Faşizm ideologiyasından ilhamlanaraq “njdeizm” cərəyanı yaradan ermənilər bu mənfur cərəyanın əsl faşist ideologiyasına xidmət etdiyini sübut etmək üçün ən müxtəlif cinayətlər həyata keçirirlər. Ermənistan bir dövlət olaraq artıq “njdeizmi” faşist ideologiyası olaraq təbliğ edir, orta və ali məktəblərdə, uşaq bağçalarında tədris proqramına salır.
Ermənistanın faşizm ideologiyasını “njdeizm” adı altında təbliğ etdiyini, dövlət siyasətinə çevirdiyini Azərbaycan tərəf yazanda, ən yüksək tribunalardan səsləndirəndə bəziləri bunu görməzdən gəlirdi, eşitməzliyə vururdular.
Amma bu gün artıq dünya mediasında Ermənistanın tutduğu bu mənfur dəst-xəttə qarşı hücumlar başladığının şahidi oluruq.
ABŞ-da fəaliyyət göstərən nüfuzlu “Jewish Press” informasiya agentliyində dərc edilən məqalədə “Faşist ideologiyası “njdeizm” adı altında Ermənistanın təhsil müəssisələrinin proqramına daxil edilib” fikirləri əks olunub. Artıq dünyanın nüfuzlu media orqanları Ermənistanda baş verənlərə laqeyd yanaşmırlar.
“Jewish Press” informasiya agentliyi israilli siyasi analitik Rahel Avraamın “Ermənistanda baş verən son dəyişikliklərə baxmayaraq, ölkədə faşizm və antisemitizm hökm sürür” sərlövhəli məqaləsini yayıb.
Müəllif yazır ki, martın əvvəlində İsrailin “HaYom” qəzetində dərc olunmuş bir məqaləsində amerikalı jurnalist Patrik Lankasterin Ermənistanın paytaxtı İrəvan şəhərinin Respublika meydanında millətçi bir təşkilatı təmsil edən erməni ilə ünsiyyətdə olması və həmin erməninin öz antisemitizm fikirlərini onunla bölüşməsi barədə məlumat verib. Ermənistan vətəndaşı sosial şəbəkələrdə paylaşılmış həmin səs yazısında svastikanın Hind-Avropa ari xalqlarının simvolu olduğunu, Hitlerin yəhudiləri təhrikçiliklə məşğul olduqları və təhlükəli millət hesab etdiyi üçün öldürdüyünü bildirib...
Qeyd edək ki, israilli ekspert, Bakı Beynəlxalq Multikulturalizm Mərkəzinin İsraildəki nümayəndəliyinin rəhbəri Arye Qut “Jewish Press” informasiya agentliyinə müsahibəsində bildirib ki, antisemitizmin və neonasizmin populyarlaşdırılmasının Ermənistanın dövlət siyasətinin ayrılmaz hissəsinə çevrildiyini və faşist ideologiyasının “njdeizm” adı altında Ermənistanın təhsil müəssisələrinin proqramına daxil edildiyini vurğulayıb.
“Ermənistanın faşizmi açıq şəkildə dövlət siyasətinə çevirməsi xarici mütəxəssislər, mətbuat tərəfindən ciddi tənqid edilir”
AMEA-nın Qafqazşünaslıq İnstitutunun ermənişünaslıq şöbəsinin kiçik elmi işçisi Aynur Əzimzadə “Bakı-Xəbər”ə bildirdi ki, Ermənistanda son 30 ildə faşizm ideologiyasının təbliğinə geniş yer verilir, son dövrlər isə bu özünü daha iyrənc formada büruzə verməyə başlayıb. A.Əzimzadənin sözlərinə görə, Ermənistanın yürütdüyü dövlət siyasətinin mahiyyətini faşizm ideologiyasının təşkil etdiyini və buna “njdeizm” adı verildiyini bütün dünya bilir. A.Əzimzadə qeyd etdi ki, bir neçə il bundan əvvəl beynəlxalq təşkilatlardan birinin hazırladığı hesabatda Ermənistanda faşizmin “njdeizm” adı ilə orta və ali məktəblərdə, bağçalarda tədris edildiyi üzə çıxarılmışdı, sonra hansısa səbəbdən həmin hesabat yoxa çıxarılıb. “Bilirsiniz ki, “njdeizm” özü qondarma bir cərəyandır, ermənilər faşizm ideologiyasını bu ad altında təbliğ edirlər. Əslində, ermənilərin “qəhrəmanlaşdırdığı” Njde və Dro kimi adamlar ideologiya yaradacaq gücdə, potensialda adamlar olmayıblar, onlar, sadəcə, faşizm qulu olublar, faşistlərin əlaltısı olaraq onların əl buyruqçusu rolunu oynayıblar. Bu gün Ermənistanda faşizm ideologiyasını “njdeizm” adı ilə təbliğ etməklə Njdeni “ideoloq” olaraq qələmə vermək istəyirlər, amma bilindiyi kimi, “njdeizm” elə faşizmdir. Uzun illərdir ki, Ermənistanda faşizm ideologiyası “njdeizm” adı ilə orta və ali məktəblərdə xüsusi fənn kimi keçirilir. Ermənistanda faşizmin “njdeizm” adı altında tədris səviyyəsinə gətirilib çıxarılması, xüsusi dərslər kimi keçilməsi həqiqətən də dünya üçün təhlükəlidir. Bu ölkədə ziyanlı təzahürləri, zəhərli ideologiyaları gənclərin, uşaqların beyninə yerləşdirirlər, nəticədə dünya üçün böyük təhlükə doğuran beyni zəhərlənmiş nəsil yetişdirilir. Bir vaxtlar Azərbaycan bunu deyəndə çoxları bunda hər hansı bir “qərəz” görürdü. Amma artıq bütün dünya bilir ki, Ermənistanda faşizm hansı səviyyədədir. “Njdeizm” ideologiyasına qarşı ABŞ mediasının sərgilədiyi münasibət onu göstərir ki, artıq bütün dünya Ermənistanı faşist dövləti kimi tanıyır. Ermənistanın faşizmi açıq şəkildə dövlət siyasətinə çevirməsi xarici mütəxəssislər, mətbuat tərəfindən ciddi tənqid edilir. Heç şübhəsiz ki, beynəlxalq təşkilatlar da Ermənistanda faşizmin orta məktəblərdə tədris edilməsi faktlarına açıq münasibət bildirməlidirlər”.
A.Əzimzadə hesab edir ki, Ermənistanda cəmiyyətin şüuruna zorla oturdulan faşizm ideologiyası bu ölkənin gələcəyini təhlükə altına salır. Ermənistanın tam olaraq ifşa edildiyini deyən A.Əzimzadə hesab edir ki, gec-tez, bu ölkə etdiklərinin cəzasını çəkəcək, əkdiyi zəhərli və zərərli toxumun bəhrəsini özü yeyəcək.
İradə SARIYEVA
