“...Biz bu il Novruz bayramını Şuşada, Cıdır düzündə qeyd edirik. Bu, tarixi hadisədir. 2004-cü ildən başlayaraq, hər il mən Azərbaycan xalqını Novruz bayramı münasibətilə təbrik edərkən deyirdim ki, biz öz doğma torpaqlarımıza qayıdacağıq. Deyirdim ki, biz ölkəmizin ərazi bütövlüyünü bərpa edəcəyik. Deyirdim ki, biz Novruz bayramını torpaqlarımız işğaldan azad olunandan sonra Qarabağda qeyd edəcəyik və bu gün gəldi. Bu gün biz Novruz bayramını qədim şəhərimizdə, Azərbaycanın mədəniyyət paytaxtı Şuşada qeyd edirik. Bu, tarixi hadisədir. Bu, böyük xoşbəxtlikdir. Allah Azərbaycan xalqının dualarını eşitdi. Hər il Novruz bayramı ərəfəsində hamımız yəqin ki, fikirləşirdik, bir-birimizə deyirdik, inşallah, gələn il Novruz bayramını Qarabağda qeyd edək, gələn il Novruz bayramını Şuşada qeyd edək və bu gün gəldi. 28 ildən sonra biz Şuşaya qayıtdıq. Novruz bayramını Cıdır düzündə qeyd edirik, tarixi ədaləti bərpa etmişik.
Noyabrın 8-də Şuşanın azad olunması ilə bağlı müjdəni Azərbaycan xalqına verərkən demişdim ki, Şuşa, sən azadsan! Bu gün azad Şuşada biz öz milli bayramımızı – Novruz bayramını qeyd edirik...” Bu fikirləri Şuşadan xalqa müraciətində Prezident İlham Əliyev bildirib.
Gördüyümüz kimi Prezident İlham Əliyev Azərbaycan xalqına bu ilki Novruz müraciətini və bayram təbrikini Qarabağın baş tacı Şuşadan, Cıdır düzündən etdi.
Ümumiyyətlə, Şuşa ilə bağlı Prezidentin göstərdiyi həssaslıq, ölkə başçısının Novruz bayramı ərəfəsində Şuşaya səfər etməsi, Cıdır düzündə müqəddəs bayram tonqalını yandırması və sair bütün bunlar belə qənaətə gəlməyə əsas verirmi ki, Azərbaycan Qarabağın statusu ilə bağlı məsələnin müzakirəsinə hec vaxt getməyəcək..?
“Azərbaycan tərəfindən bu sahədə ortaya birmənalı şəkildə mövqe qoyulub”
Qarabağ Azadlıq Təşkilatının (QAT) sədri Akif Nağı baki-xeber.com şərhində bildirdi ki, Prezidentin Novruz bayramı ərəfəsində, ilaxır çərşənbə günündə Şuşaya səfər etməsi ölkə başçısının işğaldan azad edilən ərazilərimizə, xüsusən də Şuşaya münasibətinin, ona verdiyi böyük əhəmiyyətin göstəricisidir: “Eyni zamanda da Prezident Şuşadan dünyaya çox mühüm mesajlar verdi, Şuşa və işğaldan azad edilən ərazilərimizlə bağlı çox əhəmiyyətli fikirlər söylədi. Həmçinin də ermənilərin Şuşa və digər ərazilərimizlə bağlı məkrli niyyətlərinə açıq mətnlə öz mövqeyini bildirdi və qeyd etdi ki, “Artsax” adlı hər hansı bir qurum yoxdur, statusdan belə söhbət gedə bilməz. Prezident Şuşada birmənalı şəkildə öz mövqeyini ortaya qoydu və bütün dünyaya mesajlarını verdi. Prezidentin Cıdır düzündə bayram tonqalı yandırması da dünyaya bir mesaj idi. Ölkə başçısı orada bir maraqlı ifadə də işlətdi ki, ermənilər Şuşanın ruhunu, ab-havasını dəyişə bilmədilər. Bu da aydın bir göstərici olmaqla yanaşı həm də məsələnin bir qürurverici tərəfidir ki, Prezident Şuşanın taleyinə bu qədər diqqətlə, həssaslıqla yanaşır. Eyni zamanda nümayiş etdirir ki, Şuşa Azərbaycan şəhəri olaraq qalıb. Baxmayaraq ki, ermənilər Şuşanın tarixini saxtalaşdırmağa çalışıblar, onun haqqında qalaq-qalaq müxtəlif xarici dillərdə saxta kitablar yazdırıblar, qondarma filmlər çəkdiriblər, Şuşanı erməni şəhəri kimi qələmə verməyi hədəfləyiblər, amma bu hədəflərin heç birinə çata bilməyiblər. Yəni erməni yalanları nə ayaq tutdu, nə də yeridi”.
A.Nağı qeyd etdi ki, hazırda ermənilər çabalayırlar, nələrsə etməyə çalışırlar, xüsusən də Rusiyanın köməyi ilə Qarabağın statusu ilə bağlı nəticə əldə etməyə cəhd edirlər. A.Nağının sözlərinə görə, o, erməni mətbuatında çox qəribə və absurd fikirlərə də rast gəlir ki, guya “Artsax” Ermənistanı “xilas etdi”. “Guya dırnaqarası, separatçı qurum Azərbaycan ordusunun qarşısında dayanıb. Ermənilər utanmadan bu yalanları danışırlar. Hansı “dayanışdan”, hansı “dirənişdən” söhbət gedə bilər ki, ilk həmlədəcə Ermənistan ordusu Azərbaycan ordusu tərəfindən darmadağın edilmişdi. Bir neçə saat lazım idi ki, Azərbaycan ordusu artıq Xankəndinə daxil olsun. Yəni bu reallığı ört-basdır etməklə yalanlarını davam etdirirlər. Ermənistan məsələyə bu cür yalan mövqedən yanaşır və bütün imkanlarından istifadə edib nəyəsə nail olmağa və Qarabağın ermənilər yaşayan ərazisində nəyisə qurub dünyaya çatdırmağa cəhdlər edirlər. Amma bu gün ermənilərin bu separatçı niyyətlərinə heç yerdən dəstək də yoxdur. Yəni separatçılara Amerikadan da heç bir dəstək verilmir. Orada nə qədər cəhdlər edilsə də, erməni lobbisinin pulu ilə danışan konqresmenlər, senatorlar olsa da, nə qədər onları bir yerə yığıb adlarından müraciətlər edilsə də, heç bir nəticəyə nail ola bilmirlər. Yəni Amerika Cənubi Qafqazda yaranmış yeni reallıqla hesablaşır. Yeni reallıqda Azərbaycan və Türkiyə amilinin regionda əsas gücə çevrilməsidir. Bu güclə də, Amerika da, Avropa da hesablaşır, Rusiya da qismən hesablaşsa da, o öz mövqeyini müdafiə etməyə çalışır. Regionda az da olsa Rusiya ilə Ermənistanın mövqeləri üst-üstə düşür. Çünki Rusiya regionda, separatçıların diriltmək istədiyi “Artsax”da qalmaq istəyir, ona görə də oradakı quldur dəstələrinin separatçı hərəkətlərinə ya göz yumur, ya da dəstək verir, belə bir vəziyyətdir. Amma Azərbaycanın iradəsi ortadadır. Azərbaycan hakimiyyətinin, rəhbərliyinin hədəfi birmənalı şəkildə göstərilir və ona doğru gedilir. İşğaldan azad edilən ərazilərdə aparılan tikinti-quruculuq işləri onun əyani göstəricisidir, eyni zamanda Azərbaycan Prezidenti rəsmi şəkildə bəyan edib ki, heç bir status müzakirə mövzusu ola bilməz, eyni zamanda da Qarabağda separatçı, qondarma qurum məhv edilib, burada heç bir separatçı qalmayacaq və bura Azərbaycan ərazisidir, Qarabağın bütün hissələrində Azərbaycan hakimiyyəti bərpa olunacaqdır. Azərbaycan tərəfindən bu sahədə ortaya birmənalı şəkildə mövqe qoyulub və Azərbaycan da bu mövqedən çıxış edib və yaxın vaxtlarda nəticələr olacaq, Qarabağın bütün ərazisi Azərbaycanın nəzarəti altına qayıdacaq. Bizim gedən proseslərə verdiyimiz rəy və qiymət bundan ibarətdir” - deyə A.Nağı vurğuladı.
İradə SARIYEVA
