Azərbaycan Respublikasının Dövlət Təhlükəsizliyi Xidməti və Müdafiə Nazirliyinin həyata keçirdiyi birgə əməliyyat nəticəsində Azərbaycan Respublikasının işğaldan azad edilmiş ərazilərində Ermənistan tərəfindən məqsədyönlü şəkildə yerləşdirilmiş 62 nəfərdən ibarət erməni terrorçu-diversant qrupu saxlanılaraq istintaqa təhvil verilib.
Bu, Azərbaycan Respublikasının Xarici İşlər Nazirliyinin (XİN) Ermənistan Respublikası Xarici İşlər Nazirliyinin 9 yanvar 2021-ci il tarixli bəyanatına cavabında əksini tapıb.
Bildirilir ki, saxlanılanların hamısı Ermənistanın Şirak vilayətindən Ermənistan silahlı qüvvələrində hərbi xidmət keçmək üçün çağırılıb və Azərbaycan ərazilərində onun Silahlı Qüvvələrinin üzvlərinə və mülki əhalisinə qarşı diversiya və terror aktları törətmək məqsədilə bu ərazilərə yeridilib:
"İstintaq zamanı müəyyən edilib ki, erməni terrorçu-diversiya qrupunun üzvləri 26 noyabr 2020-ci il tarixində, yəni Azərbaycan Respublikası və Rusiya Federasiyası prezidentləri və Ermənistan baş nazirinin imzaladığı üçtərəfli bəyanatla əldə edilmiş atəşkəsin qüvvəyə minməsindən sonra Azərbaycan ərazilərinə göndərilib.
Qeyd olunan qrup tərəfindən Azərbaycan hərbçilərinə və mülki şəxslərinə qarşı terror aktları törədilib və nəticədə Azərbaycan Silahlı Qüvvələrinin üzvləri və mülki şəxslər arasında həlak olanlar və yaralananlar olub.
Bəhs olunan diversiya qrupunun üzvləri atəşkəsin əldə edilməsindən sonrakı dövrdə diversiya-terror fəaliyyəti ilə məşğul olmaq məqsədilə Azərbaycan ərazilərinə göndərildiyi üçün bu şəxslər beynəlxalq humanitar hüquqa uyğun olaraq hərbi əsir hesab edilmir və Azərbaycan Respublikasının cinayət qanunvericiliyinə uyğun olaraq məsuliyyət daşıyırlar".
Görünən budur ki, əldə olunan atəşkəs razılaşmasından sonra belə, ermənilər diversiya fəaliyyətindən əl çəkməyib. Belə addımları atmaqla Ermənistanın əsl niyyəti nə olub?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, Ermənistan Azərbaycanda saxlanılan 62 nəfər erməni hərbçisi ilə bağlı tamamilə fərqli mövqe ortaya qoyur: “Belə ki, Ermənistan bu hərbçilərinin "hərbi əsir" olduğunu iddia edir, Azərbaycan isə bu şəxslərin istintaqa təqdim edildiyini, hərbi əsirlərlə bağlı beynəlxalq hüququn onlara tətbiq edilməyəcəyini bəyan edir. Məlum olduğu kimi, Azərbaycan Ordusu noyabrın 10-dək beynəlxalq tanınmış sərhədləri daxilində üç yüzdən çox yaşayış məntəqəsini, o cümlədən 5 rayonu, həmçinin Şuşa şəhərinə nəzarəti bərqərar etdikdən sonra Azərbaycan, Ermənistan və Rusiya rəhbərləri hərbi əməliyyatların dayandırılması barədə üçtərəfli bəyanat imzalayıb. Razılışmaya əsasən, Ağdam, Kəlbəcər və Laçın rayonları Azərbaycanın nəzarətinə qaytarılıb. Dövlət başçılarının birgə bəyanatına uyğun olaraq Dağlıq Qarabağdakı təmas xətti və Laçın dəhlizi boyunca Rusiyanın 1960 sayda hərbi qulluqçudan ibarət odlu silahlı sülhməramlı kontingenti yerləşdirilib.
Razılığa gəlinib ki, münaqişə tərəfləri tərəfindən razılaşmaların həyata keçirilməsinə nəzarətin effektivliyini artırmaq məqsədilə atəşkəsə nəzarət etmək üçün Türkiyə və Rusiya hərbçilərindən ibarət Sülhməramlı Mərkəz yaradılsın. Həmin vaxtdan dəfələrlə Ermənistanın bu razılaşmanı pozduğunu görürük. Ələ keçirilən 62 diversntla bağlı məsələ də bu qəbildəndir. Çox maraqlı təzad yaranır. Ermənistan əvvəl diversiya törədən dəstələrin onların nəzarətində olmadığını bəyan edirdi. Ancaq indi görürük ki, Ermənistan həmin diversantların müdafiəsinə qalxıb, onların hərbi əsir olduğunu bəyan edir. Bütün bunlar Ermənistanın təxribatçı niyyətlərindən əl çəkmədiyinə bariz sübutdur”.
Ekspertin sözlərinə görə, Ermənistan bununla münaqişənin qaynar ocaq kimi qalmasında maraqlı olduğunu subut edir: “Çox təəssüflə qeyd etməliyik ki, Rusiya sülhməramlılarının da bu məsələdə ciddi təqsiri var. Çünki belə halların qarşısını almaq kimi öhdəliyi məhz Rusiya öz üzərinə götürüb. Bu cür hallara son qoyulmayacağı təqdirdə, Ermənistan yenidən öz dərsini almış olacaq”.
Məhəmmədəli QƏRİBLİ
