Ermənistanda növbədənkənar parlament seçkilərinin keçiriləcəyi vaxt bəlli olduqdan sonra ölkədə siyasi böhrana son veriləcəyi gözlənilsə də, real vəziyyət bunun tam əksini göstərir. Bu haqda danışmazdan öncə qeyd edək ki, baş nazir Nikol Paşinyan iyunun 20-də Ermənistanda növbədənkənar parlament seçkilərinin keçiriləcəyinin anonsunu edib.
“Çiçəklənən Ermənistan” partiyasının lideri Qagik Tsarukyanla görüşdən sonra Paşinyan bu qərara gəldiyini bildirib: “Mənim “Çiçəklənən Ermənistan”ın lideri Qagik Tsarukyanla görüşüm nəticə ilə başa çatdı. Görüş zamanı biz vurğuladıq ki, yaranmış daxili siyasi vəziyyətdən ən yaxşı çıxış yolu növbədənkənar parlament seçkiləridir. Ermənistan prezidenti ilə, “Mənim addımım” fraksiyası ilə, “İşıqlı Ermənistan” fraksiyasının lideri Edmon Marukyanla söhbətlərim nəzərə alınaraq, bu il iyunun 20-də respublikada növbədənkənar parlament seçkiləri keçiriləcək”. Beləliklə, bu açıqlamadan bəlli olur ki, parlamentin müxalif partiyaları növbədənkənar parlament seçkilərinə qatılmağa hazırdır. Lakin parlamentdənkənar müxalifət partiyalarının bu məsələdə mövqeyi haçalanıb. Məsələn, artıq məlumdur ki, Ermənistan müxalifətinin birləşdiyi "Vətənin xilası uğrunda hərəkat"da yer alan partiyaların heç də hamısı növbədənkənar parlament seçkilərində iştirak etməyəcək. Hərəkatın lideri Vazgen Manukyan bu xüsusda bildirib: "Nikol Paşinyanın dövründə keçirilən seçkilər Ermənistan üçün fəlakət olacaq. Mən bu seçkidə iştirak etməyəcəyəm". Bundan əlavə, Ermənistanın sabiq prezidenti Levon Ter-Petrosyan da rəhbərlik etdiyi Erməni Milli Konqresinin növbədənkənar seçkilərə qatılmayacağını elan edib. O, indiki reallıqda erkən seçkidən imtina etdiklərini vurğulayıb. Digər bir sıra müxalifət fəalları da erkən seçkilərlə razılaşmayıblar. Baş nazirə qarşı çıxan müxalif fəallar Paşinyanın maksimum aprelin sonlarına qədər istefa verməsi tələbini irəli sürüblər. Amma "Vətənin xilası uğrunda hərəkat"da yer alan “Vətən” partiyası seçkilərdə iştiraka hazır olduğunu bildirib. Bütün bunlar artıq növbədənkənar parlament seçkiləri məsələsində Ermənistan müxalifətinin parçalandığını göstərir. Bu isə Paşinyanın qələbə şansını artırır. Beləliklə, indiki halda əsas müxalif qüvvələrin yer aldığı “Vətənin xilası uğrunda hərəkat” daxilində parçalanmalar qeydə alınır. İlk növbədə o baxımdan ki, burada yer alan partiyaların bəziləri yalnız Paşinyanın iştirak etmədiyi halda növbədənkənar parlament seçkilərinin keçirilməsini mümkün hesab edir. Lakin parlamentdə yer alan müxalifət partiyalarının əks mövqedən çıxış etməsi onların mövqeyinin zəifləməsinə və müxalif düşərgədə ziddiyyətlərə gətirib çıxarıb. Növbədənkənar parlament seçkilərində digər siyasi qüvvələrlə müqayisədə Paşinyanın və rəhbəri olduğu “Vətəndaş Müqaviləsi” partiyasının qalib gəlmək şansları daha yüksək qiymətləndirilir. Bunu Ermənistanda Beynəlxalq Respublikaçılar İnstitutunun keçirdiyi son sorğunun nəticələri də təsdiq edir. Sorğuya əsasən, əhalinin 33 faizi Paşinyanı dəstəkləyir. Bu göstərici baxımından Paşinyan rəqiblərini dəfələrlə üstələyir. Əhali tərəfindən hələ də dəstəklənən əsas siyasi qüvvə olduğunu bildiyindən, Paşinyanın növbədənkənar parlament seçkilərinin keçirilməsinə razılıq verdiyi ehtimal edilir. Xalqdan yenidən mandat aldıqdan sonra Paşinyanın rəqiblərini sıradan çıxarmaq üçün daha radikal addımlar atacağı proqnozlaşdırılır. Bütün bunlar qarşıdakı dövr ərzində Ermənistanda ictimai-siyasi vəziyyətin yenə gərgin müstəvidə qalmasını, ölkədə qarşıdurma meyllərinin daha da güclənməsini qaçılmaz edir. Paşinyanın isə seçkidə yenidən qalib gəlib rəqiblərinə qarşı sərt hücumlar təşkil etməsi gözlənilir. Çüni seçki ilə bağlı onun gələn ay vəzifəsindən uzaqlaşması gözlənilir. “İşıqlı Ermənistan” fraksiyasının lideri Edmon Marukyan bununla bağlı bildirib: “Əgər Konstitusiyanı nəzərə alarsaq, 20 iyunda seçkinin baş tutması üçün 20 apreldə Paşinyan istefaya getməlidir. Onun ilk istefasından sonra parlament 2 həftə ərzində yeni baş nazir seçməlidir, bundan sonra isə seçkiqabağı kampaniya aparmaq üçün 45 gün olacaq. Belə çıxır ki, Paşinyan 20 aprelə qədər getməlidir”.
Hesab edilir ki, mövcud reallıqlarda hansısa dəyişiklik olmasa, Paşinyan yenidən baş nazir postunu əldə edəcək. Çünki xarici siyasət arenasında Paşinyan özünü zəif oyunçu kimi göstərsə də, daxili mübarizədə özünə əmindir. Ermənistanda cəmiyyətin əhval-ruhiyyəsinə baxsaq, onlar üçün ən dəhşətli məsələ savaşın yenidən başlaya biləcəyi haqda xəbərlərdir. Buu erməni hərbi ekspert Gevorq Gevorqyan da xüsusi olaraq vurğulayır: “Dövlətçiliyimiz ağır yaralıdır, xilas ümidi yüz minlərlə küçəyə çıxmaq və dövlətçiliyin məhv edilməsi hakimiyyətindən qurtulmaqdır. Lakin xalq bunu etmir. Çünki Paşinyanı əvəzləyəcək hakimiyyətin yenidən müharibəyə başlayacağından ehtiyatlanır. Xalq müharibə istəmədiyindən, Paşinyanın yenidən hakimiyyətdə qalmasına səs verənlər çox olacaq. Ermənistanda ehtiyat edirlər ki, Azərbaycan Sünik və Naxçıvan istiqamətlərində müharibənin ikinci mərhələsinə tələsir. Yeri gəlmişkən, bütün bunların əsas və son məqsədi Böyük Turanın həyata keçirilməsidir. Amma Paşinyan hakimiyyətdə olsa müharibə olmayacaq. Ermənistanda müharibəyə qarşı çıxanlar çoxluq təşkil edir”. Bütün bunlar Paşinyanın qalib gəlmək ehtimalının artmaqda olduğunu göstərir.
Nahid SALAYEV
