Ermənistanda hərbi-siyasi gərginlik davam edir. Erməni KİV-i xəbər verir ki, Ermənistanın Qarabağda qanunsuz xidmət aparan 124 zabiti baş nazir Nikol Paşinyanın istefasını tələb edib. Onlar Baş Qərargah rəisi Onik Qasparyana öz dəstəklərini ifadə ediblər. Bundan qəzəblənən Paşinyan həmin zabitlərin həbsi barədə göstəriş verib. Hazırda həmin 124 zabitin məsuliyyətə cəlb olunması ilə bağlı tədbirlər görülür. Bu proses hansı məntiqli sonluqla nəticələnə bilər?
Təhlükəsizlik məslələri üzrə ekspert Elşən Həsənov “Bakı-Xəbər”ə açıqlamasında bildirdi ki, bunun səbəbi Paşinyanla Baş Qərargah rəisi Onik Qasparyan arasındakı ziddiyyətlə bağlıdır: “Xronoloji olaraq xatırladım ki, N.Paşinyan siyasətə qarışan Qasparyanın vəzifəsindən kənarlaşdırılması barədə sərəncam verdi. Qasparyanı ölkə müxalifəti və Rusiyadakı erməni diasporunun rəhbərləri dəstəkləyir. Paşinyan ölkə prezidenti Armen Sarkisyana müraciət edərək Qasparyanın kənarlaşdırılması ilə bağlı sərəncamın təsdiqlənməsini istədi. A.Sarkisyan iki gün sonra bəyanat yaydı və sərəncamın Konstitusiyaya zidd olduğunu dedi. Siyasi böhran pik nöqtəsinə çatdı, ölkə müxalifətindəki partiyalar arasında 17 strukturu birləşdirən "Vətənin Xilası" Hərəkatı N.Paşiyanın təcili istefasını tələb etdi. N.Paşinyan sərəncamı təkrarən A.Sarkisyana yolladı, Təhlükəsizlik Şurasının təcili toplantısı keçirildi. Bunun ardınca Ermənistanın paytaxtında iki mitinq oldu. N.Paşinyanın tərəfdarlarının yığışdığı mitinqdə təxminən 50 min, müxalifətçilərin aksiyasında 20 min erməni vardı. Daha sonra Paşinyan onun istefasını tələb edənlərlə bağlı danışıb və deyib ki, sabiq prezident Serj Sarkisyan Baş Qərargahdakı generallara təsir edərək onları mənə qarşı çıxmağa sövq edib. Paşinyan Onik Qasparyandan Baş Qərargah rəisi postunu tərk etməsini təkidlə tələb edir.
N.Paşinyan ölkədə növbədənkənar parlament seçkilərinin keçirilə biləcəyini, habelə Ermənistanın parlament üsul-idarəsindən yarımprezident idarəetməli sistemə keçidi ilə bağlı Konstitusiyaya dəyişikliklər edilməsinin vacib olduğunu vurğulayıb”.
Ekspertin sözlərinə görə, Nikol Paşinyanın hakimiyyətdən kənarlaşdırılması ilə bağlı Ermənistan müxalifətinin aktivləşməsi hələ 2-ci Qarabağ Müharibəsi zamanı başlayıb: “ Sabiq prezidentlər Serj Sarkisyanla Robert Köçəryan əslən Qarabağdan olan ermənilərin klanının rəhbərləri kimi qisas almaq, revanşı gerçəkləşdirmək və Paşinyanı devirərək hakimiyyətə qayıtmaq üçün əllərindən gələni edirdilər. Ermənistanın müharibədə məğlubiyyəti isə "qarabağlı"lar üçün Paşinyanı devirmək baxımından çox əlverişli, rahat səbəbə çevrildi. Lakin artıq dördüncü aydır ki, Nikol Paşinyan əleyhdarlarının bütün cəhdlərinə və səylərinə, aksiyalarına və intriqalarına rəğmən hakimiyyətdədir, getməyə də hazırlaşmır. Məhz bu səbəbdən də “Qarabağ klanı” indi də Qarabağ ərazisində olan hərbçilərdən təzyiq vasitəsi kimi istifadə edir. Paşinyan çevik davranaraq, onlara cinayət işi açıb. Düşünürəm ki, Qarabağda Paşinyana qarşı qaldırılan hərbçi qiyamı da uğursuz olacaq”.
Məhəmmədəli QƏRİBLİ
