Məlum olduğu kimi, Emənistan prezidenti Armen Sarkisyan ölkəsinin acınacaqlı vəziyyətə düşməsindən, hətta ermənilərin bir millət kimi məhv olma təhlükəsindən danışıb. O bildirib ki, 26 il bundan əvvəl onların güclü ordusu olub (?) və bu dövr ərzində Azərbaycan böyük güc sərf edib, müasir texnologiyalar tətbiq edib, Ermənistan isə arzusunu reallıq kimi qəbul edib: “Ermənistan deyir güclü ordusu var, amma reallıqda isə bu yoxdur”.
Prezident bildirib ki, Ermənistan dövlətçiliyinin uzun illər dağıdılması prosesi gedib: “Ermənistan böyük böhran içindədir. Bunun ən pisi həm də emosional-psixoloji böhrandır. Çünki təkcə Ermənistan dövlətçiliyinin deyil, erməni insanının da imicinə böyük zərbə vurulub”.
O bildirib ki, Ermənistan dizüstə çöküb və ayağa qalxmalıdır: “Ancaq necə? Hökumət istefaya getməlidir. Belə təlatümdən sonra istənilən hökumət mandat almalıdır. İndiki hökumət seçiləndə Ermənistan tam fərqli bir dövlət idi, indi isə ermənilər başqa bir dövlətdə yaşayırlar”. Sarkisyan həm də insanlara xidmət edəcək yeni konstitusiyanın qəbul edilməsinin zəruriliyini bildirib.
Maraqlıdır, Ermənistan konstitusiya islahatına gedərsə, oradakı sərsəm iddialardan da tam imtina etməyi düşünürmü? Qeyd edək ki, Ermənistan konstitusiyasında Türkiyəyə qarşı açıq ərazi iddiaları yer alır. Ermənilər, Ağrı dağı da daxil olmaqla, Türkiyənin şərq bölgələrinə iddia edirlər. Hətta Ağrı dağının şəklini öz dövlət rəmzlərinə də vurublar. Onlar aparacaqları islahatda Türkiyəyə olan açıq ərazi iddialarından əl çəkməsələr nələr olacaq?
“Heç bir halda Ermənistan Türkiyəyə ərazi iddiasından əl çəkməyəcək”
Qlobal və Regional Təhlükəsizlik Problemləri Mərkəzinin rəhbəri, politoloq Qabil Hüseynli “Bakı-Xəbər”ə açıqlamasında bildirib ki, Ermənistan prezidentinin çıxışında etiraflardan daha çox siyasi motivlər var: “Bu adam sanki hakimiyyətdə olmayan kimi danışır. Elə bil ki, 44 günlük müharibədə heç Ermənistanda olmayıb. Elə danışır ki, sanki bütün bu məsələlərdə məsuliyyət payı yoxdur. Özü deyir ki, müharibə başlayandan dərhal sonra Azərbaycanın daha müasir silahlarla üzərlərinə gəldiyini biliblər. Beləydisə, niyə bir müraciət etmirdi ki, dayandırın müharibəni? Hər halda, belə bir müraciəti etməyə səlahiyyəti vardı. Bu, Serj Sarkisyanın adamıdır. Bəli, müəyyən etiraflar var. Ancaq bu etirafların fonunda özlərinin işğalçı siyasətindən danışmır. Bunun səhvliyini ortaya qoymur. Yalnız uğursuzluqdan danışır və işğal etdikləri torpaqlar əllərindən çıxdığı üçün heyfsilənir. Demir ki, biz işğalçı idik və ölkəni indiki vəziyyətə həmin siyasət saldı. Ölkənin prezidenti ağlayır, amma səhvlərini açıq etiraf etmir. Təbiidir ki, konstitusiya islahatını öz xeyri üçün təklif edir. Heç bir halda Ermənistan Türkiyəyə ərazi iddiasından əl çəkməyəcək. Bunu hətta sərtləşdirə bilər. Onların bütün siyasəti türkə nifrət üzərində qurulub. Öz dövlət gerblərində Ağrı dağının şəklini qoyublar. Ərazi iddialarından tam əl çəkəcəklərsə, onda gərək gerbi də dəyişələr. Bu da inandırıcı görünmür”.
Ekspertin sözlərinə görə, Ermənistanın Türkiyəyə ərazi iddiası ilə çıxış etməsi absurddur: “Nə tarixi mənşələrini tanıyırlar, nə də reallıqla barışırlar. Osmanlı Türkiyəsi dönəmində onlara Şərqi Anadoluda yaşamaq üçün yer veriblər. Sonda onlar türklərə xəyanət edib və ordan qovulublar. İndi də həmin ərazilərə iddia edirlər. Belə ağlamaqla Ermənistanı düzəltmək mümkün olmayacaq. Ermənistanın sərsəm ərazi iddialarından əl çəkəcəyi inandırıcı görünmür”.
Ekspert bildirdi ki, bu yolu davam etdirmək Ermənistanı daha da məhvə sürükləyəcək.
Məhəmmədəli QƏRİBLİ
