Faiq Ələkbərli: “Onlar bu məscidin bir türk-islam təşkilatı tərəfindən tikiləcəyini zənn edirlər və bu cür aqressiv davranırlar”
Fransanın Starsburq şəhərinin erməni əsilli meri Janna Barseqyanın qərarı ilə 2,5 milyon avronun məscid tikintisi üçün Milli Görüş təşkilatına ayrılması ciddi qalmaqala səbəb olub.
Fransanın imamı Dranasi Xassen Çalqumi Milli Görüş hərəkatının buraxılmasını tələb edib. Onun fikrincə, bu, müsəlmanlığı deyil, siyasi islamı yayan bir təşkilatdır. Çalqumi, həmçinin, iddia edib ki, bu proseslərin arxasında Türkiyə durur və bu assosiasiya Fransada 70 müsəlman cəmiyyətini öz ətrafında birləşdirir, Türkiyə Prezidenti Rəcəb Tayib Ərdoğana yaxınlığı ilə seçilir, onun ideoloji təbliğatını aparır. Bu tələblərlə çıxış edən Çalqumi deyib ki, bu cür çıxışlara görə onun ünvanına ciddi təhdidlər gəlir və iddia edir ki, Strasburq dünyəvi şəhərdir, burada belə təşkilatların, dini icmaların, qurumların olması yolverilməzdir.
Qeyd edək ki, erməni mediasının yazdığına görə, bundan əvvəl Fransanın xarici işlər naziri də Strasburq meriyası tərəfindən bu məqsədlə vəsaitin ayrılmasına qarşı çıxıb.
Fransanın Daxili İşlər Nazirliyi isə öz açıqlamasında bildirib ki, Strasburqun meri Barseqyanın dediyi fikirlər düzgün deyil, biz bu məscid tikintisinə pul ayrılması barədə məlumatlandırılmamışıq.
- “...bununla antitürk mövqeyində dayandıqlarını göstərirlər”
Azərbaycan Milli Elmlər Akademiyasının Fəlsəfə və Sosiologiya İnstitutunun aparacı elmi işçisi, tarix üzrə fəlsəfə doktoru, siyasi icmalçı Faiq Ələkbərli “Bakı-Xəbər”ə bildirdi ki, ümumiyyətlə, Fransanın özünün bu kimi məsələlərin siyasiləşdirilməsində marağı var. F.Ələkbərli hesab edir ki, həm Fransanın xarici işlər nazirinin, həm də imam Çalquminin məscid tikintisinə qarşı çıxış etmələrinin kökündə onların müsəlman türklərə bəslədikləri xoşagəlməz münasibət dayanır. “Strasbruqda məscid tikintisinin bu ölkənin antimüsəlman qüvvələri tərəfindən narazılıqla qarşılanmasının səbəblərindən biri bu ölkədə mövcud olan islamofobiyadırsa, digər səbəbi fransız cəmiyyətinin antitürk mövqeyində dayanmasıdır. Fransanın xarici işlər nazirinin Strasburq merinin məscid tikintisinə 2,5 milyon vəsaitin ayrılmasına qarşı çıxması nazirin Türkiyəyə, bütövlükdə isə müsəlman türklərə bəslədiyi mənfi münasibətin açıq göstəricisidir. Həm fransalı nazir, həm də imam Xassen bununla antitürk mövqeyində dayandıqlarını göstərirlər. Onlar güclü Türkiyəni qətiyyən həzm edə bilmirlər. Bütövlükdə, Fransa dövlətinin müsəlmanlarla bağlı siyasətinə baxsanız görərsiniz ki, onlar müsəlman İrana daha isti münasibət göstərirlər, nəinki müsəlman Türkiyəyə. Onları İrana bağlayan başqa əlaqələr var. Burada millət amili də var. Ona görə də hesab edirəm ki, onlar bu məscidin bir türk-islam təşkilatı tərəfindən tikiləcəyini zənn edirlər və bu cür aqressiv davranırlar. Onlar məscid amilindən də sui-istifadə edirlər və bu məsələni siyasiləşdirməyə cəhd edirlər. Əslində isə məscidin, islamın siyasiləşdirilməsi düzgün deyil” - deyə müsahibimiz qeyd etdi.
İradə SARIYEVA
