Ermənistanda demoqrafik vəziyyət get-gedə daha da pisləşməkdədir. Yayılan məlumatlara görə, təkcə bu ilin fevral ayında Ermənistanı 58 min 297 nəfər əhali tərk edib. Proses Ermənistan Rusiya ilə təyyarə reyslərini bərpa etdikdən sonra daha geniş miqyas alıb. Səbəb isə bu ölkədəki iqtisadi-siyasi böhran, aclıq, işsizlik, hakimiyyətə inamsızlıq, müharibə qorxusudur.
Məlumatlara görə, Ermənistan 44 günlük müharibədə məğlub olduqdan sonra revanşistlərin meydana çıxması, onların insanları müharibəyə təhrik etməsi xüsusən də gənclərin kütləvi olaraq Ermənistandan qaçmasına səbəb olub.
“Erməni mətbuatı açıq şəkildə yazır ki, Rusiyadan Ermənistanın İrəvan və Gümrü şəhərlərinə təyyarələr boş gəlir, amma dolu qayıdır”
Məsələni baki-xeber.com-a şərh edən BDU-nun erməni araşdırmaları mərkəzinin böyük elmi işçisi İsmayıl Tanrıverdi bildirdi ki, Moskvadan İrəvana, Gümrüyə təyyarələr boş gəlir, dolu qayıdır. “Ermənilərin son ayyarımda Ermənistanı tərk etməsi halları kütləvi xarakter alıb. Onların Ermənistanı tərk etməsi günü-gündən sürətlənir. Artıq “ermənilərin Ermənistanı tərk etmələri sürət toplayır” başlıqlı yazılar vasitəsilə erməni mətbuatında həyəcan təbili çalınmağa başlanıb. Məlum olur ki, təkcə fevral ayında ölkəni tərk edənlərin sayı 58 297 nəfər olub, bu da böyük rəqəmdir. Erməni mətbuatı açıq şəkildə yazır ki, Rusiyadan Ermənistanın İrəvan və Gümrü şəhərlərinə təyyarələr boş gəlir, amma dolu qayıdır. Yəni Moskvaya qayıdan təyyarə reysləri üçün ermənilər çoxsaylı növbə yaradır, hamı getmək istəyir. Halbuki, bu ölkənin baş naziri Paşinyan əhaliyə daim yalan məlumat verir və deyir ki, “Rusiya ilə hava yolu uçuşları bərpa olunduqdan sonra Ermənistana gələnlərin sayı qayıdanların sayından çox olur”. Amma proses Paşinyanın dediklərinin əksinə gedir. İrəvanda təyyarə biletlərinin qiyməti də qalxıb və 600-700 dollar təşkil edir, buna baxmayaraq, camaat qaçır. Ermənistanın özünün təyyarəsi yoxdur, onlar Rusiya təyyarələrindən istifadə edirlər. Əhali Rusiyaya, Rusiyadan isə başqa ölkələrə gedir. İrəvandan başqa ölkələrə birbaşa hava reysləri elə də intensiv deyil, çünki bu ölkənin özünün təyyarəsi yoxdur. Robert Köçəryanın vaxtında Ermənistana aid bütün təyyarələr özəlləşdirilib satıldı, pulu isə mənimsənildi. Ona görə də onlar təyyarə məsələsində də Rusiyadan asılıdırlar”.
Ermənistan əhalisinin ölkəni tərk etməsi səbəblərindən biri də əhaliyə məxsus torpaq sahələrinin vəzifəli şəxslər, milyonçular tərəfindən ucuz qiymətə alınaraq özəlləşdirilməsidir: “Ermənistanda əhalidən torpaq sahələrini imkanlı şəxslər çox ucuz qiymətə alır və sonradan onları əhaliyə baha qiymətə icarəyə verirlər. Torpaq sahəsi olmayan insanlar isə ölkəni tərk edib başqa ölkələrə üz tuturlar. Bundan başqa, Paşinyan hakimiyyətinə inamsızlıq, əhalinin durumunun iflic vəziyyətə salınması, onların bir parça çörəyə möhtac qalması kimi amillər Ermənistanın boşalmasına səbəb olur. Yoxsullaşmış əhalinin sabaha ümidi yoxdur, insanlar nə Paşinyan hakimiyyətinə, nə də müxalifətə inanır, ona görə də başqa ölkələrə üz tuturlar. Bir tərəfdən də revanşist qüvvələrin müharibə çağırışları gəncləri mümkün qədər tez Ermənistanı tərk etməyə və Rusiya vasitəsilə başqa ölkələrə getməyə vadar edir” - deyə İ.Tanrıverdi qeyd etdi.
İradə SARIYEVA
