Biz artıq işğaldan azad edilmiş ərazilərin bərpasına başlamışıq. Yenidənqurma proqramı artıq həyata keçirilir. Bu sözləri Prezident İlham Əliyev İsveçin xarici işlər naziri, ATƏT-in fəaliyyətdə olan sədri xanım Ann Lindenin başçılıq etdiyi nümayəndə heyəti ilə görüşündə deyib:
“Çox iş görülməlidir, çünki işğaldan azad edilmiş ərazilərdə hər şey - şəhərlər, kəndlər, mədəni abidələr, bütün infrastruktur dağıdılıb. Həqiqətən də işlərin miqyası böyük olacaq. Tamamilə dağıdılmış ərazi 10 min kvadratkilometrdən çoxdur. Biz artıq Ermənistanla Azərbaycan arasında kommunikasiyaların açılması ilə bağlı danışıqlar prosesinə başlamışıq. Bu, noyabrın 10-da imzalanmış Bəyanatın bir hissəsidir. Danışıqların müxtəlif səviyyələrdə artıq bir neşə mərhələsi olub. Düşünürəm ki, məhz bu məsələ müharibə səhifəsini tamamilə bağlamaq və onu tarixdə qoymaq üçün başlanğıc nöqtəsi ola bilər. Çünki kommunikasiyaların açılması bütün region ölkələrinin xeyrinə olacaq, regional əməkdaşlığa yeni dinamika gətirməklə yeni imkanlar yaradacaq. Bu, bir çox başqa sahələrdə potensial əməkdaşlığa gətirib çıxara bilər. Mən artıq açıq şəkildə demişəm ki, Azərbaycan buna hazırdır. Biz öz vəzifəmizi tamamlamışıq. Əraziləri azad etmişik, BMT Təhlükəsizlik Şurasının qətnamələrini və ATƏT-in qərarlarını icra etmişik. Beləliklə, indi biz diqqəti gələcəyə cəmləşdirməliyik”.
Prezidentin ATƏT sədrinə post-Qarabağ dövrünün əsas vəzifələrini təqdim etməsini necə dəyərləndirmək olar?
Politoloq Sahil İsgəndərov “Bakı-Xəbər”ə açıqlamasında bildirdi ki, 44 günlük qələbədən sonra regionda yaratdığı geosiyasi konfiqurasiyada ölkəmizin sözü çox önəmlidir: “Məhz bizim qələbimiz nəticəsində həm də Ermənistan anlayıb ki, biz onun təcavüzkar siyasətinə açıq sinə gərən ölkəyik. Azərbaycan Prezidentinin ATƏT sədri ilə görüşdə bildirdiyi fikirlərlə dünya ictimaiyyətinin nəzərinə çatdırıb ki, Ermənistanda revanşist qüvvələrin çığallıq etmək istəyinə baxmayaraq, rəsmi İrəvan məcburdur ki, əldə olunan üçtərəfli razılaşmaya uyğun fəaliyyət göstərsin. Tərəflər arasında keçirilən görüşlərdə bu mövqeyə gəlinib ki, müharibə səhifəsi artıq bağlansın. Tərəflər arasında dialoq qurulub, yeni əməkdaşlığın başlanması istiqamətində səylər göstərilir. Cənab Prezidentin diqqət yönəltdiyi əsas məqam budur ki, Azərbaycan bütün kommunikasiyaların bərpasının tərəfdarıdır. Biz bu istiqamətdə addım atmışıq. “Laçın dəhlizi” vasitəsilə ermənilərə humanitar koridor imkanını yaratmışıq. Bu kontekstdə ermənilər “Zəngəzur dəhlizi” deyilən yolun açılması öhdəliyini öz üzərinə götürüb. Hiss olunur ki, Ermənistan müəyyən öhdəliklərdən boyun qaçırmaq istəyir. Bu mümkün olan məsələ deyil. Belə açılım Ermənistanın özünün maraqlarına da tam cavab verir”.
Politoloqun sözlərinə görə, Prezident bunları deməklə ATƏT və digər qurumların Ermənistana təsir göstərməsini şərtləndirir: “Ərazilərimizin abadlaşdırılması istiqamətində də ciddi addımlar atmağı planlayırıq. Əminik ki, biz işğaldan azad edilən bölgələrimizin vəziyyətini əvvəlkindən də qat-qat yaxşı hala gətirəcəyik. Cari ilin büdcəsində bu işlər üçün 2.2 milyard manat vəsait nəzərdə tutulub. İstisna deyil ki, Azərbaycan bu istiqmətə əlavə vəsaitlər də yönəldəcək. Biz çalışırıq ki, prosesə beynəlxalq dairələr də cəlb edilsin. Çünki bu, bərpa prosesini daha da sürətləndirə bilər. Prezident həm də Ermənistana təklif edir ki, komminukasiyalara qoşulmaqla özü üçün firavan gələcək qursun”.
Məhəmmədəli QƏRİBLİ
