Qadın zərif cinsin nümayəndəsi olsa da, bəşəriyyətin, cəmiyyətin hərəkətverici qüvvəsi olaraq hər zaman özünü ifadə edib. Amma bəzi hallarda bir sıra qüvvələr qadın və kişi, bir sözlə, gender bərabərliyinin qorunmadığı iddiası ilə diqqəti cəlb etmək istəyirlər, bunun üçün isə aksiyalar keçirirlər.
Azərbaycanda da müəyyən qrup var ki, onlar son iki-üç ildir 8 mart ərəfəsində meydana çıxır, icazəsiz aksiyalar keçirirlər. Bu adamlar özlərini “feminist” adlandırırlar, nəyə və kimə etiraz etdikləri tam məlum olmasa da, bu adamlar Azərbaycanda qadın hüquqlarının pozulduğunu iddia edir, qadınların “azadlıq”larının “tam təmin olunmadığını” bəyan edirlər.
Maraqlıdır, Azərbaycanda qadınların hüququ çatmayan, kişilərdən fərqli olaraq onlar üçün qadağan edilmiş nə isə varmı? Yoxdursa, onda bəziləri niyə bu qondarma tələblərlə aksiya-filan keçirirlər?
Söhbət əlbəttə, “feminist”lərin 8 mart aksiyasından gedir.
Ekspertlər qeyd edirlər ki, Azərbaycan qanunvericiliyində qadın və kişi bərabərliyi tam olaraq təsbit olunur və bizim qanunvericilikdə bu istiqamətdə hər hansı bir boşluq yoxdur.
Bir çox ekspert deyir ki, bu aksiyalar müxtəlif beynəlxalq təşkilatlardan ayrılan qrantlar sayəsində təşkil edilir, onlar “qadın azadlığı” adı altında, əslində, bəzi eybəcər Qərb dəyərlərini cəmiyyətimizə oturtmaq istəyirlər.
“Bu baxımdan, kimlərinsə ortaya çıxıb “qadınlara qarşı ayrıseçkilik varmış”, “qadın hüquqlarını tələb edirik” kimi məsələlər ətrafında hay-küy salmasının...”
Siyasi şərhçi Azər Həsrət “Bakı-Xəbər”ə bildirdi ki, ümumiyyətlə, Azərbaycanda gender əsaslı diskriminasiyanın, ayrıseçkiliyin tətbiq edilməsi ilə bağlı heç kim heç nə deyə bilməz. A.Həsrət hesab edir ki, ölkə Konstitusiyasından başlamış, digər qanunvericilik aktlarına qədər heç birində bu bərabərliyə xələl gətirən bir nüans, məqam belə yoxdur: “Birincisi, Konstitusiyadan başlamış, bütün qanunlarımız mükəmməldir. Bizim qanunlarda qadın və kişi hüquqları məsələsində heç bir ayrıseçkiliyə yol verilmir, yaxud da qanunlarımız ayrıseçkiliyə imkan tanımır. İkincisi, cəmiyyətimiz kifayət qədər savadlı, açıqgözlü, dünyagörüşlü cəmiyyətdir və burada qadının yeri, rolu müzakirə mövzusu deyil. Yəni Azərbaycanda “sən qadınsan, bu işi edə bilməzsən, bu işi etməlisən” kimi məsələlər yoxdur, bizim ölkədə kimsə belə şeylər tətbiq etmir. Dövlət siyasəti isə, ümumiyyətlə, ona yönəlib ki, Azərbaycanda diskriminasiyaya yol verilməsin, qadınlar daha fəal şəkildə cəmiyyətə inteqrasiya olunsunlar, həyatımızın hər sahəsində onlar önə çıxsınlar. Yəni dövlət qadın fəallığının daha da genişləndirilməsi üçün mümkün olan hər şeyi edir, çox zaman Avropa ölkələrindən artığını edir. Bu baxımdan, kimlərinsə ortaya çıxıb “qadınlara qarşı ayrıseçkilik varmış”, “qadın hüquqlarını tələb edirik” kimi məsələlər ətrafında hay-küy salmasının heç yeri, heç əsası yoxdur. Elə martın 8-də bu söhbətlər gedərkən mən ATƏT-in Demokratik Təsisatlar və İnsan Haqları Bürosunun toplantısında iştirak edirdim, mövzu da elə qadınlara aid idi. “Media azadlığı və gender bərabərliyi” adlı bu tədbirdə də çıxışımda bildirdim ki, Azərbaycan dövləti, qanunvericilik aktları və Azərbaycan cəmiyyəti, ümumiyyətlə, qadınlara qarşı ayrıseçkiliyi qəbul etmir, bu sahədə də narahatlığa heç bir əsas yoxdur ki, kimsə çıxıb bizi ittiham etsin”.
A.Həsrətin sözlərinə görə, ortalığa çıxıb qara-qışqırıq salıb, süni ajiotaj yaratmağa cəhd edən bir qrup şəxsin isə, çox güman ki, öz ailələrində problem var. “Belə ehtimal etmək olar ki, ortalığa düşüb qara-qışqırıq salan adamların problemi cəmiyyətdən yox, o insanların ailələrindən qaynaqlanır. Onlar ataları, qardaşları, yaxud həyat yoldaşları ilə dil tapa bilmirlər, əxlaqlarında, tərbiyələrində problem var, yəqin ki, bu baxımdan da iddia etmək istəyirlər ki, Azərbaycanda bu problem “köklü şəkildə” durur. Azərbaycan cəmiyyəti belə deyil, hanısa bir fərdi hadisə də varsa, bunu bütün cəmiyyətə şamil etmək olmaz. Dövlətə gəlincə, dövlət də o cür halları aşkar edib müəyyən addımlar atır, onların da problemləri varsa, ataları, ərləri, qardaşları tərəfindən incidilirlərsə, dövlətə müraciət etsinlər, dövlət də bununla bağlı gərəkli tədbiri görəcək” - deyə A.Həsrət qeyd etdi.
İradə SARIYEVA
