Məlum olduğu kimi, ötən həftənin şənbə günü Azərbaycanın bir qrup media orqanı və QHT rəhbəri, blogerlər, ictimai fəallar işğaldan azad olunmuş Ağdama səfər edib. Onları Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev müşayiət edib.
Nümayəndə heyəti Baş Qərvənd kəndində dəmir yolu ətrafında minatəmizləmə prosesini izləyib, Ağdamda ermənilərin hərbi istehkamları, eyni zamanda, Ağdam şəhəri, o cümlədən, tarixi mədəniyyət abidələri ilə tanış olub.
Əslində, bu tərkibdə bir qrupun “ruhlar şəhəri” Ağdama getməsi, orada gördükləri dəhşətləri qələmə alaraq, çəkərək dünyaya yayması olduqca vacib bir məsələdir. Səfər iştirakçılarının düşmənin viran qoyduğu Ağdamı ziyarət etməsi erməni vandalizminin daha geniş müstəvidə ifşa edilməsi deməkdir. Əlbəttə, medianın, blogerlərin, QHT-lərin azad olunmuş ərazilərə səfərləri müsbət qarşılanmalıdır.
Amma təəssüf ki, müəyyən şəxslər sosial şəbəkələrdə və bəzi saytlarda Ağdama səfər edən nümayəndə heyətinin tərkibini qaralamağa başlayıblar. Biri yazır ki, “mənim Ağdama getməyə filankəsdən daha çox haqqım var idi, gərək mən gedəydim”, o biri “filankəsin yerinə filan adam getməliydi” yazır, başqa birisi iddia edir ki, “səfər heyətinə seçilənlərin böyük əksəriyyəti bu səfərə layiq deyildi”, bəziləri də onun sözünə qüvvət verib “ağdamlılar unuduldu” və sair deyirlər.
Erməni vandalizminin ifşa edilməsi məqsədilə təşkil edilən səfərin və səfər iştirakçılarının tərkibinin qaralanması nə dərəcədə düzgündür?
Səfər iştirakçıları deyirlər ki, Ağdama səfər edən qrupun tərkibində kifayət qədər ağdamlı jurnalist, QHT təmsilçisi olub.
“Unutmaq lazım deyil ki, səfərin məqsədi erməni vandalizminin beynəlxalq aləmə çatdırılmasına xidmət edir”
Səfərdə iştirak edənlərdən biri, əslən Ağdamdan olan, Qarabağ harayını hər zaman davamlı olaraq öz oxucu auditoriyasına çatdırmış olan “Novoye vremya” qəzetinin baş redaktoru Şakir Ağayev “Bakı-Xəbər”ə bildirdi ki, Prezident İlham Əliyevin tapşırığına əsasən, Prezident köməkçisi Hikmət Hacıyevin rəhbərliyilə məlum tərkibdə Ağdama səfər təşkil edilmişdi. “Bu səfərin mənim taleyimdə əvəzsiz bir yeri oldu, çünki 28 ildən sonra bir ağdamlı kimi öz doğma torpağıma qədəm qoydum. Bu səfərin ən böyük əhəmiyyəti onda idi ki, burada aparıcı media təşkilatlarının təmsilçiləri, blogerlər, QHT nümayəndələri Ağdama getdilər və ermənilərin Ağdamda törətdikləri dəhşətləri, vandalizm aktlarını gözlərimizlə gördük. Bu, dəhşətli bir terrordur. Bəşəriyyətə, insanlığa, təbiətə, mədəniyyətə, tarixi abidələrə və sairə qarşı törədilən cinayətlərin qanlı izlərini öz gözlərimizlə gördük. Əlbəttə, bunu görmək çox ağrılı idi, amma bizim bu reallığı görməyimiz vacib idi. Hesab edirəm ki, aparıcı KİV-in və QHT-lərin, o cümlədən də blogerlərin birgə Ağdama səfərinin təşkil edilməsi erməni vandalizminin ifşasında önəmli rol oynayır”.
Ağdam səfərində iştirak edən nümayəndə heyətinin tərkibinin bəziləri tərəfindən qaralanmasına gəlincə, Ş.Ağayev qeyd etdi ki, bundan yalnız təəssüflənir. “Bu barədə yazılanlara sosial şəbəkələrdə mən də rast gəlirəm. Yazırlar ki, kimlərsə getməyib, kimlərsə bu səfərdə təmsil olunmayıb. Əlbəttə, bir səfərdə hamını əhatə etmək mümkün deyildi. O səfərdə təmsil olunanlar arasında hökuməti sərt tənqid edənlər, hətta Hikmət Hacıyevin özünə qarşı sərt tənqidçi mövqe tutanlar da yer almışdılar. Bu, milli birlik, barışıq missiyası, səfəri idi. Təbii ki, mən də çox istəyərdim bu səfərdə daha çox adam yer alsın, ən çox da Ağdamdan olan jurnalistlər və baş redaktorlar. Hesab edirəm ki, bu səfərdə iştirak edənlərin tərkibini qaralamaq lazım deyil, əksinə, bu cür səfərlərin təşkil edilməsini təqdir etmək lazımdır. Bu cür tədbirlərin sayını çoxaltmaq, iştirak edə bilməyən adamları da ora daxil etmək vacibdir. Səfər bununla bitmir ki… Səfərlərin davamı olacaq. Biz hər şeyi tənqid atəşinə tutub qaralamağı xoşlayırıq nədənsə, amma mən bu yanaşmanı qəbul etmirəm. Səfər bununla bitmir ki, kimlərsə narahatlıq keçirsin, hələ qarşıda çox belə səfər təşkil ediləcək. Ağdamın quruculuq işləri başlayanda da belə səfərlər olacaq. Hesab edirəm ki, bu səfərlərdə daha böyük tərkibli nümayəndə heyəti iştirak edəcək. Mən bu qaralamanı və tənqidləri qəbul etmirəm. Bu ilk səfərdir, ola bilsin ki, kimsə gedə bilməyib, ona görə bunu qaralamaq düzgün deyil. Əksinə, hər kəs ölkə başçısının tapşırığına əsasən, Hikmət Hacıyevin rəhbərliyilə təşkil edilən tədbirləri qaralamaq əvəzinə, belə səfərlərin təşkil edilməsini təbliğ etməlidir. Unutmaq lazım deyil ki, səfərin məqsədi erməni vandalizminin beynəlxalq aləmə çatdırılmasına xidmət edir. İndi kimlərsə bu dəfə Ağdam səfərində olmayıblarsa, bu o demək deyil ki, onlara qarşı ayrıseçkilik edilib, belə deyil. Dediyim kimi, qarşıda hələ çox belə səfər var” - deyə Ş.Ağayev qeyd etdi
İradə SARIYEVA
