İlham Əliyev Ermənistanla postmüharibə əməkdaşlıqları barədə, ermənilər qisas və revanş haqda danışır - dünya bunu da görsün...

Elşən Mustafayev: “Yenə də düşmənçiliyi seçəcəklərsə, başları əziləcək”

img

Qarabağda elan edilən atəşkəsdən sonra Azərbaycan və Ermənistan rəhbərlərinin, siyasi elitasının yanaşmalarında tamamilə təzadlı mənzərə üzə çıxır. Məsələn, hətta Prezident İlham Əliyevin çıxışlarında Ermənistana bundan sonra normal münasibətlərin qurulması niyyəti ilə bağlı  bəzi mesajların verilməsinin şahidi oluruq.

Prezident İlham Əliyev xalqa müraciətində  də bu məsələyə toxunub. Dövlət başçısı bildirib: "Bu bizim tarixi nailiyyətimizdir. Biz Naxçıvanı həm mühasirədən çıxarırıq, eyni zamanda, yeni bir nəqliyyat damarını açırıq. Deyə bilərəm ki, bütün ölkələr buradan ancaq faydalanacaq. Azərbaycan öz ayrılmaz hissəsi olan Naxçıvanla birləşir. Azərbaycan Türkiyə ilə birləşir. Rusiya, Azərbaycan, Türkiyə, İran və əgər istəsə, Ermənistan bu dəhlizə qoşula bilər. Beləliklə, bölgədə beştərəfli yeni əməkdaşlıq platforması yaradıla bilər. Mən bu fikrimi artıq həm Rusiya, həm Türkiyə prezidentlərinə çatdırmışam. Həm Rəcəb Tayyib Ərdoğan, həm Vladimir Putin buna müsbət yanaşıblar. Bax, budur bizim təklifimiz. Biz istəyirik ki, bölgədə uzunmüddətli sülh olsun. Buna nail olmaq üçün gərək əməkdaşlıq da təhlükəsizlik tədbirləri ilə birlikdə inkişaf etsin. Biz əməkdaşlığa hazırıq. Bu doqquzuncu bənddə göstərilən məsələlərin arasında bizim üçün bir nömrəli məsələ Azərbaycanı Naxçıvan Muxtar Respublikası ilə birləşdirmək və eyni zamanda, Azərbaycanla Türkiyə arasında yeni bir nəqliyyat dəhlizi yaratmaqdır. Çünki bildiyiniz kimi, biz Bakı-Tbilisi-Qars dəmir yolunu bir neçə il bundan əvvəl istifadəyə verdik. Bu artıq Türkiyə ilə Azərbaycan arasında dəmir yolları vasitəsilə bir bağlantıdır. Bu layihə də baş versə, - əminəm ki, baş verəcək, – bu, yeni bir bağlantı olacaq və beş ölkə bundan fayda götürə bilər".

 

Ancaq  Ermənistan dəyişmək istəmir. Özlərini sivil xalq sayırlarsa və ağılları varsa bunu etməlidirlər, çünki inkişafları buna bağlıdır. Amma müşahidə edirik ki, erməni xalqı faşist ideologiyasının əsirinə çevrildiyindən, Ermənistanın bütün siyasi elitası barış barədə yox, revanş haqqında danışır.

Bu ritorikadan əl çəkilməsə, Ermənistanın gələcəyi necə olacaq?

Politoloq Elşən Mustafayev “Bakı-Xəbər”ə açıqlamasında bildirdi ki, erməniləri bu günə qoyan məhz belə şovinist yanaşmaları oldu: “Onlar uşaq vaxtından zərərli ideologiyanın daşıyıcısı kimi tərbiyə edilirlər.  Yalnız bizə qarşı düşmənçiliyi aşılamırlar. Başqa qonşularına qarşı da ərazi iddiaları irəli sürürlər. Təsəvvür edin ki, həmin ölkə qonşularının hamısına qarşı ərazi iddiası irəli sürür. Türkiyə kimi böyük ölkəyə qarşı sürülən ərazi iddiasını hətta rəsmiləşdiriblər də. Özlərinin dövlət simvollarında Ağrı dağının şəkilini veriblər. Hazırda bütün dünya tərəfindən tanınan Türkiyənin dövlət sərhədlərinə iddia edirlər. Həmin dağ Türkiyənin tarixi ərazisi sayılır. Bütün tarix boyu ərazilərdən qovulan erməni xalqı “böyük  ermənistan” kimi sərsəm ideologiyanın əsirinə çevrilib. Məhz bu zəhərlənmə onları Qarabağda da separatçılıq etməyə vadar etdi. Nəticəsini gördünüz. Ermənistan 30 il ərzində bütün regional layihələrdən təcrid vəziyyətdə qaldı. Dilənçi kökündə olan ölkədə əhali qalmayıb. Əslində bu müharibədən onlar ciddi nəticələr çıxarmalıdırlar. Onlar işğal edilmiş torpaqlardan qovulmaqla əslində yüklərini azaltmış oldular. Özünü saxlaya bilməyən ölkə bu qədər ərazini nəzarətdə saxlamağa xeyli vəsait xərcləyirdi. Görünür, hələ də nəticə çıxarmayıblar. Bütün siyasi elitaları qisas, torpaqları yenidən geri almaqdan danışır. Azərbaycan rəhbərliyi onlara regional layihələrə qoşulub adam kimi yaşamağı təklif edir. Təbiidir ki, hamısı özlərindən asılıdır. Yenə də düşmənçiliyi seçəcəklərsə, başları əziləcək. Ermənistanın normal yola qayıdıb, yaxın qonşularla mehriban yaşamaqdan başqa yolu qalmayıb”.

Müsahibimizin sözlərinə görə, bu sərt ritorika ilə danışmağı Ermənistan rəhbərliyi həm də daxili auditoriyası üçün nəzərdə tutur, əslində isə özləri də əməkdaşlıqda maraqlıdırlar.

Məhəmmədəli QƏRİBLİ

Son xəbərlər