Baş Qərargah rəisi Onik Qasparyanın vəzifəsindən azad edilməsi məsələsi baş nazirin səlahiyyətindədir. Erməni mediasının verdiyi məlumata görə, bu fikirlər Ermənistan Prezident Administrasiyası tərəfindən Vəkillər Palatasının müraciətinə rəsmi yazılı cavabda yer alıb.
Bu barədə Vəkillər Palatasının rəhbəri Ara Zohrabyan “Facebook” səhifəsində yazıb. “Onik Qasparyanın vəzifəsindən azad edilməsi məsələsi həm qanuni prosedurlar, həm də konstitusiya məsuliyyəti və siyasi nəticələr baxımından baş nazirin səlahiyyətinə aiddir” – deyə administrasiyanın rəsmi cavabında qeyd edilib. Eyni zamanda xatırlanır ki, Ermənistan prezidenti Armen Sarkisyanın Baş Qərargah rəisi Onik Qasparyanın vəzifəsindən azad edilməsi barədə fərmanı imzalamayıb və Konstitusiya Məhkəməsinə müraciət edib. Bu müraciət də 2018-ci ildə qəbul edilən “Hərbi xidmət və hərbi qulluqçuların statusu haqqında” qanuna edilmiş dəyişikliklərin konstitusiyaya uyğun olub-olmaması ilə bağlıdır.
Bu gün isə məlumat yayılıb ki, Ermənistan Silahlı Qüvvələrinin Baş Qərargah rəisi Onik Qasparyan vəzifəsindən azad edilib.
Bu barədə baş nazir Nikol Paşinyan bildirib. O deyib ki, Qasparyan Ermənistan Silahlı Qüvvələri Baş Qərargahının rəisi vəzifəsindən azad edilmiş hesab olunur. Paşinyanın hökumət saytında dərc edilmiş bəyanatında qeyd edilir ki, Baş Qərargah rəisi Onik Qasparyan 10 martdan bəri tutduğu vəzifədən azad edilmiş sayılır, çünki ölkə prezidenti bu mövzuda baş nazir tərəfindən təqdim olunan fərman layihəsini imzalamayıb və qanunla müəyyən edilmiş müddətdə Konstitusiya Məhkəməsinə müraciət etməyib. Bəyanatda vurğulanıb ki, “Hərbi xidmət və hərbi qulluqçuların statusu haqqında” Qanunun müddəalarını rəhbər tutaraq, 2021-ci il fevralın 25-də prezidentə Silahlı Qüvvələrin Baş Qərargah rəisinin vəzifəsindən azad edilməsi barədə qərar layihəsi təqdim edilib.
27 fevralda baş nazirlik aparatı bu layihə ilə əlaqədar prezidentdən etiraz aldı və həmin etiraz baş nazir tərəfindən qəbul edilmədi. 28 fevralda müvafiq əsaslarla prezidentə yenidən müraciət göndərildi: “Prezidentin baş nazir tərəfindən təqdim olunan layihəni imzalamaması və “Hərbi xidmət və hərbi qulluqçuların statusu haqqında” Qanuna uyğun olaraq müəyyən edilmiş müddətdə Konstitusiya Məhkəməsinə müraciət etməməsi nəzərə alınaraq, bu qanunların müvafiq maddələri ilə Silahlı Qüvvələrin Baş Qərargah rəisi Onik Qasparyan tutduğu vəzifədən azad edilmiş sayılır”.
Görünən budur ki, Paşinyan ölkənin prezidenti ilə yaşanan qarşıdurmadan qalib çıxdı. Ermənistan prezidentinin Paşinyan qarşısında məğlubiyyətini rəzil şəkildə etiraf etməsi nəyin əlaməti sayıla bilər?
Politoloq Elşən Mustafayev “Bakı-Xəbər”ə açıqlamasında bildirdi ki, Ermənistandakı daxili siyasi böhran Baş Qərargahın 25 fevralda Nikol Paşinyanın istefasını tələb etməsindən sonra daha da gərginləşdi. Baş nazir bunu ölkədə çevriliş cəhdi elan etdi və Qasparyanın vəzifəsindən azad edilməsi barədə qərarı imzaladı. Ancaq prezident Armen Sarkisyan bu sənədi imzalamadı. Proseslərin gedişi göstərdi ki, Paşinyan bu qarşıdurmada Qasparyandan daha çox ölkənin prezidentinə qalib gəldi. Beləliklə, Paşinyanın Qasparyanı göndərməklə bağlı qərarı qüvvəyə minir. Paşinyanın komandası artıq Qasparyanı Baş Qərargah rəisi hesab etmir. Prosedura görə, Qasparyanın Baş Qərargah vəzifəsində sonuncu günü – 9 mart idi Prezident Armen Sarkisyan saat 18:00-a qədər Qasparyanın vəzifəsindən çıxarılması məsələsi ilə bağlı Konstitusiya Məhkəməsinə müraciət etməsəydi, Baş nazir Paşinyanın fərmanı avtomatik qüvvəyə minmiş hesab olunurdu. Hər şey Paşinyanın istədiyi kimi oldu. Onik ilk anda kabinetdən çıxmadığı və vəzifəsində qalması üçün məhkəməyə müraciət etmək məsələsində vəkillərlə məsləhətləşdiyini dedi.
Buna paralel olaraq, erməni müxalifəti parlament binasının önündə aksiya keçirdi. Onlar Paşinyanın istefasını, erkən seçkilər keçirilməsini tələb edir, o cümlədən, ordunu hakimiyyətə qarşı praktiki addımlar atmağa çağırırlar. Erkən seçkiləri öncə hakimiyyət istəyirdi, lakin Paşinyan artıq buna ehtiyac görmür və hazırda Nikol vəziyyətin nəzarətdən çıxmaması istiqamətində addımlarını intensivləşdirib. Polis qüvvələri bütün dövlət binalarını mühasirəyə alıb. Milli Təhlükəsizlik Xidməti Qasparyanın ordunu hərəkətə keçirməsi ehtimalına qarşı tədbirlərini gücləndirib. Qasparyanın son açıqlamasından isə göründü ki, o təslim olmaq qərarını verib. Onun son açıqlaması belə olub:
“Mənim mövqeyimdə dəyişiklik yoxdur, işdən azad edilməyimlə bağlı proses Konstitusiyaya ziddir”. Yəni bu adam hərbi çevrilişə cəhd etmədi. Daha çox siyasi tələblər irəli sürməklə kifayətlənmiş oldu”.
Məhəmmədəli QƏRİBLİ
