Azərbaycanın üzləşdiyi separatçılıq problemini güc yolu ilə həll etməsindən sonra indi bir sıra postsovet ölkələri də analoji addımlar atmaq niyyətindədir. Söhbət ilk olaraq Ukraynadan gedir.
Qeyd edək ki, Ukraynanın bu ilin sonunadək Donbas böhranını həll edəcəyi barədə iddialar səsləndirilir. ABŞ-ın bu fonda Ukraynaya yardımının artması da təsadüf sayılmır. ABŞ dövlət katibi Entoni Blinken yaranmış vəziyyətdə bildirib ki, Vaşinqton Ukraynaya təhlükəsizlik, iqtisadiyyat, demokratik təsisatların gücləndirilməsi və korrupsiyaya qarşı mübarizə sahələrində dəstəyi artırmaq niyyətindədir: "Biz Ukraynanı qətiyyətlə dəstəkləyirik, bu dəstəyi həm təhlükəsizlikdə, həm iqtisadiyyatda, həm də ölkədə demokratiyanın gücləndirilməsinə yönəlmiş səyləri baxımından artırmaq niyyətindəyik”. ABŞ diplomatiyasının rəhbəri ölkəsinin Donbasdakı təcavüzə qarşı olduğunu da söyləyib. Rusiyalı hərbi ekspert İqor Korotçenko isə bildirir ki, Ukrayna Qarabağdakı hərbi əməliyyatları olduqca diqqətlə öyrənir: “Ukrayna Baş Qərargahı xüsusilə zərbə dronlarının uğurlu təcrübəsi ilə maraqlanır”. Ekspert Ukrayna ilə Türkiyənin təmaslarının intensivləşməsini təsadüfi hesab etməyib:“Ukrayna Türkiyədən “Bayraktar” pilotsuz təyyarələrini almaq və bunların ölkədə istehsalını həyata keçirmək istəyir. PUA operatoru üzrə təhsil alan ukraynalı hərbçilər yeni Donbas müharibəsinin olacağı təqdirdə “Bayraktar”dan aktiv istifadə edəcəklər. Belə əməliyyat mümkündür”. Hazırda Ukrayna ordusunun Donbass separatçılarına hücuma hazırlaşdığı barədə xəbərlər səngimir. Bu fonda Ukrayna ordusunun təmas xəttinə çoxlu sayda hərbi qüvvə və texnika cəmləşdirdiyinə dair sosial şəbəkələrdə son günlər görüntülər yayılmaqdadır. Donetsk və Luqansk separatçıları Ukrayna ordusunun Azərbaycan ordusunun Qarabağda tətbiq etdiyi döyüş taktikasından istifadə edərək sürətli hücum əməliyyatlarına hazırlaşdığını deyirlər. Rusiyada da bu xəbərlərdən narahatdırlar və Ukrayna ordusunun hücumunu gözləməkdədirlər. Rusiya Dövlət Dumasının müdafiə komitəsinin sədr müavini Aleksandr Şerin bildirib ki, Moskva qabaqlayıcı addımlar atmalıdır: “Ukrayna qoşunlarının Donbasa hücumu zamanı situasiya çox sürətlə inkişaf edə bilər. Ola bilsin, Kiyev Dağlıq Qarabağ ssenarisini təkrar etmək istəyir. Əgər tammiqyaslı hərbi qarşıdurma başlasa döyüş əməliyyatlarını dayandırmaq çətin olacaq. Qoşunlar hər tərəfdən hücum edəcək. İş o yerə gəlib çata bilər ki, Rostov sərhədlərində Amerika hərbçiləri də peyda ola bilər”. Dövlət Dumasının üzvü bildirib ki, belə vəziyyətdə Donetsk və Luqansk qabaqlayıcı addım ataraq hücuma keçməlidir: “Rusiya bu “respublikaları” tanımalıdır. Mənə aydın deyil ki, Rusiya nəyə görə bu respublikaları rəsmən tanımır. Bir çoxları deyir ki, bu halda Rusiyaya pis yanaşacaqlar. Onsuz da indi beynəlxalq arenada situasiya Rusiya üçün yaxşı deyil”.
Bir daha vurğulayaq ki, Azərbaycan ordusunun 44 günlük müharibədə qazandığı qələbədən sonra Ukraynanın şərqindəki rusiyameylli separatçıların da ciddi təşvişə düşdüyü məlumdur. Ukraynada təmas xətti boyu ağır silahların və tankların da tətbiqi ilə tez-tez atışmalar qeydə alınması isə müharibə ehtimalının qaçılmaz olduğunu göstərir. Hərbi ekspert Aleksey Leonkov hesab edir ki, Ukrayna Silahlı Qüvvələri hücuma ciddi hazırlaşıb və Donbas separatçılarının müqavimət göstərmək imkanı olmayacaq. Ekspert bildirib ki, Ukrayna ordusunun hücum potensialı yüksək səviyyədədir. Çünki son illərdə ABŞ və NATO-nun rəhbərliyi altında ciddi hazırlıq keçib. Vaşinqton Ukrayna ordusunun 4 briqadasının təlim-döyüş hazırlığına və təchizatına 250 milyon dollar sərf edib, ordu döyüş pilotsuz təyyarələri ilə silahlanıb. Qarabağ müharibəsində özünün saxta xəbərləri ilə ad çıxaran “WarGonzo” telegram-kanalının aparıcısı Semyon Peqov isə iddia edir ki, Ukrayna ordusunun hücumu iki istiqamətdən başlayacaq. Bunlar Qorlovka və Novoazovsk istiqamətləridir. O bildirir ki, birinci istiqamətdən irəliləyən Ukrayna qüvvələri Luqansk və Donetsk arasında strateji əhəmiyyətli yolu kəsəcəklər, ikinci istiqamətdən isə maksimal tezliklə Rusiya ilə dövlət sərhədinə çıxacaqlar. “Luqansk xalq respublikası”ından olan siyasətçi Rodion Miroşnik isə qeyd edir ki, Luqansk və Donetsk yeni hərbi eskalasiyada Rusiyanın köməyinə müraciət etməli olacaqlar. Çünki onların Ukrayna ordusuna qarşı dayanmaq gücü yoxdur. Separatçıların nümayəndəsi qeyd edib ki, Ukrayna ordusunun şəxsi heyəti rəsmən 240 mindir, amma nazir Arsen Avakovun sərəncamında 340 minə qədər qüvvə var və beləliklə, Donbasa 600 minlik qüvvə hücuma keçəcək. Ona görə də “Donetsk və Luqansk xalq respublikaları” hökmən Rusiyanın köməyinə müraciət edəcəklər. Rusiyalı hərbi analitik Yuri Kotyonok isə vurğulayır ki, Moskva Donetsk və Luqanskdakı separatçı qurumlara hərbi yardım göstərəcək və Birləşmiş Hərbi Əməlliyyatlar zonasından kənarda olan obyektlərə də zərbələr endirəcək: “Sirr deyil, Rusiya “respublikalara” hərbi yardım göstərəcək. Bu yardımın miqyası düşmənin hərəkətlərinin yaratdığı təhdidlərlə mütənasib olacaq. Ukrayna ordusunun hücum bölmələri vurulacaq, əlavə qüvvələrin gəlməsinin, sursat tədarükünün qarşısı alınacaq”.
Nahid SALAYEV
