“Erməni vandalizminin vəhşiliklərinin qiymətləndirilməsi üzrə missiyanı qəbul etməyə hazırıq”. Bunu Prezident İlham Əliyevin UNESCO-nun baş direktoru Odre Azule ilə telefon danışığının davamı olaraq, 2021-ci ilin 15 fevral və 16 mart tarixlərində Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev UNESCO-nun baş direktorunun ofisinin rəhbəri Nikolas Kassionides ilə videokonfrans formatında görüşlərdə bildirib.
Görüşlərdə Azərbaycanın “Silahlı münaqişələr zamanı mədəni mülkiyyətin qorunması üzrə” 1954-cü il Haaqa Konvensiyasına uyğun olaraq, işğaldan azad olunmuş ərazilərə dəvət etdiyi UNESCO missiyası ilə bağlı müzakirələr aparılıb.
Azərbaycanın UNESCO ilə əməkdaşlığa böyük önəm verdiyini, konstruktiv dialoqa həmişə açıq olduğunu qeyd edən Hikmət Hacıyev sonuncu videogörüşdə işğaldan azad olunmuş Azərbaycan ərazilərində mədəni və dini abidələrə vurulmuş zərərin qiymətləndirilməsi üçün ölkəmizin UNESCO missiyasını qəbul etməyə hazır olduğunu bir daha ifadə edib.
H.Hacıyev Ermənistanın 30 ilə yaxın işğal dövrü ərzində həmin ərazilərdə Azərbaycan xalqının mədəni və dini irsinə qarşı törətdiyi vandalizmin miqyasının dəhşətli olduğunu bildirib.
Fakt qarşısında qalan UNESCO azad edilmiş ərazilərimizə missiya göndərəcək, yoxsa yenə də öz köhnə ənənəsinə uyğun olaraq yayınacaq?
“UNESCO təmsilçisinin, obrazlı desək, faktlarla susdurulması Azərbaycanın nə qədər haqlı mövqedə, haqlı mərhələdə olduğunu göstərir və sübut edir”
Azərbaycan Vətəndaş Hərəkatının idarə heyətinin üzvü, siyasi şərhçi Mübariz Göyüşlü “Bakı-Xəbər”ə bildirdi ki, UNESCO-nun tərəfsiz mövqe tutaraq azad olunmuş ərazilərimizə xüsusi missiya göndərməsi vacib və aktual məsələlərdən biridir. “Hesab edirəm ki, Azərbaycan dövləti çox haqlı bir məqama toxunub, doğru bir mövqe ortaya qoyub. Ölkə başçısı İlham Əliyev də bu məsələni hər dəfə çıxışlarında, müsahibə və görüşlərində bu və digər formada qeyd edir, beynəlxalq təşkilatları işğaldan azad edilən ərazilərimizə dəvət edir, eyni zamanda da bu beynəlxalq təşkilatların erməni vandalizminə biganə münasibətini, Azərbaycana qarşı ədalətsiz mövqe sərgilədiklərini vurğulayır.
Mən Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri H.Hacıyevin görüşdə səsləndirdiyi fikirləri, sərgilədiyi mövqeyini də çox təqdirəlayiq hesab edirəm. UNESCO təmsilçisinin, obrazlı desək, faktlarla susdurulması Azərbaycanın nə qədər haqlı mövqedə, haqlı mərhələdə olduğunu göstərir və sübut edir. Biz beynəlxalq təşkilatların Azərbaycana qarşı ikili standartlarla yanaşmasının hər zaman şahidi olmuşuq. Xüsusən də UNESCO-nun Azərbaycana qarşı sərgilədiyi son dönəmlərdəki ikili yanaşma təəssüflər olsun ki, keşmişdə də olub. Torpaqlarımız işğalda olduğu müddətdə oradakı dini, tarixi-mədəni, mənəvi abidələrimizin dağıdılması, Azərbaycanın təbii sərvətlərinin talan edilməsi məsələsini bizim hökümət və ictimaiyyət nümayəndələri dəfələrlə qaldırıblar, amma təəssüflər olsun ki, UNESCO da daxil olmaqla, beynəlxalq təşkilatlar buna həmişə susqunluq göstəriblər. Yəni bu faktlara reaksiya verməyib, onları görməzdən gəlirdilər. Bu da onların, birmənalı olaraq, erməni təəssübkeşliyi göstərmələrinin nəticəsidir”.
M.Göyüşlü hesab edir ki, UNESCO və digər təşkilatlar tərəfindən Azərbaycana qarşı ikili standartlar davam etdirilir. Ekspertin sözlərinə görə, hələ torpaqlarımız işğalda olduğu dövrlərdə o ərazilərə missiya göndərmək üçün qurum xüsusi cəhdlər etməli və dağıntının, vandalizm aktlarının qarşısını almaq üçün qabaqlayıcı tədbirlər görməli idi, amma o bunu etməyib: “Əslində, UNESCO bitərəf mövqe sərgiləməlidir, çünki bu onun mandatının, statusunun, fəaliyyətinin əsas ana xəttini təşkil edir. UNESCO mədəniyyətlə, mədəni abidələri qorumaqla, elm və təhsillə bağlı bir beynəlxalq təşkilat olaraq hər hansı bir siyasi platformadan çıxış etməməli, o, faşist Ermənistanı, erməni vandalizmini, vəhşiliyini, erməni toplumunun saxtakarlığını dəstəkləməkdən imtina etməli, Azərbaycanın ədalətli mövqeyini dəstəkləməli və təqdim etdiyi faktlara, təkzibolunmaz dəlillərə xüsusi diqqət göstərməlidir. UNESCO-nun Azərbaycanın təqdim etdiyi faktları araşdırması, incələməsi və bununla bağlı öz mövqeyini ifadə etməsi lazımdır. UNESCO Ermənistan təşkilatı deyil, onun ermənipərəst mövqedən çıxış etməsi obyektivliyini, tərəfsizliyini, statusunu, gələcək fəaliyyətini çox böyük şübhə altına alır. Tək bir faktı qeyd etmək yerinə düşər, bunu H.Hacıyev də UNESCO təmsilçisinin diqqətinə çatdırıb. Heydər Əliyev Fondunun Azərbaycanda və Azərbaycandan kənarda heç bir ayrıseçkilik etmədən bütün dinlərə, mədəniyyətlərə aid mədəniyyət abidələrinin qorunması, bərpa edilməsi istiqamətindəki fəaliyyətini xatırlatmaq kifayətdir ki, Azərbaycanın bəşəri mədəniyyət, mədəni dəyərlərlə bağlı məsələlərə nə qədər həssas yanaşdığını sübut edə bilək”.
M.Göyüşlü hesab edir ki, bir müddət əvvəl UNESCO özü azad edilmiş ərazilərimizə missiya göndərməyə can atırdı, məqsəd də xristian abidələrinin taleyini araşdırmaq idi. Azərbaycanda xristian abidələri ilə bağlı heç bir təhlükə yaşanmadığını deyən M.Göyüşlü vurğuladı ki, vaxtilə işğalda olan ərazilərimizdəki xristian abidələri məhz erməni vandalları tərəfindən dağıdılıb, məhv edilib və qarət olunub. Onun fikrincə, fakt qarşısında qalan UNESCO Azərbaycanın azad olunmuş ərazilərinə gec-tez missiya göndərməyə məcbur olacaq: “Fikrimcə, UNESCO Azərbaycanla bu sahədə əməkdaşlığını daha da genişləndirməkdə maraqlıdırsa, azad olunmuş ərazilərimizə missiya göndərəcək və göndərməlidir də. UNESCO bu sahədə obyektivliyini artırmasa, tərəfsizliyini bərpa etməsə və erməni vandalizminin yerində araşdırılması üçün Azərbaycana xüsusi missiya göndərməsə, ədalətli mövqe sərgiləməsə, onun gələcək fəaliyyəti, obyektivliyi böyük şübhə altına düşəcək və düşməlidir də. Hesab edirəm ki, Azərbaycan bu istiqamətdə fəaliyyətini davam edəcək və ədalətli mövqeyinin bütün beynəlxalq aləm tərəfindən qəbul edilməsinə nail olmalıdır. Dövlətimiz BMT-yə, digər beynəlxalq təşkilatlara və aparıcı dövlətlərə UNESCO-nun qərəzli mövqeyini çatdırmalıdır ki, bu təşkilat qərəzli mövqeyindən əl çəksin” - deyə M.Göyüşlü vurğuladı.
İradə SARIYEVA
