Məlumdur ki, bu gün Azərbaycan dövlətinin qarşısında duran prioritet məsələ işğaldan azad edilmiş ərazilərin bərpa olunmasıdır. Bu məsələ ən yüksək səviyyədə xüsusi diqqət mərkəzində yer alır. Elə Prezident İlham Əliyev, birinci xanım Mehriban Əliyeva və qızları Leyla Əliyevanın martın 15-də Füzuli və Xocavənd, martın 16-da isə Şuşa şəhərinə səfəri də bunun real təsdiqidir.
Ekspertlər qeyd edir ki, postmüharibə dövründə tez-tez baş tutan bu səfərlər göstərir ki, Prezident işğaldan azad olunmuş ərazilərin bərpa edilməsini bilavasitə nəzarətdə saxlayır, görülən işlərlə yerindəcə tanış olur. Xatırladaq ki, azad olunmuş ərazilərdə hazırda bir neçə layihə icra olunur. Bunlardan ən əsası yol infrastrukturunun qurulmasıdır. Dövlət başçısının son səfərində təməli qoyulan Füzuli-Hadrut avtomobil yolunun inşası azad edilmiş ərazilərin bərpası üçün böyük əhəmiyyətə malikdir. Hazırda Füzulidən Şuşaya Zəfər yolu çəkilir. Bununla yanaşı, Bərdə-Ağdam yolunun tikintisi də yaxın gələcəkdə reallaşacaq. Eyni zamanda, Horadizdən Zəngilana qədər yol çəkiləcək. Səfər çərçivəsində Prezident tərəfindən eyni zamanda, Hadrut-Cəbrayıl-Şükürbəyli avtomobil yolunun təməli qoyuldu. Bundan başqa, səfər çərçivəsində Şuşa sanatoriyasına da baxış keçirən Azərbaycan Prezidenti bildirdi ki, Şuşa şəhərinə çox böyük turist axınının olacağını nəzərə alaraq orada “beş”, “dörd” və “üç” ulduzlu otellər tikiləcək. Yəni turizm sənayesinin inkişafı ən başlıca hədəflərdən biri kimi müəyyənləşdirilib.
Yuxarıda qeyd edildiyi kimi, Prezidentin səfərləri işğaldan azad edilmiş ərazilər, onlarla bağlı məsələlərə dövlət başçısının nə dərəcədə həssas yanaşmasının real təzahürüdür. Eyni zamanda, sözügedən səfərlər 30 il ərzində ermənilər tərəfindən darmadağın və viran edilən ərazilərlə bağlı həqiqətlərin dünya ictimaiyyətinə çatdırılması baxımından da vacib əhəmiyyət kəsb edir. Təsadüfi deyil ki, azad edilmiş rayonlarda ermənilər tərəfindən törədilən dağıntılar, vandallıq aktları konkret faktlar əsasında daim Prezident tərəfindən xüsusi qabardılır, yerli və beynəlxalq ictimaiyyətə bununla bağlı çoxsaylı videolar, fotolar və digər əyani sübutlar təqdim edilir. Eləcə də, Prezidentin səfərləri Azərbaycan torpaqlarında ermənilərin saxta tarix yaratmaq cəhdlərinin ifşası, qədim dini abidələrimizə qarşı törədilmiş erməni vəhşiliyinin dünyanın diqqət mərkəzinə gəlməsi baxımından da böyük önəm kəsb edir. Dünya bu səfərlər fonunda ermənilərin dini müstəvidə də dözümsüzlüyünə dair çoxsaylı faktlar əldə edir. Ermənilərin viran qoyduğu ərazilərin Azərbaycan tərəfindən yenidən həyat dolu yaşayış məskənlərinə, abadlıq-quruculuq məkanına çevriləcəyi də prezidentin səfərləri fonunda özünü tam qabarıq büruzə verir. Müharibənin bitməsindən çox qısa müddət keçməsinə baxmayaraq, azad edilmiş ərazilərdə görülən işlər Azərbaycanın siyasi, iqtisadi qüdrətinin konkret təzahürüdür.
Digər tərəfədən faktdır ki, Azərbaycan hər zaman dünyada tolerantlıq, əməkdaşlığın, mədəniyyətlər və sivilizasiyalararası dialoqa xüsusi hörmət və qayğısı ilə seçilən ölkələr siyahısındadır. Ancaq buna baxmayaraq, İrəvanın vandalizm siyasətinin qurbanı olan tarixi abidələrimiz, maddi-mənəvi irsimizin qəsdən və riyakarcasına dağıdılması və təhqir olunmasının beynəlxalq hüquq və ədalət prinsiplərinə sığmayan vandalizm aktı olduğu da real həqiqətdir. Elə dövlət başçısının səfərləri fonunda dünya bu xüsusda erməni əməllərinə bir daha şahidlik edir. Təbii ki, işğaldan azad olunan rayon və kəndlərimizdə abidələrimizi, səfalı guşələrimizi yararsız və dağıdılmış vəziyyətdə görmək çox ağrılıdır. Lakin dünya bu faktları da bilməlidir. Məhz Prezidentin səfərləri fonunda bu gün işğaldan azad edilən ərazilərimizdə erməni vandallarının illərlə törətdikləri vəhşi əməllər hər addımda nəzərə çarpır. Viran qoyulan şəhər və kəndlər, dağıdılan, təhqir edilən məscidlər, yer üzündən silinən tarix və mədəniyyət abidələri düşmənin nə qədər barbar, vəhşi olduğunu göstərir. Əlbəttə, bütün dağıntılar məqsədli şəkildə edilib. Mənfur düşmən Ermənistan ərazisindəki tarixi torpaqlarımızda, Dağlıq Qarabağda və ətraf rayonlarda azərbaycanlılara aid tarixi mirasları viran qoymaqla azərbaycanlıların bu ərazidəki mədəni kimliyinin itirilməsi məqsədi güdüb. Bu torpaqlarda bütün milli izlərimizi silməyə çalışıb. Amma ərazilərin işğaldan azad edilməsi ermənilərin bu planlarının üzərindən xətt çəkib.
Bundan əlavə, azad olunmuş ərazilərdə Azərbaycanın gördüyü və görəcəyi genişmiqyaslı işlər dünyada diqqətlə izlənilir. Elə bundan irəli gəlir ki, artıq çoxsaylı xarici şirkətlər, ayrı-ayrı dövlətlər də azad olunmuş ərazilərin bərpasında iştirak etmək istəyir. Onlardan bəziləri ilə artıq müvafiq razılıqlar da əldə olunub. İşğaldan azad edilmiş bütün şəhər və rayonların baş planlarının hazırlanması ilə bağlı Prezidentin tapşırığının icrası yüksək surətlə davam etməkdədir. Eləcə də, dövlət başçısının tapşırıqlarına uyğun olaraq, işğaldan azad olunan ərazilərdə bərpa və yenidənqurma işlərinin aparılması, o cümlədən sosial-iqtisadi, enerji, kommunal, nəqliyyat infrastrukturunun yaradılması istiqamətində də müvafiq addımlar atılır.
Ramil QULİYEV
