Ermənilər iki əsrdən artıqdır ki, onların böyük himayəçisi rolunda çıxış edən Rusiyaya qarşı çıxmaqda davam edirlər. Anti-Rusiya dalğası, Rusiyafobiya artıq meydanlardan çıxaraq başqa fazaya keçir, daha dəqiq desək, Rusiyanın Gümrüdə yerləşən 102-ci bazasına.
Ermənilər 44 günlük müharibədə döyüş meydanına cəlb edə bilmədikləri Rusiyanın 102-ci bazasından intiqam almağa çalışırlar. Məlum olduğu kimi, maskalı naməlum şəxs Rusiyanın Ermənistanın Gümrü şəhərində yerləşən 102-ci hərbi bazasının hərbi qulluqçusuna və onun həyat yoldaşına hücum edib.
Qeyd edilir ki, hücum nəticəsində rusiyalı hərbçi və xanımı müxtəlif xəsarətlər alıblar.
Məlumata görə, Ani kvartalına elektrik enerjisinin verilməsi dayandırılıb. Həmin rayonda yaşayan 40 yaşlı Roman Romanov elektrik enerjisinin təchizatının nə vaxt bərpa olunacağını öyrənmək üçün küçəyə çıxıb. Bir qədər sonra onun həyat yoldaşı Siruş səs eşidərək evdən çıxıb. Bu zaman o, ərinin maskalı şəxslə dalaşdığını görüb. Qadın qışqıraraq qonşuları köməyə çağırıb. Belə olduqda maskalı şəxs ona da bıçaqla hücum edib. Ər və arvad hadisə yerinə gəlmiş polisə xəsarət aldıqlarını bildiriblər.
Saytların məlumatına görə, zərərçəkənlərdən biri R.Romanov Rusiya Federasiyasının Gümrüdəki 102-ci hərbi bazasında xidmət keçir.
Ermənistanın İstintaq Komitəsinin Şirak əyaləti üzrə İstintaq İdarəsində hücum cəhdi faktı üzrə cinayət işi qaldırılıb. Hazırda cinayətkarın axtarışının aparıldığı deyilir.
2015-ci ildə də Rusiyanın Gümrüdəki 102-ci bazası ermənilərin qanlı hücumlarına məruz qalmışdı, hətta anti-Rusiya qüvvələri olay zamanı Rusiya prezidentini ağır söyüşlərlə təhqir etmişdilər.
“...bu kimi halların baş verməsinə xaricdən olan qüvvələr təsir edirlər”
Ermənilərin Gümrüdəki rus hərbi bazasına hücumunun səbəbini şərh edən Qarabağ Azadlıq Təşkilatının (QAT) sədri Akif Nağı bizimlə söhbətində qeyd etdi ki, hazırda ermənilərin vahid mövqeyi yoxdur. “Ermənistanın mövqeyini şərh edərkən deməliyəm ki, hazırda bu ölkə ikili mövqe tutur. Ermənilərdə Rusiyadan olan gözləntilərlə bağlı bir ümid qırıqlığı yarandı. Onlar indiyə kimi Rusiyanın dəstəyilə Azərbaycana qarşı addımlar atıb işğalçı hərəkətlər törətmişdilər, Azərbaycan torpaqlarını işğal altında saxlayırdılar. Ermənilər elə bilirdilər ki, Rusiya onları axıra qədər dəstəkləyəcək. Amma İkinci Qarabağ müharibəsi göstərdi ki, ermənilərin Rusiyaya bəslədikləri ümid əbəs imiş. Ona görə deyirəm ki, Ermənistan cəmiyyəti ikili mövqedə dayanıb və onlarda Rusiyaya qarşı bir ümidsizlik var. Ermənilər Rusiyaya ümid etməklə növbəti dəfə aldanıldıqlarını başa düşürlər, bunu həm cəmiyyət, həm dövlət rəhbərliyi, həm də siyasi partiya rəhbərləri səviyyəsində artıq dərk edirlər. Bu, məsələnin bir tərəfidir”.
A.Nağının fikrincə, məsələnin digər tərəfi odur ki, ermənilərin başqa sığınacaqları yer yoxdur, onlar Qərbə ümid edirlər, Rusiyanın əvəzinə Qərbdən yapışmaq istəyirlər, yəni Qərb onlara nə isə versin, o da görsənmir. “Rusiyaya olan qəzəb, aqressiya bu şəkildə özünü göstərir ki, gah Rusiya səfirliyi qarşısında aksiya keçirirlər, gah Rusiyanın bayrağını tapdalayıb yandırırlar, gah da 102-ci bazaya qarşı bu cür qanlı hərəkətlər, hücumlar edirlər. Rusiyanın dünyanın gözü qarşısında Ermənistanda mövcudluğu Gümrüdəki 102-ci hərbi baza ilə bağlıdır. Mənə elə gəlir ki, indən sonra Gümrüdəki rus hərbi bazasına qarşı ermənilərin bu cür qanlı hücumları daha çox olacaq. Amma Qərbdən lazımi dəstək də ala bilmirlər, ona görə də yenə Rusiyaya əl uzatmaq istəyirlər. Ermənistanda vəziyyət o qədər qarışıqdır ki, kimin nə etdiyi bilinmir. Həm Qərbə, həm Rusiyaya yenidən can atmaq, ikili mövqe göstərmək reallıqdır. Artıq Qarabağdakı quldur ermənilərlə Ermənistanın mövqeyi də fərqlənməyə başlayıb, Rusiya Ermənistandan daha çox Qarabağdakı quldur dəstələrinə, separatçılara dəstək verməyə, onların vasitəsilə regionda öz siyasətini yerinə yetirməyə çalışır. Yəni belə bir proses müşahidə olunur. Görürsünüz, Ermənistanda baş verənlərlə bağlı Rusiyanın hər hansı bir müdaxiləsi görsənmir, Xarici İşlər Nazirliyi səviyyəsində rəsmən bildiriblər ki, biz Ermənistanın daxili işlərinə qarışmırıq. Əslində, qarışırlar, daha çox nəzarətdə saxlamağa çalışırlar. Amma daha çox Qarabağda özlərinə “dayaq nöqtə”ləri yaratmaq istəyirlər.
Gümrüdə baş verən hadisələrin davamının olacağına şübhə etmirik. Bilirsiniz ki, Ermənistanda anti-Rusiya mövqeyinin güclənməsi üçün Qərbin müxtəlif dairələri də işləyirlər. Dünyada ABŞ-ın ən böyük tərkibdə səfirliyi Ermənistandadır, təxminən 2 minə yaxın əməkdaşdır, onların da, təbii ki, heç də hamısı diplomatik işlərlə məşğul deyil, ABŞ-ın maraqlarını yerinə yetirməyə çalışırlar. Amma nə üçün onlarda hərəkət olmadı? Bu da cavabını tapmayan suallardan biridir”.
A.Nağı qeyd etdi ki, son günlər ABŞ-ın dövlət katibi səviyyəsində Ermənistan rəhbərliyilə qurulan təmaslar ABŞ-ın Ermənistanla barədə müəyyən planlarının olduğuna və bu ölkə ilə bağlı mövqeyindən əl çəkmək istəmədiyinə işarədir. Bu baxımdan, baş verən hadisənin bəzi Qərb qüvvələrinin təsiri altında gerçəkləşdiyi ehtimalları da ola bilər. Bu, bir tərəfdən, Ermənistandakı anti-Rusiya mövqeyindən özünü göstərirsə, digər tərəfdən, hadisələrin sürətlənməsinə, bu kimi halların baş verməsinə xaricdən olan qüvvələr təsir edirlər. Qərbdə xüsusi mərkəzlər var ki, onlar da o prosesləri sürətləndirməyə çalışırlar. Get-gedə bu proses güclənəcək, Rusiyanın mövqeyi isə zəifləyən xətt üzrə gedir. Proseslər Rusiyanın zəiflədiyini göstərir. Bir neçə il əvvələ qədər Rusiya Ermənistanda istədiyini edirdisə, bu gün artıq Rusiyanın müəyyən məhdudiyyətləri, çətinlikləri var” - deyə A.Nağı qeyd etdi. A.Nağı hesab edir ki, ermənilərin getdikcə Rusiyanın siyasətindən narazılığı artacaq və onlar da bu aqressiyalarını çıxarmaq üçün analoji hadisələri davam etdirəcəklər.
İradə SARIYEVA
