“Artsax” yoxdur, yerin dibinə batıb. Bunun fərqində olmaq istəməyən separatçılar yenə də öz qanunsuz fəaliyyətlərini davam etdirməyə cəhd edirlər.
Yayılan məlumatlara görə, separatçılar Qarabağda yaşayan erməniləri silahlandırmaqla bağlı məkrli niyyətlərini ortaya qoyublar. Belə ki, yayılan məlumatlara görə, Qarabağda erməni əhalisinə silah daşımaq “hüququ” verilir. Məlumatda bildirilir ki, indiyə qədər keçmiş hərbçilərə ov tüfənginə sahib olmaq hüququ verilirdi, lakin indi daha çox insan silah daşıya biləcək.
Ekspertlər qeyd edirlər ki, bu, Qarabağdakı separatçı-terrorçuların əhalini “özünümüdafiə” adı altında Azərbaycana qarşı silahlandırması deməkdir.
Separatçılar əhaliyə guya “özünü müdafiə etmək” üçün silah daşımağa “icazə verirlər”.
Məsələ burasındadır ki, bütün bu proseslərə hazırlıq bölgəyə nəzarət edən Rusiya sülhməramlılarının gözləri qarşısında baş verir. Rus sülhməramlıları hər addımbaşı erməniləri qoruyur, onları müdafiə edir, Azərbaycan dövləti isə heç vaxt öz mülkü, sadə vətəndaşlarına silah qaldırmaz. Bu halda separatçı-terrorçular erməniləri niyə silahlandırmaq istəyirlər, rus sülhməramlıları niyə bu addımlara reaksiya vermirlər?
Ekspertlər deyirlər ki, Qarabağda yaşayan ermənilərə silah gəzdirməyə icazə verilməsi, onların silahlandırılması ilə bağlı xəbərlərin yayılması, əslində, Rusiya sülhməramlılarının fəaliyyətini qaralamağa xidmət edir. Onlar əhaliyə silahdaşıma “hüququ” verməklə rus sülhməramlılarını saymadıqlarını, onların burada formal olduqları haqda rəy yaratmaq istəyirlər. Separatçıların niyyətlərinin məlum olduğunu deyən ekspertlər hesab edirlər ki, erməni əhalinin terrorçu-separatçılar tərəfindən silahlandırılması rus sülhməramlılarının məsələyə gec-tez sərt şəkildə müdaxiləsi ilə nəticələnə bilər, çünki sülhməramlıların iş prinsipindən biri də əhalidən qanunsuz silahları yığmaqdır, erməni əhalisi kütləvi olaraq açıq şəkildə silahlanarsa, bu işə sülhməramlılar müdaxilə edəcəklər.
“Burada iki məqsəd var...”
Tanınmış siyasi icmalçı Asif Nərimanlı “Bakı-Xəbər”ə şərhində bildirdi ki, son günlər separatçıların mediası və Ermənistan mətbuatı Qarabağın erməni əhalisinin “özünümüdafiə məqsədilə” silahlandırılması haqda yazırlar. A.Nərimanlı qeyd etdi ki, separatçılar hələ də öz məkrli niyyətlərindən əl çəkmək istəmirlər.
Onun sözlərinə görə, separatçı-terrorçular yeni bir “qanun layihəsi” irəli sürürlər və “qanun layihəsi”ndə isə əhaliyə silah gəzdirmək “hüququ verilməsi” nəzərdə tutulur. “Əvvəllər qondarma rejimin belə bir “qanun”u vardı, buna əsasən köhnə hərbçilər ov silahı daşıya bilərdilər. Hələ də separatçı və terrorçular öz aləmlərində oranı “müstəqil dövlət” kimi qələmə verirlər. İrəli sürdükləri “qanun layihəsi”ndə isə əhalinin silahlandırılmasına icazə veriləcək. Bu barədə separatçıların mediası gecə-gündüz təbliğat aparır ki, əhaliyə silah gəzdirmə “hüququ”nun verilməsi “özünümüdafiə” xarakteri daşıyır. Onlar bu məsələni təbliğ edirlər. Əslində, sülhməramlılar separatçıların bu qanunsuz davranışlarına göz yummalı deyil və silahlandırmanın qarşısını almaq üçün tədbirlər görməlidirlər. Lakin rus sülhməramlıları reaksiya vermirlər. Sülhməramlıların gözləri qarşısında baş verənlərə hansı səbəbdən reaksiya verməmələrinə gəlincə, burada iki məqsəd var: ya Rusiya tərəfi bilərəkdən separatçıların bu hərəkətlərinə göz yumur, ya da onlar hələ neytral mövqedə dayanırlar, separatçıların növbəti terrorçu addımlarına qarışmırlar. Sülhməramlıların gözləri qarşısında separatçıların erməni əhalisini silahlandırması prosesi gedir. Bu, açıq şəkildə ermənilərin silahlandırılmasıdır. Burada bir məsələ var. 10 noyabr razılaşmasından sonra həm Ermənistan tərəfi, həm də separatçılar belə bir rəy yaratmaq istəyirlər ki, guya Azərbaycan növbəti müharibəyə hazırlaşır. Bu gün, faktiki olaraq, Ermənistanın informasiya cəmiyyəti bütün fikirlərini bu istiqamətdə qurur və yalandan iddia edir ki, Azərbaycan Dağlıq Qarabağda növbəti müharibəyə hazırlaşır. Onlar bu dezinformasiyanı daha çox gündəmdə saxlayırlar. Burada məqsəd odur ki, Dağlıq Qarabağı “müstəqil respublika” və ATƏT-in Minsk Qrupuna üzv dövlətlərin və beynəlxalq aləmin gözündə Azərbaycanı “təcavüzkar” kimi göstərsinlər. Eyni zamanda da Ermənistan və separatçılar dünyaya göstərmək istəyirlər ki, münaqişə hələ “həll edilməyib”, Qarabağdakı əhalinin silahlandırılması da onların “özlərini müdafiə” xarakteri daşıyır.
Təsəvvür edin ki, separatçılar erməniləri silahlandırmaqla 1988-ci ildəki prosesləri yenidən təkrarlamaq niyyəti güdürlər. 1988-ci ildə də onlar əhalini bu cür silahlandırmışdılar. Bu da beynəlxalq aləmə hesablanmış bir məsələdir ki, guya Qarabağ “müstəqil dövlət”dir və burada yaşayan əhali özünü Azərbaycandan qoruyur. Bu isə absurddur. Qondarma “DQR” çoxdan məhv edilib, onun ətrafında qurulan oyunlar faydasızdır”.
A.Nərimanlı hesab edir ki, Rusiya sülhməramlıları öz funksiyalarını yerinə yetirməli və ermənilərin artıq davranışlar göstərməsinə imkan verməməlidirlər: “Rusiya sülhməramlıları gəliblərsə və bölgədə öz missiyalarını yerinə yetirməlidirlərsə, nə üçün öz funksiyalarını yerinə yetirmirlər, niyə hələ də Qarabağda terrorçu silahlılar qalıb, hansı səbəbdən onları zərərsizləşdirmir, tərksilah etmirlər? Təsəvvür edin ki, separtçı-terrorçular sülhməramlıların gözləri qarşısında əhalinin silahlandırılmasının vacibliyini qeyd edir, amma sülhməramlılar buna reaksiya vermirlər. Burada, təbii ki, Rusiyanın öz maraqları var. 10 noyabr razılaşmasından sonra bu məsələ tamamilə həll edilməli idi. Rusiyanın xüsusi maraqları var, onu yerinə yetirənə qədər separatçıların hərəkətlərinə “göz yumacaq”, silahlı birləşmələrin Qarabağdan çıxarılmasını ləngidəcək” - deyə A.Nərimanlı qeyd etdi.
İradə SARIYEVA
