“Otuz il torpaqlarımızı işğal altında saxlayan mənfur düşmən bir daşı daş üstə qoymayıb. Görün yollar nə gündədir. Bu yollar 30 il ərzində asfalt görməyib”. Bu sözləri Xocavənddə olan Azərbaycan Respubikasının Prezidenti İlham Əliyev deyib.
Prezident bildirib ki, onların bütün təbliğatı yalandır. “Bütün tarixi saxtadır. Özlərini dövlət adlandırırlar. Dırnaqarası “Artsax” dövləti. Cəhənnəmə getdi. Dövlət idisə, niyə daş daş üstə qoyulmayıb? Çünki bilirlər ki, torpaq onların torpağı deyil. Torpaq azərbaycanlıların torpağıdır. Bura işğaldan azad edilmiş Xocavənd rayonudur. Keçmiş Dağlıq Qarabağ Muxtar Vilayətinin Hadrut rayonudur” - deyə ölkə başçımız bildirib.
Prezident İlham Əliyev Qarabağda “dövlət” dedikləri oyuncaq qurumun mahiyyətini olduqca dəqiq ifadə edib. Ekspertlər hesab edirlər ki, “Artsax” deyilən o qondarma qurum çoxdan məhv olub.
“Beynəlxalq aləm görməlidir ki, onlar orada yerli sakin olsaydılar, heç zaman işğal dövründə torpaqları viran günə qoymazdılar”
“Resurs” Analitik İnformasiya Mərkəzinin rəhbəri, tanınmış politoloq Rasim Quliyev “Bakı-Xəbər”ə bildirdi ki, ölkə başçısı artıq bir neçə dəfədir uzun illər işğal altında olan və sonra müzəffər ordumuz tərəfindən işğaldan azad edilən ərazilərimizə ailəsi ilə birgə səfər edir və oradan olduqca diqqətçəkən, əhəmiyyətli, erməni vandalizmini ifşa edən bəyanatlar səsləndirir. “Ölkə başçısının işğaldan azad edilmiş ərazilərə səfər etməsinin bir neçə məqsədi var. Prezident diplomatik dili çox gözəl bilir və onun fikirlərini diplomatik dillə ifadə etmək sahəsində çox böyük məharəti var. Bu onu göstərir ki, bütün dünya ordumuz tərəfindən işğaldan azad olunan torpaqlarımızın bu 30 ildə necə istismar edilməsini, talana məruz qoyulmasını, dağıdılmasını Prezidentin dilindən eşidir. İkincisi, o torpaqlar əvvəl də bizim idi, hazırda da bizimdir və bu ərazilərə rəsmi şəxslər, xüsusən də Prezident öz ailəsi ilə səfərlər edir. Prezident o torpaqlara gedir, orada tikinti-quruculuq işləri ilə bağlı tapşırıqlar verir, o torpaqlarda gələcəkdə yenidənqurma və bərpa işləri ilə bağlı məsələləri plan üzrə ən yüksək səviyyədə nəzarətdə saxlayır. Bundan başqa, cənab Prezident həm Xocavənddə olarkən, həm də bundan əvvəlki səfərlərində dəfələrlə qeyd edib ki, Qarabağ Azərbaycan torpağıdır, burada gələcəkdə hər hansı bir xüsusi statusdan söhbət gedə bilməz. Reallıq budur ki, 28-30 il işğal altında olan ərazilərimiz ermənilər tərəfindən viran qoyulub. O torpaq həqiqətən də onların olsaydı, onlar belə etməzdilər, bilirdilər ki, Azərbaycan dövləti, xalqı, gec-tez, öz torpaqlarını işğaldan azad edəcək. Prezident bu səfərləri və səfərlər zamanı səsləndirdiyi fikirlərlə bildirir ki, hansı dövlət öz ərazisini viran qoyub talayar, baxımsız vəziyyətə salar, bu ərazilər Azərbaycanın olduğu üçün ermənilər onu bu vəziyyətə salıblar. Ermənistan tərəfindən uzun illər işğal altında saxlanan Azərbaycan ərazilərində bir aborigen erməni psixologiyası, düşüncəsi, fəlsəfəsi yoxdur, ermənilər bu torpaqlarda yaddır, yerli deyillər. Beynəlxalq aləm görməlidir ki, onlar orada yerli sakin olsaydılar, heç zaman işğal dövründə torpaqları viran günə qoymazdılar, yolları dağıtmazdılar, talançılıq və düşmənçilik gözü ilə baxmazdılar”.
Ölkə başçısının, həmişə olduğu kimi, Xocavənd səfərində də erməni terrorunu, vandalizmini ifşa etdiyini deyən R.Quliyev hesab edir ki, ölkə başçısı bununla bütün dünyaya ermənilərin Qarabağ torpağına gəlmə olduğunu, onların bura yaxın əsrlərdə köçürüldüyünü bir daha çatdırıb. “Ermənilər bu 30 ildə təkcə bizim özümüzə qarşı düşmənçilik etməyib, işğal etdikləri torqaqlarımıza qarşı da düşmənçilik və talançılıq mövqeyində olublar. O torpaqlar onların dədə-baba torpaqları olsaydı, belə etməzdilər. Prezident bununla bütün dünya ictimaiyyətinə işğal dövründə separatçılar tərəfindən yaradılan oyuncaq “dövlət”in yırtıcı, separatçı mahiyyətini açdı və ermənilərin bizim torpaqları taladıqlarını bir daha ifşa etdi. Prezident qondarma “DQR”in məhv edildiyini, burada heç zaman erməni “dövləti” olmadığını, heç zaman olmayacağını və ermənilərin Qarabağın aborigen əhalisi olmadığını bütün dünyaya çatdırıb. Prezidentin də qeyd etdiyi kimi, qondarma, oyuncaq “Artsax” yoxdur. Qarabağda yaşayan ermənilər bizim vətəndaşlardır. Onlar bura son 200 ildə Çar Rusiyası tərəfindən köçürülüblər. Azərbaycan beynəlxalq aləmdə beynəlxalq subyekt kimi tanınanda Qarabağ erməniləri Azərbaycan vətəndaşları olaraq qeydiyyatdan keçiblər və onlar gələcəkdə də burada Azərbaycan vətəndaşları kimi yaşaya bilərlər. Azərbaycan öz vətəndaşlarının toxunulmazlıq hüquqlarına qarantiya verən güclü bir dövlətdir, beynəlxalq hüququn subyektidir” - deyə R.Quliyev vurğuladı.
İradə SARIYEVA
