Ermənistanda 44 günlük müharibədə verilən itkilərlə bağlı müzakirələr yenidən qızışır. Qarşı tərəf müxtəlif vasitələrlə itkilərin sayını gizlətməyə çalışsa da, buna nail ola bilmir. Müxtəlif ziddiyyətli məlumatlar yayılmaqdadır.
Bu arada Ermənistan parlamentinin “Mənim addımım” fraksiyasının deputatı Nazeli Baqdasaryan bəyan edib ki, müharibə itkilərinin sayı 5000-ni keçəcək. Halbuki, bir müddət əvvəl Paşinyanın müavini ölü sayının 4000-i keçməyəcəyini deyirdi və bu öz təsdiqini tapmadı. Belə ki, yanvarın 20-də baş nazirin müavini Tiqran Avinyan parlamentdə çıxışı zamanı itkilərin sayının 4000 nəfəri keçməyəcəyini deyirdi. Ancaq fevralda Ermənistan rəsmən itkilərin sayının 4005 nəfər olduğunu təsdiqlədi. İndi isə hakim fraksiyanın deputatı itkilərin 5000-ni keçəcəyindən danışır və bunu etiraf etmək məcbiriyyətində qalıb.
O baxımdan bütün bunları ekspertlər necə dəyərləndirirlər?
“Onların itkiləri nəinki 5 min, bundan da çox olacaq və əsgəri itkiləri 6 min nəfəri keçəcək”
Məsələyə münasibət bildirən politoloq Sahil İsgəndərlinin sözlərinə görə, Ermənistan tərəfi itkilərlə bağlı ziddiyyətli məlumatlar yayır: “Hətta hakimiyyət daxilində müxtəlif mənbələrin verdiyi rəqəmlər bir-birindən kəskin fərqlənir. Bütün bunlar onu göstərir ki, Ermənistanda nəinki iqtisadi-siyasi böhran, hətta sosial böhran mövcuddur. Cəmiyyətdə ciddi məlumat böhranı var. Artıq hakimiyyətin də ayrı-ayrı qanadları əlaqələndirici şəkildə fəaliyyət göstərə bilmirlər. Yaxud da bu məsələlərə spekulyativ çalar qatırlar. Onların hər biri öz maraqları çərçivəsində məlumatı yaymağa çalışır. Xüsusən də itkilərin azaldılması əsas xətt götürülür. Çünki Ermənistan Azərbaycan Ordusunun zərbələri altında darmadağın oldu. Qarşı tərəf nəinki canlı itkiləri, texnika itkisini də gizlətməyə çalışır. Qarabağın mirvarisi Şuşa şəhəri azad olunanda Ermənistan rəhbərliyinin verdiyi bəyanatlarla Paşinyanın bəyanatı təzadlı idi. Düzdür, Paşinyanın Şuşada olmaq imkanı yox idi. Ancaq məsələ ondadır ki, ordu rəhbərliyi Paşinyanı o cür məlumatlandırırdı. Bu onu göstərir ki, Ermənistan hakimiyyətində 2 nəfərin sözü bir-birilə örtüşmür. Bütün bunlar isə onu göstərir ki, Ermənistanda böhran daha da dərinləşir. Ona görə də hesab edirəm ki, Ermənistanın itkiləri nəinki 5 min, bundan da çox olacaq. Çox güman ki, onların əsgəri itkiləri 6 min nəfəri keçəcək. Çünki bir ölkədəki koordinasiya şəklində bir iş getmirsə, o zaman itkilərlə bağlı bu cür açıqlamaların tez-tez yayılması qaçılmaz olacaq. Bütün bunlar tarixən mövcud olan erməni saxtakarlığından qaynaqlanır. Ermənilər hansı saxtakarlığa desən gedəcəklər. Çünki bu onların xislətindən irəli gələn məsələdir”.
Politoloq onu da qeyd etdi ki, digər qüvvələr də hakimiyyətə gəlsə, onlar da bənzər saxtakarlıq siyasəti yürüdəcəklər.
Vidadi ORDAHALLI
