Azərbaycanda son 15-20 ildə bir neçə general törətdikləri cinayət əməllərinə və vətənə, dövlətə xəyanətə görə cəzalandırılıb, həbs edilib.
General-leytenant, Milli Qəhrəman Rövşən Əkbərovun həbs edilməsi olduqca aktual bir məsələni gündəmə gətirib. Qeyd etdiyimiz kimi, ayrı-ayrı dövrlərdə müxtəlif cinayət əməllərində adı çəkilən, ittiham edilən, həbsə atılan generallar olub. Onlardan hazırda Moskvaya sığınan Vaqif Hüseynovun, sabiq Baş Qərargah rəisi Nəcməddin Sadıqovun, bir müddət əvvəl həbsdən buraxılan Akif Çovdarovun, Naxçıvan Muxtar Respublikasının sabiq daxili işlər naziri Əhməd Əhmədovun, sabiq milli təhlükəsizlik naziri Eldar Mahmudovun və başqalarının adlarını çəkə bilərik.
Hüquq-mühafizə orqanlarında çalışan bəzi generallar törətdikləri cinayət əməllərinə görə həbs edildilər, bəziləri qaçıb mühacirətə getdilər, başqa ölkələrə sığındılar. Adları cinayətlərdə hallandırılan, buna görə cəzalandırılan həmin şəxslər hələ də general rütbəsini öz üzərində daşımaqda, general təqaüdləri almaqda, generallara aid bütün imtiyazlardan istifadə etməkdə davam edirlər. General rütbəsi yəni bu qədər ucuzdur ki, cinayət törətmiş, yaxud vətənə xəyanət etmiş şəxslər bunu daşısınlar? Niyə onlar general rütbəsi daşımalı, general təqaüdü almalıdırlar?
Ekspertlər hesab edirlər ki, cinayət törədən, lakin general rütbəsini əlində saxlayan şəxslərdən məhkəmə yolu ilə həm o rütbənin alınması mümkündür, həm də onlar təqaüddən məhrum edilə bilərlər. Bu gün ölkəyə xəyanət edən və öz toxunulmazlıq hüququndan istifadə edərək müxtəlif cinayətlərdə adları hallandırılan, törətdiyi cinayətə görə həbs edilən şəxslərdən general rütbəsi geri alınmalıdır deyən ekspertlər qeyd edirlər ki, onların bəziləri ölkədə olsa da, xarici ölkələrə sığınıb dövlətimizə qarşı iftira yağdıranlar da var.
“General rütbəsi daşıyan və müxtəlif cinayətlərə, xəyanətlərə görə tutulan, cəzalandırılan şəxslərə verilən yüksək təqaüddə Azərbaycan xalqının sərvətinin payı var, niyə belələrinə bu sərvətdən pay düşməlidir?”
“Polisə Dəstək” İctimai Birliyinin sədri, tanınmış hüquqşünas Şəmsəddin Əliyev qeyd etdi ki, bu cür şəxslərin general rütbəsi daşıması və general təqaüdü alması düzgün deyil: “Mən məsələnin qoyuluşu ilə tamamilə razıyam. Artıq bunu sosial-ictimai rəy tələb edir. Nə üçün bu məsələni məcrasına yönəldən normativ-hüquqi akt yoxdur? Əslində, bunun olmaması bir sıra ciddi məsələlərin baş verməsinə səbəb olur. Təəssüf ki, toxunulmazlıq hüququ ondan sui-istifadə etmək istəyənlər üçün şərait yaradır. Bilirsiniz ki, biz deputatlara verilən toxunulmazlıq hüququna arxayın olaraq törətdiyi əməllərinin şahidi olmuşuq. Ümumiyyətlə, əsl hüquqi dövlətdə seçici ilə deputat, vətəndaşla general arasında fərqlər nə olmalıdır? Əvvələ hüquqi dövlətin anlamına uyğundur. Necə? Deyək, dünən general idin, Milli Qəhrəman idin, amma bu gün sənin əməlində, davranışında qəlibə sığmayan, dövlətin, xalqın iradəsinə zidd olan, içdiyin anda sədaqətsizlik nümayiş etdirən, Prezidentin etibarına, etimadına xəyanətlə müşayiət edilən hallar var. Dünən etdiklərinə görə çox sağ ol, amma bu gün buna cavab verəcəksən. “Mən generalam, mən Milli Qəhrəmanam, törətdiyim cinayətlərə görə məsuliyyətə cəlb olunmayacağam” – bu, çox yanlış yanaşmadır, belə bir şey yoxdur, kimliyindən asılı olmayaraq, hamı qanun qarşısında cavab verməlidir. Bu çox normal haldır ki, dövlətin daxili siyasətində öz əksini tapdı. Bu gün təəssüf ki, general rütbəsi daşıyan həmin şəxslər bu titula görə çox yüksək təqaüd alırlar, amma ölkənin hüdudlarından kənarda siyasi sığınacaq alıblar və dövlətin ünvanına şər-böhtan deyirlər, hətta həqarət dolu ifadələr işlədirlər. Buna qarşı da tədbir görmək lazımdır. General rütbəsi daşıyan və müxtəlif cinayətlərə, xəyanətlərə görə tutulan, cəzalandırılan şəxslərə verilən yüksək təqaüddə Azərbaycan xalqının sərvətinin payı var, niyə belələrinə bu sərvətdən pay düşməlidir? Düşünürəm ki, bəzi dövlət məmurları kağız üzərində qalan sədaqət andının kəlamlarını unudurlar, yaxud onların mahiyyətini unudurlar. İnsan o andı içəndən sonra o andın bütün mahiyyətinə, məzmununa, müqəddəsliyinə uyğun özünə bir paltar tikib geyməlidir və o, heç zaman onun əynindən çıxmamalıdır. Amma çox təəssüf ki, belə etmirlər. Dövlət birinə general mundiri, general rütbəsi verir, onun titulunu qoruyan başqa imtiyazlar verir, amma onların bəziləri əndazələrini aşırlar, ondan yalnız öz şəxsi maraqları üçün istifadə edirlər”.
Ş.Əliyevin sözlərinə görə, bəzi generalların və məmurların həbs olunması cəmiyyət, xalq və dövlət, onların ailəsi üçün ağrılı bir məsələdir, dövlət onlara bu qədər şərait yaradır, imkan verir, bəs onlar nə üçün əndazəni aşırlar?
General rütbəsi daşıyan belə şəxslərin sahib olduqları rütbələrdən və yüksək təqaüddən məhrum edilmələri üçün qanunvericilikdə hər hansı bir maddənin, ümumiyyətlə, bu yöndə hüquqi-normativ bazanın olub-olmadığına gəlincə, Ş.Əliyev “bunun üçün ayrıca qanunun qəbul edilməsinə ehtiyac yoxdur. Belə şəxslərdən general rütbələrinin alınması və onların aldıqları təqaüddən məhrum edilməsi bizim məhkəmələrin səlahiyyətlərinə aid işdir. Elə götürək Rövşən Əkbərovu, onun istintaqda bütün cinayət əməlləri sübuta yetirilərsə, məhkəmə özünün qəbul etdiyi aktla onu general rütbəsindən və digər məsələlərdən məhrum edə bilər. Eləcə də bu yolu tutan digər general rütbəsi daşıyan şəxsləri. O cümlədən də o şəxslər ki, başqa ölkələrdədir və Azərbaycana qarşı hədyanlar yağdırır, onların da bəzi imtiyazlarına məkhəmə yolu ilə xitam vermək mümkündür. Hüquqi dövlət olduğumuz üçün istəməzdim ki, bununla bağlı ayrıca qanun qəbul olunsun. Çünki bu, bizim məhkəmələrin səlahiyyətlərinə aid olan məsələdir. Məsələn, Əmək və Əhalinin Sosial Müdafiəsi Nazirliyi bununla bağlı məsələni mübahisələndirə bilər” - deyə Ş.Əliyev qeyd etdi.
İradə SARIYEVA
