Məlumdur ki, bu ilin yanvarında Almaniyanın hakim Xristian Demokrat İttifaqı Partiyasının yeni sədri seçilib. Armin Laşet yanvardan partiyaya sədrlik edir. Qeyd edək ki, bu ilin sentyabrında keçiriləcək seçkilərdə Xristian Demokrat İttifaqı Partiyası qalib gələrsə, Armin Laşet Almaniya kansleri olacaq.
Almaniyanın hazırkı kansleri Angela Merkel Xristian Demokrat İttifaqı Partiyasının sədri postunu 2018-ci ildə tərk edib. Bununla belə, kansler vəzifəsində qalıb. Angela Merkel partiyanın hələ 2018-ci ilin oktyabrında keçirilən qurultayında sədrlikdən getdiyini bildirərək, 2021-ci ilin sentyabrında baş tutacaq seçkilərdə beşinci dəfə kansler vəzifəsi üçün mübarizə aparmayacağını açıqlayıb. Bu fonda Almaniyanın digər siyasi qüvvələri sentyabrda keçiriləcək seçkilər yaxınlaşdıqca daha çox fəallıq göstərir. Axı, onları seçkilərdə dəfələrlə məğlub etmiş Angela Merkel həm siyasətdən, həm də vəzifədən gedir. Bu vəziyyətdə özlərinə reytinq toplamaq üçün digər siyasi qüvvələr müxtəlif cəhdlər edir. Bura bəzi ölkələrə qarşı qarayaxma kampaniyası aparmaq, müəyyən lobbi qüvvələrinin dəstəyini almaq cəhdləri də daxildir. Elə Azərbaycana qarşı bəzi alman KİV-lərində başlanan qarayaxma kampaniyası da bu rakursdan izah edilir. Rusiyalı politoloq, Siyasi və İqtisadi Kommunikasiyalar Agentliyinin analitiki Mixail Neyjmakov da bildirir ki, Almaniyada bu il keçiriləcək seçkilərlə bağlı müəyyən qüvvələr rəqiblərinə qarşı “Azərbaycan kartı”ndan istifadə etməyə meyllidir: “Almaniya mediasında Azərbaycanla bağlı mənfi materiallar bu il Almaniyada keçiriləcək parlament seçkilərilə bağlı ola bilər. Məlum olduğu kimi, Angela Merkel də vəzifəsindən getmək niyyətindədir. Seçki ərəfəsində bir sıra oyunçuların rəqiblərinə qarşı “Azərbaycan mövzusu”ndan istifadə etmək meyli üzə çıxacaq. Belə oyunçular təşkil etdikləri informasiya hücumlarının daha çox səmərə verməsi üçün Azərbaycanı məhz mənfi şəkildə qələmə verməyə çalışırlar”. Ekspertin fikrincə, bəzi avropalı siyasətçilərin Azərbaycana münasibəti onların Türkiyəyə, yaxud Avropadakı türk icmalarına dair mövqeyinə görə müəyyənləşə bilər.
Bununla bağlı gələcəkdə münasibətlərin yoluna qoyula biləcəyini də dilə gətirən rusiyalı politoloq “report”a açıqlamasında bildirib ki, Almaniya XİN-i səviyyəsində Türkiyəyə qarşı səsləndirilən tənqidlərə baxmayaraq, Berlin Ankaraya münasibətində “qapını çırpmağ”a da həvəsli görünmür: "Angela Merkel də Türkiyənin strateji əhəmiyyəti barədə danışıb. Yəqin ki, iki ölkə arasında müəyyən isinmə baş verdikdən sonra Almaniya-Azərbaycan münasibətlərində də yeni perspektivlər ortaya çıxacaq”.
Hazırda Almaniyada sosialistlər və yaşılların timsalında solçular Xristian Demokrat İttifaqının 16 illik fasiləsiz hökmranlığından sonra hakimiyyətə can atır. Almaniyadakı jurnalistlər daha çox bu siyasi qüvvələrə rəğbət bəsləyir və bu gün deyirlər ki, Azərbaycan yalnız daxili siyasi mübarizədə bir vasitədir, lakin kampaniyanın məqsədi deyil. Burada lobbi amili də diqqətdən yayınmır. Xüsusən də erməni lobbisi Almaniyada müəyyən qüvvələri Azərbaycana qarşı qoymağa çalışır. Məsələn, sirr deyil ki, Ermənistanın Almaniya Bundestaqında ən fəal lobbiçilərindən biri Türingiyadan olan deputat Manfred Qrunddur. Bu şəxs daim Azərbaycana qarşı mövqe sərgiləyir. Almaniya-Ermənistan Forumunun təsisçiləri arasında isə adları erməni mafiyası məsələsində hallanan şəxslər də var.
Bunlar fonunda siyasi şərhçi Zaur Məmmədov da bir sıra maraqlı detallara toxunur. Politoloq uzun müddətdir Almaniyanın müəyyən məsələlərlə bağlı Azərbaycana qarşı ayrıseçkiliyə yol verdiyini vurğulayaraq bildirir: “Söhbət birbaşa olaraq Almaniyada müxtəlif siyasətçilərə və kütləvi informasiya vasitələrinə (KİV) təsir mexanizmləri olan 3-cü ölkələrdən gedir. Məsələ çox ciddidir və düşünürəm ki, Almaniya KİV-lərinin və ayrı-ayrı siyasi partiyalarının bölgə ilə bağlı siyasətində biz ilk növbədə həmin təşkilatların fəaliyyətini araşdırmalıyıq. Əgər bu KİV-lərin və partiyaların fəaliyyətini araşdırsaq, o zaman onların kimlərinsə sifarişlərini yerinə yetirdiklərini müşahidə edəcəyik. Son zamanlar Azərbaycanın artan nüfuzu və Qarabağla bağlı Cənubi Qafqazda yeni geosiyasi konfiqurasiyanın formalaşması, Azərbaycan və Türkmənistan arasında qaz yatağı ilə bağlı imzalanan saziş, ölkəmizin Avropanın enerji təhlükəsizliyində oynadığı mühüm rol hər kəsə məlumdur. Qarşıda Avropa İttifaqı və Azərbaycan arasında güclənən münasibətlərin şahidi ola bilərik. Lakin təəssüflər olsun ki, bəzi qruplar bu münasinbətlərə xələl gətirmək üçün əllərindən gələni əsirgəmir”. Politoloq əlavə edib ki, özünü müstəqil və ədalət carçısı kimi qələmə verən, humanizm prinsiplərindən dəm vuran jurnalistlər ilk növbədə Ağdama, Füzuliyə və digər ərazilərimizə gələrək, ermənilərin törətdiyi vəhşilikləri gözləri ilə görməlidirlər: “Onlar gəlib ermənilərin qəbir daşlarını necə dağıtdıqlarını və sümükləri necə çıxardıqlarını müşahidə etsinlər. Yaxud postmüharibə dövrü olmasına rəğmən Ermənistanı mina xəritələrini Azərbaycana vermədiyi üçün tənqid atəşinə tutsunlar. Lakin biz sifariş alan jurnalistlərin, ayrı-ayrı parlamentarilərin və partiya mənsublarının bu davranışlarını görməyəcəyik”. Zaur Məmmədovun sözlərinə görə, Almaniya və Fransada, o cümlədən İtaliyada olan bəzi qruplar İkinci Dünya müharibəsindən sonra uzun müddətdir ki, ABŞ və Rusiyanın müxtəlif şirkətlərinin marağı altındadırlar: “Bu şirkətlərin, adlarını sadaladığımız ölkələrdəki müəyyən qruplara böyük təsir imkanları mövcuddur. Bu məsələlərin dərin kökləri var. Ona görə də, səthi yanaşmaq və yalnız bir istiqamətində fikir yürütmək düzgün deyil”.
Burada qeyd edək ki, Azərbaycanla Almaniya arasında illik iqtisadi dövriyyə keçən il 800 milyon dollara yaxın olub. Bu göstərici hələ pandemiyanın ən sərt zamanlarında qeydə alınıb. Bu gün illik dövriyyəsi milyard dollar olan 100-dən artıq alman şirkəti Azərbaycanda fəaliyyət göstərir. Yəni həm iqtisadi, həm də siyasi baxımdan iki dövlət arasında sıx münasibətlər var. Azərbaycan regionun siyasi, iqtisadi, hərbi cəhətdən güclü ölkəsidir və Avropanın enerji təminatında mühüm rol oynayır. Bu səbəbdən Almaniya Azərbaycanla münasibətləri daim inkişaf etdirməli, hansısa cılız maraqlara görə bu münasibətlərə zərbə vurmamalıdır.
Samirə SƏFƏROVA
