarabağdakı minalanmış ərazilərin xəritəsini Türkiyənin xüsusi xidmət orqanlarına təhvil verməkdə ittiham olunur.
İddiaya əsasən, bu məlumatlar sayəsində Azərbaycan Ordusu 44 günlük müharibə ərzində minalanmış əraziləri maneəsiz qət edə bilib.
Cinayət işi ilə bağlı ilkin araşdırmalar aparılır.
Bütün beynəlxalq qanunları pozaraq Azərbaycanın minalanmış ərazilərinin xəritəsini verməyən Ermənistanın Böyük Britaniya və ABŞ təşkilatlarını ittiham etməsinin heç bir əsası olmadığını deyən ekspertlər hesab edirlər ki, Ermənistan bununla özünü ifşa edir və beynəlxalq məhkəmədə ittiham edilməsi üçün zəmin yaradır.
“Təpədən dırnağa cinayət içində olan və minalanmış ərazilərimizin xəritəsini verməməklə böyük müharibə cinayəti törətdiyini gizlətməyən Ermənistanın xarici şirkətləri ittiham etməsi doğrudan da gülüncdür”
“Novoye vremya” qəzetinin baş redaktoru, tanınmış politoloq Şakir Ağayevin yanaşmasına görə, Böyük Britaniya və ABŞ şirkətinin Ermənistan tərəfindən ittiham edilməsi məsələsi birbaşa erməni xarakteri ilə bağlıdır. “Hər zaman birbaşa cinayətlərin içində olub terrorizmlə, separatizmlə məşğul olan, faşist ideologiyası yayan və sırf şovinizm mövqeyindən çıxış edən Ermənistan öz adını başqalarına qoyaraq, onları ittiham etməkdən əl çəkmir. Bütün tarix boyu onlar bu çirkin ittihamlardan istifadə ediblər. Azərbaycan torpaqlarını işğalda saxladıqları illərdə də əsassız ittihamlarından qalmayıblar. Uzağa getməyək, Cəbrayılda tövlə formasında tikdikləri və sonradan “kilsə” adı verdikləri kazarma. Azərbaycan torpaqlarında kazarma tikib, sonra üstünə bir xaç, kilsə zəngi qoyublar, “Azərbaycan tarixi abidələri dağıdır” deyirlər. Yəni bundan artıq saxtakarlıq, cinayət ola bilməz ki.
Ermənilərin Böyük Britaniya və ABŞ şirkətlərini Azərbaycanın xeyrinə casusluqda ittiham etməsi Ermənistan hakimiyyətinin düçar olduğu məğlubiyyətin günahını başqalarında axtarması ilə bağlıdır. Ermənistan hökuməti müharibədə uduzmağının səbəbləri məsələsində bəhanələr axtarmağa başlayıb. Bilirsiniz ki, Ermənistanda növbədənkənar seçkilər elan edilib, Paşinyan seçkilərdə yenidən qalib gəlmək üçün istəyir ki, Ermənistanın məğlubiyyətinin səbəbini beynəlxalq təşkilatların, müəyyən dövlətlərin üzərinə yıxsın. Bu da sırf ermənilərə xas xüsusiyyətdir. Ermənistanın casusluqda ittiham etdiyi təşkilatlar doğrudan da o xəritəni bizə vermişdilərsə, bəs indi niyə vermirlər? Minalardan əziyyət çəkirik və geniş ərazilərimiz minanın içindədir. Azərbaycan tərəfi dəfələrlə Ermənistanın minalanmış ərazilərin xəritəsini verməsi üçün beynəlxalq təşkilatlara müraciət edib, bir neçə ölkənin parlamentində bu məsələ qaldırılıb və Ermənistana təpkilər göstərilib. Ümumiyyətlə, işğal edilmiş torpaqların hər qarışını bu şəkildə minalamaq böyük cinayətdir. İkincisi, o xəritələri verməkdən imtina etmək qatı müharibə cinayətidir və ermənilər bu ağır cinayətləri ört-basdır etmək, bu cinayətlərdən yayınmaq üçün başqa ölkələrin şirkətlərini casusluqda ittiham etməyə, mənasız iddialara əl atırlar. Özü təpədən dırnağa cinayət içində olan və minalanmış ərazilərimizin xəritəsini verməməklə böyük müharibə cinayəti törətdiyini gizlətməyən Ermənistanın xarici şirkətləri ittiham etməsi doğrudan da gülüncdür”.
Ş.Ağayev hesab edir ki, bu, perspektivi olmayan bir iddia və ittihamdır. O vurğuladı ki, bu, ermənilərin, erməni dövlətinin, dünya erməniliyinin, işğalçı erməni ordusunun biabırçı məğlubiyyətinin ört-basdır edilməsidir. “O şirkətlər Azərbaycana minalanmış ərazilərin xəritəsini müharibə dövründə vermişdilərsə, yenə də versinlər ki, biz ərazilərimizi minalardan təmizləyək. Ermənistanın bu ittihamı əsassızdır. Azərbaycan dövləti, siyasi partiyaları, ictimai-siyasi fəalları, KİV rəhbərləri, media qurumları, QHT-ləri bütün dünyaya müraciət edirlər ki, Ermənistan o xəritələri versin, amma vermirlər” - deyə Ş.Ağayev qeyd etdi.
İradə SARIYEVA
