Ermənistanın xarici işlər naziri Ara Ayvazyan bildirib ki, ölkəsi Rusiya və Türkiyə arasında münasibətlərin inkişafını diqqətlə izləyir.
Nazir eyni zamanda qeyd edib ki, Rusiya-Türkiyə əlaqələri bu iki ölkənin öz işidir: "Biz əminik ki, strateji müttəfiqimiz Ermənistanın təhlükəsizliyinin qarantı kimi lazım olduqda öz öhdəliklərini yerinə yetirəcək". Ayvazyan, eyni zamanda, Ermənistan və onun təhlükəsizliyinin Rusiyadan asılı olması barədə iddialarla razı olmadığını da dilə gətirib. O vurğulayıb ki, Qarabağda müharibə Rusiyanın səyləri ilə dayandırılıb: "Bu bəzilərinin xoşuna gəlməyə bilər, lakin faktdır. Əks halda, bizdə tamam başqa vəziyyət ola bilərdi".
Xarici işlər naziri ölkəsinin Türkiyə ilə gələcək münasibətlərinin necə olacağı ilə də bağlı aşkar yalan danışıb. O qeyd edib ki, ermənilər Türkiyə tərəfdən “soyqırıma” məruz qalsalar da, daima həmin ölkə ilə münasibətlərin normallaşmasına çalışıblar: “Sonuncu belə proses “Sürix protokolları” deyilən danışıqlar zamanı oldu və onu Türkiyə pozdu. Ancaq biz əminik ki, Türkiyə səhvini anlayıb, ermənifob siyasətindən əl çəkəcək və ölkələrimiz arasında münasibətlər normallaşacaq”.
Erməni nazirin bu mövqeyini aşkar yalan saymaq olarmı?
Politoloq Elşən Mustafayev “Bakı-Xəbər”ə açıqlamasında bildirdi ki, Ermənistanın münasibətləri yalnız Türkiyə ilə gərgin deyil: “Yürütdüyü işğal siyasəti səbəbindən Ermənistan uzun illərdir ki, təcrid vəziyyətində yaşayır. Bu da həmin ölkənin iqtisadiyyatını rəzil günə salıb. Yəni demək istədiyim budur ki, onların Azərbaycanla da münasibətləri düşmənçilik səviyyəsində olub. Bir əsrdən artıqdır ki, Ermənistan Türkiyəyə qarşı saxta “soyqırım” iddiaları ilə çıxış edir. Tarixdə olmayan bir hadisədən bəhrələnməyə çalışır. Bunun da nəticəsində Türkiyə və dünyada olan türklərə qarşı düşmənçilik aşılayır. Ermənistan barış istiqamətində heç bir addım atmayıb. “Sürix protokolları” deyilən prosesi isə Qərb aparırdı. Onlar doğrudan da Ermənistanın blokadadan çıxmasına çalışırdılar. Nəticədə nə oldu? Ermənistan yenə də qeyri-konstruktivlik nümayiş etdirdi. Türkiyənin sərhədlərin açılması ilə bağlı mövqeyi qəti olub. Deyilib ki, bu yalnız Ermənistan işğal altında saxladığı ərazilərdən geri çəkiləcəyi təqdirdə mümkün ola bilər. Ermənistan isə həmin istiqamətdə zərrə qədər də addım atmadı. Nəticədə Azərbaycan öz ordusunun gücü ilə onları işğal altındakı torpaqlardan qovdu. Ermənistan rəhbərliyi anlayır ki, bundan sonra kommunikasiyaların bərpası, sərhədlərin açılmasından başqa çarələri qalmayıb. Bilirlər ki, bunu edəcəklər. Sadəcə, bir qədər kimisə günahkar çıxararaq bunu etməyə can atırlar. Bu da tipik erməni xislətindən irəli gələn bir amildir”.
Politoloqun sözlərinə görə, Türkiyə ilə düşmənçilik hər zaman Ermənistan dövlətindən və onun xaricdəki diasporundan qaynaqlanıb: “Ermənistanın ənənəvi siyasətindən əl şəkib, qonşuları ilə normal əməkdaşlıq etməkdən başqa çarəsi qalmayıb”.
Məhəmmədəli QƏRİBLİ
