Məlum olduğu kimi, Prezident İlham Əliyev əfv sərəncamı imzalayıb. Sərəncama əsasən, 625 nəfər əfv edilib. Onların 475 nəfəri azadlıqdan məhrumetmə cəzasının çəkilməmiş hissəsindən azad edilib.
98 nəfərin azadlıqdan məhrumetmə cəzasının çəkilməmiş hissəsi yarıyadək azaldılıb. 3 nəfər ömürlük azadlıqdan məhrumetmə cəzasına məhkum edilmiş şəxsin cəzası 25 il müddətinə azaldılıb. 2 nəfər şərti olaraq məhkum edilmiş şəxs, 3 nəfər azadlıqdan məhrum edilmiş və cəzasının çəkilməsi təxirə salınmış şəxs, 9 nəfər azadlığın məhdudlaşdırılması cəzasına məhkum edilmiş şəxs cəzanın çəkilməmiş hissəsindən, 12 nəfər islah işləri cəzasına məhkum edilmiş şəxs cəzanın çəkilməmiş hissəsindən, 23 nəfər cərimə cəzasına məhkum edilmiş şəxs cəzadan azad edilib.
O da məlumdur ki, Azərbaycanda siyasi məhbus yoxdur. Ancaq, hər halda, radikal düşərgə, insan haqları fəalları həbs olunanların bəzilərini siyasi məhbus hesab edir və bunun ətrafında zaman-zaman spekulyasiya xarakterli kampaniya aparırdılar. Bu baxımdan onların siyasi məhbus hesab etdiyi 38 nəfərin Prezident tərəfindən əfv olunması ölkədə vətəndaş həmrəyliyinin, milli birliyin daha da güclənməsinə, siyasi dialoqun inkişafına nə kimi töhfə verə bilər?
“Belə genişmiqyaslı əfv sərəncamı çox önəmli hadisədir”
Sözügedən məsələ ilə bağlı fikirlərini “Bakı-Xəbər”lə bölüşən AVCİYA-nın vitse-prezidenti, professor Məhərrəm Zülfüqarlının fikrincə, siyasi məhbus hesab edilən şəxslərin azad edilməsi ölkədə milli birliyin daha da möhkəmlənməsinə xidmət edəcək: “Belə genişmiqyaslı əfv sərəncamı çox önəmli hadisədir. İstənilən halda belə bir qərarın verilməsi müsbət haldır. Çünki Allah heç kəsə həbsxana qismət etməsin. Siyasi məhbus məsələsi ilə bağlı bir sıra məqamlara diqqət etmək lazımdır. Avropa Şurasında siyasi məhbus deyilir, amma bunun kriteriyaları yoxdur. Ona görə də biz QHT olaraq 8 il bundan əvvəl məsələ qaldırdıq ki, bununla bağlı kriteriyalar müəyyən edilsin. Yəni siyasi məhbus kimə deyilir? Hələ də bu kriteriyalar müəyyən edilməyib. Bütün hallarda, siyasi məhbus hesab edilən 38 nəfərin əfv edilməsi ciddi hadisədir. Hesab edirəm bu, bütün mənalarda müsbət haldır. Bu, ölkə daxilində vətəndaş həmrəyliyinin yaranmasına kömək edir. İndiki məqamda bu bizə çox vacibdir. Ona görə ki, 44 günlük müharibə dövründə Azərbaycanda güclü milli birlik yarandı. Biz bu milli birliyi qorumalı və daha da gücləndirməliyik. O baxımdan hesab edirəm ki, siyasi məhbus hesab olunan şəxslərin əfv edilməsi ölkədə milli birliyin daha da möhkəmlənməsinə xidmət edəcək. Eyni zamanda, siyasi dialoq prosesinə müsbət mənada təkan verəcək”.
Professor onu da əlavə etdi ki, bu cür qərarların ölkə üçün əhəmiyyəti böyükdür.
Vidadi ORDAHALLI
