Son günlər Almaniya mətbuatında Azərbaycana qarşı təşkil olunan əsassız hücumların, ölkəmiz haqqında tirajlanan qərəzli informasiyaların şahidi oluruq. Güman ki, Azərbaycanın Aİ ailəsinə yaxınlaşması Almaniyanı niyəsə qane etmir. Eyni zamanda, NATO təlimlərində Azərbaycanın iştirakına Almaniyanın yaratdığı əngəllər də nəzərəçarpan səviyyədədir.
Üstəlik, Azərbaycanın 44 günlük Vətən müharibəsindəki qələbəsinə, illər boyunca ölkəmizin məlum mövzuda haqq işinə münasibətdə də Almaniya hər zaman səssiz, susqun qalıb. Hətta bəzən daha mənfi rakursdan mövqe sərgiləyib. İşğaldan azad olunan ərazilərə təşkil edilmiş diplomatik korpus səfərlərində də Almaniya səfiri heç bir zaman iştirak etməyib. Yəni bu qərəz, bu münasibət əslində silsilə formasındadır. Ona görə indi də media üzərindən absurd hücumlar təşkil olunur. Almaniyanın bu cür davranışları nə ilə izah oluna bilər?
Politoloq Yeganə Hacıyeva “Bakı-Xəbər”ə bildirdi ki, Azərbaycan-Almaniya əlaqələrinin tarixi bağları mövcuddur və bu, XIX əsrin ikinci yarısına təsadüf edir: “1863-cü ildə Almaniyanın "Siemens qardaşları" firması Gədəbəy rayonu ərazisində yerləşən mis yataqları bazasında iri misəritmə zavodları, Daşkəsən ərazisində kobalt yataqları bazasında kobalt zavodu inşa edib. XX əsrin əvvəllərinədək bu zavodlarda istehsal edilən mis Cənubi Qafqazda əridilən misin 2/3 hissəsini təşkil edirdi.
Çağdaş dövrümüzdə isə Almaniya Azərbaycanın Avropada ən vacib siyasi-iqtisadi tərəfdaşlarından biridir. Almaniya Avropa İttifaqının Şərqi Avropa ölkələri ilə sıx əməkdaşlığını nəzərdə tutan “Şərq Tərəfdaşlığı” təşəbbüsünün fəal müdafiəçisi və təşviqatçısıdır. Azərbaycanda 100-ə yaxın alman müəssisəsi fəaliyyət göstərir. Almaniya ilə Azərbaycan arasında illik ticarət dövriyyəsi təxminən 2 milyard avro təşkil edir və bu göstərici Almaniyanın Cənubi Qafqaz ölkələri ilə ticarət dövriyyəsinin 70%-ni təşkil edir. Almaniya ilə iqtisadi, siyasi və mədəni əlaqələrin inkişafı hər zaman Azərbaycanın maraq dairəsində olub. Azərbaycan isə Almaniya üçün neft-qaz ölkəsi kimi beynəlxalq layihələrdə mühüm tərəfdaşlardan biridir”.
Politoloqun sözlərinə görə, məntiqi olaraq Azərbaycanla Almaniya arasında mövcud olan münasibətlərin səviyyəsi onu deməyə əsas verirdi ki, Azərbaycan Avropa İttifaqı və digər avrostrukturlara inteqrasiya prosesində rəsmi Berlinin hərtərəfli dəstəyinə ümid edə bilərdi: “Məsələ ondadır ki, Azərbaycan üçün Avroatlantik məkana inteqrasiya və Avropa Birliyi ilə qarşılıqılı faydalı əməkdaşlıq maraq kəsb edir. Bu istiqamətdə Cənubi Qafqazın ən aparıcı ölkəsi kimi Azərbaycanla əməkdaşlığı dərinləşdirmək üçün səylərini daha da artırmaq niyyətli mesajlar verən Almaniya rəsmilərinin fikirləri belə dəstəyin olacağı anlamına gəlirdi. Amma son illər, xüsusilə keçən il 44 günlük Vətən müharibəsi zamanı və sonrası Almaniyanın Azərbaycana münasibətdə fərqli yanaşmasının şahidi oluruq. Burda bir haşiyə çıxım ki, Almaniyada, kiçik olmasına baxmayaraq, son illər ictimai və siyasi proseslərə geniş təsir imkanları əldə etmiş, mediada və siyasi dairələrdə təmsil olunan ermənilərin Almaniya-Azərbyacan münasibətlərinin pozulması üçün səfərbər olması diqqəti çəkir və buna görə də alman mediasında Türkiyə və Azərbaycana qarşı hücumlar təşkil olunur. Almaniyada ölkə rəsmilərinin əsassız açıqlamaları və Alman mətbuatında əsassız ittiham materiallarının yayılması bizdə Almaniyanın 44 günlük Vətən müharibəsi döyüşlərində Azərbaycan ordusunun qalibiyyətini həzm edə bilməməsi əminliyini yaradır. Xüsusilə 10 noyabr birgə bəyanatının imzalanmasından sonra Almaniyanın davranışları bir sıra suallara səbəb oldu. Maraqlıdır, Almaniya Cənubi Qafqazda ən böyük ticari tərəşdaşı olan, Avropa Birliyinin enerji təhlükəsizliyində mühüm rol oynayan Azərbaycanın BMT tərəfindən tanınan ərazi bütövlüyünün bərpasından niyə narahat olub? Gürcüstanda fəaliyyət göstərən Alman fondları niyə Azərbaycan əleyhinə fəal kampaniya aparır? Almaniya niyə Azərbaycanın NATO və Aİ ilə əlaqələrinin inkişafına mane olmağa çalışır? Fikirləşirəm ki, azad etdiyimiz torpaqlara səfər edib, oradakı dağıntıları öz gözü ilə görüb şahidlik etmək istəməyən Almaniyanın ölkəmizdəki səfiri Azərbaycan cəmiyyətini narahat edən bu suallara cavab verməlidir”.
Məhəmmədəli QƏRİBLİ
