Prezident İlham Əliyev Qubadlı şəhərində çıxışında Şuşanın işğaldan azad edilməsi əməliyyatından danışıb. Ölkə başçısı bununla bağlı bir sıra məqamlara aydınlıq gətirib.
Prezidentin sözlərinə görə, Laçın rayonunun cənubu azad ediləndən sonra düşmən həmin istiqamətdən Azərbaycanın Şuşaya hücum edəcəyini gözləyirdi: “Düşmən bizi bu tərəfdən gözləyirdi. Çünki, təbii ki, düşmən bilirdi Şuşa azad edilməmiş müharibə dayana bilməz. Düşmən hesab edirdi ki, biz Laçın rayonunun cənub hissəsini götürəndən sonra bu tərəfdən Şuşaya gedəcəyik. Biz də bilirdik ki, düşmən bizi orada gözləyir. Biz Şuşaya başqa yolla getdik, onların gözləmədiyi yoldan keçdik. Bu günə qədər də onlar inana bilmirlər ki, bizim qəhrəman əsgər və zabitlərimiz o dağlardan, dərələrdən, meşələrdən necə keçərək Şuşaya yaxınlaşıb və Şuşanı işğaldan azad ediblər. Onlar bizi buradan gözləyirdilər, eyni zamanda, Xocavənd rayonunun Qırmızıbazar qəsəbəsi istiqamətində gözləyirdilər. Biz isə Şuşaya başqa yolla getdik. Şuşaya yaxınlaşaraq bir neçə kəndi azad etdik, o cümlədən, Sığnaq, Çanaxçı və Daşaltı kəndini azad etdik”.
Onu da qeyd edək ki, ermənilərlə yanaşı, o dövrdə bir sıra ölkələrin hərbi ekspertləri də Azərbaycanın Laçın dəhlizi istiqamətindən Şuşaya hücum edəcəyini proqnozlaşdırırdılar. Ancaq Azərbaycan Ordusu çox ağıllı və peşəkarlıqla manevr edərək düşmənin xəyal belə edə bilməyəcəyi istiqamətdən Şuşaya hücum etdi, şəhər işğaldan azad olundu.
“Bununla həm düşmənin müdafiə əzmini sındırdıq, həm də onun psixoloji durumuna sarsıdıcı zərbə vurduq”
Məsələyə münasibət bildirən hərbi ekspert İbrahim Rüstəmlinin sözlərinə görə, Şuşa əməliyyatı unikal əhəmiyyət kəsb edir: “Əvvəla 44 günlük müharibənin ən böyük yaddaqalan cəhəti ondan ibarət oldu ki, əməliyyat Ali Baş Komandanın nəzarəti altında idi. İkincisi, strateji əməliyyat planına zəruri müdaxilələr tam zamanında oldu. Üçüncüsü, üstünlüyümüz o oldu ki, müharibə ərzində əməliyyat planlarını məxfi saxlaya bildik. Qələbənin əsas elementlərindən biri də əməliyyat planının məxfi saxlanması idi. Çünki düşmənin hər hansı bir əməliyyat barədə məlumatı olsa, o zamam əməliyyatı pozmaq üçün dərhal müdaxilə edə bilər. Dördüncüsü, gözlənilməz istiqamətlərdən hücum etmək bacarığıdır. Beşincisi, düşmənin gözləntilərinin özünü doğrultmaması. Bütün bunlar uğurlu Şuşa əməliyyatının timsalında özünü doğrultdu. O baxımdan Şuşa əməliyyatı da bütün bunların hamısını özündə ehtiva edən böyük bir strateji və taktiki uğur idi. Çünki düşmən Şuşaya Laçın istiqamətindən hücum gözləyirdi. Ancaq tam əksinə oldu. Bununla həm düşmənin müdafiə əzmini sındırdıq, həm də onun psixoloji durumuna sarsıdıcı zərbə vurduq”.
Hərbi ekspertin fikrincə, ordumuz inanılmaz bir uğura imza atdı.
Vidadi ORDAHALLI
