Məlum olduğu kimi, yanvarın 11-də Kremldə Rusiya Prezidenti Vladimir Putin, Azərbaycan Prezidenti İlham Əliyev və Ermənistanın baş naziri Nikol Paşinyan arasında Dağlıq Qarabağla bağlı keçirilən danışıqlar baş tutub. Dörd saatadək davam edən danışıqlardan sonra görüşün yekunu ilə bağlı hər üç lider mətbuata bəyanatla çıxış edib.
Azərbaycan və Rusiya prezidentləri görüşün nəticələrindən razı qaldıqlarını və irəliyə, inkişafa doğru addımlar atıldığını qeyd etsələr də, erməni baş nazir, həmişə olduğu kimi, yenə də “suyu bulandırmaq”da davam edib.
Paşinyan bildirib ki, Moskva görüşündə hərbi əsirlər məsələsi həll olunmayıb və bu istiqamətdə işlər davam etdiriləcək: “Təəssüf ki, bu gün hərbi əsirlər məsələsini həll edə bilmədik. Bu, ən həssas və ağrılı məsələdir. Çünki bu, humanitar bir məsələdir və bu istiqamətdə işlərin davam etdiriləcəyinə dair razılığa gəldik”.
Əlbəttə, Paşinyan “ən həssas və ağrılı məsələ” deyərkən burada 62 nəfər erməni terrorçusunu nəzərdə tutub. Qeyd edək ki, dekabr ayında postlarımıza hücum etməyə cəhd göstərən 62 nəfər silahlı erməni terrorçusu qəhrəman əsgərlərimiz tərəfindən əsir götürülüb. Onların hərbi əsir deyil, terrorçu olduğu isə bütün dünyaya məlumdur.
“...onları “hərbi əsir” kimi qələmə verir”
Qarabağ Azadlıq Təşkilatının (QAT) sədri Akif Nağı “Bakı-Xəbər”ə bildirdi ki, Moskvada baş tutan üçtərəfli görüşün nəticələri bir sıra cəhətlərinə görə təhlil olunmalıdır. “Bu adi məsələ deyil. Açıqlanmayan məsələlər də var, açıqlanan məsələlərin içində ziddiyyətli məqamlar da yox deyil. Paşinayana gəlincə, Paşinyan görüşdə hərbi əsirlərin məsələsini xüsusi olaraq qabartdı, bu onun az qala danışıqları o müstəviyə endirmək cəhdi idi. Görüş ərəfəsində də bu istiqamətdə münasibətlər bildirirdi. Görünür, Ermənistanı ən çox “narahat” edən məsələ budur. Həm bütövlükdə onların əsirləri və itkin düşənləri çoxdur, yığıb yığışdırıb Ermənistan cəmiyyətinə təqdim edə bilmirlər, qorxurlar. İndiyə qədər say da deməyiblər. Digər tərəfdən də orada terror qrupları yaradırlar, o terror qruplarını da Azərbaycan tərəfi məhv edir, yaxud ələ keçirir. Bu da Ermənistanı ciddi şəkildə narahat edir. 62 nəfər terrorçunu Azərbaycan tərəfi ələ keçirib, təbii ki, onların üzərində məhkəmə olacaq. Azərbaycan Prezidenti birmənalı şəkildə bildirdi ki, onlar hərbi əsir deyil, terrorçu qrupdur. Əlbəttə, terrorçu qrupa qarşı necə hərəkət olunursa, onlara da o cür hərəkət olunacaq. Ermənilər açıq döyüşdə, müharibə meydanında Azərbaycana qarşı heç nə edə bilmədilər. Ona görə də öz ənənəvi metodlarına, terrora əl atmağa cəhd göstərirlər. Digər məlumatlar da var ki, ermənilər Rusiya ərazisində güclü terror şəbəkəsi yaratmaq istəyirlər, bu işə külli miqdarda maliyyə vəsaiti buraxırlar. Bununla bağlı sosial şəbəkələrdə müxtəlif məlumatlar yayılır. Yəni ola bilər ki, ermənilər həm Rusiya, həm Avropa, həm də Azərbaycan ərazilərində terror hərəkətinə əl atsınlar. İndidən özləri üçün hazırlıq işləri görürlər ki, terrorçular ələ keçiriləndə və sair bununla bağlı hay-küy salıb onları “hərbi əsir” kimi qələmə versinlər.
Moskvada keçirilən üçtərəfli görüşdə aydın görsəndi ki, Azərbaycan tərəfdən ermənilərin bu cəhdinə qarşı yumşalma hiss olunmadı və Paşinyan da öz “narazılığını”, “narahatlığını” bildirdi ki, bu məsələ açıq qaldı. Demək, Azərbaycan bu məsələdə güzəştə getməyib, terrorçu ilə hərbçini fərqləndirib, terrorçular necə lazımdır, o cür də cəzalandırılmalıdırlar”.
A.Nağının qeyd etdiyinə görə, Paşinyanın əndişəsinin, suyu bulandırmaq cəhdlərinin kökündə əsas iki məsələ dayanır. “Birincisi, Ermənistanın əsirləri və itkin düşənləri çoxdur. Paşinyan bu məsələni ona görə qabardır ki, Azərbaycan kömək etsin və bu problemi həll etsin, əsirlər qaytarılsın. Bilirsiniz ki, Azərbaycanın Dövlət Təhlükəsizliyi Xidmətinin rəhbəri ilə Ermənistanın Təhlükəsizlik Xidmətinin rəhbəri son 1 həftə ərzində iki dəfə görüşüblər, hər dəfə də itkinlərlə, əsirlərlə bağlı məsələ müzakirə edilib. Bu, Ermənistan cəmiyyətini ciddi narahat edən məsələdir. Paşinyan hökuməti ölkəsində bu narazılığı aradan qaldırmaq istəyir, vəziyyətdən çıxmağa çalışır. İkincisi, Paşinyan bununla işə saldıqları terror qruplarına qarşı cəza tədbirlərinin görülməsini istəmir, ona görə də onları “hərbi əsir” kimi qələmə verir. Paşinyan “əsirlər” məsələsini qabartmaqla onu əsas məsələyə çevirmək istəyib, lakin Azərbaycan buna yol vermədi, verməməlidir də” - deyə A.Nağı vurğuladı.
İradə SARIYEVA
