Prezident İlham Əliyev Rusiyanın “İnterfaks” agentliyinə müsahibəsində Ermənistanın yeni şantaj üsullarından danışıb. Prezident bildirib ki, onlar özləri Dağlıq Qarabağın müstəqilliyini tanımadığı halda, istəyirlər ki, başqa ölkələr bunu etsinlər: “Vəziyyət kəskinləşəcəyi halda onların Dağlıq Qarabağın müstəqilliyini tanıyacaqları barədə daimi şantaj və hədələri yenə də küy-kələk oldu. Hərbi qarşıdurma bir aydan çoxdur ki, davam edir. Bəs nə üçün onlar indiyə qədər Dağlıq Qarabağın müstəqilliyini tanımayıblar? Bunu etmək çox asandır. Qoy bəyan etsinlər ki, onu tanıyırlar”.
Prezidentin sözlərinə görə, Ermənistanın siyasətinin bütün mahiyyəti də məhz bundadır: “Onlar onilliklər boyu həmişə cəhd ediblər, təəssüf ki, bəzən başqa ölkələrin arxasında gizlənməyə nail olublar ki, onların problemlərini onların əvəzinə başqa ölkələr həll etsinlər. Müasir erməni dövlətinin ideologiyası da, əslində, bundan ibarətdir. Bu ideologiyanın çox dərin tarixi kökləri var. Bütün tarix boyu belə olub. Son 200 ilin tarixini, Qafqazın tarixini izləsək, onların ucbatından neçə müharibə baş verməsini, onların başqa ölkələr üçün neçə təxribat yaratmasını görərik. Sonra isə kolluğa qaçaraq və kimlərinsə arxasında gizlənərək başqa xalqların qanının axıdılmasının və qarşıdurmanın bəhrələrini görürdülər".
Qafqaz regionunda tarixən erməni etnosu olmadığını bildirən Prezident İlham Əliyev deyib: "Onlar buraya necə gəlib çıxıblar - məhz belə yolla, hiyləgərliklə, məkrliliklə, necə deyərlər, ilanı başqasının əli ilə tutmaq cəhdləri ilə. Onlar indi də eyni hərəkətləri edirlər. Buradan mən onlara, necə deyərlər, cavab çağırışı edirəm - Dağlıq Qarabağı tanıyın. Bu gün tanıyın. Yeri gəlmişkən, bu barədə nisbətən yaxın vaxtlarda demişəm, qoy, bu gün tanısınlar. Lakin başqa ölkələrin bunu etməsini xahiş etmək yenə də Ermənistan rəhbərliyinin qeyri-adekvatlığından və onun siyasi savadının çox aşağı səviyyədə olmasından xəbər verir".
Göründüyü kimi, Prezident erməni təbliğat maşınının daha bir şantajını ifşa edir. Maraqlıdır, Ermənistan şantaj vasitəsinə çevirdiyi Dağlıq Qarabağın “müstəqilliyini” tanımaqda nədən ehtiyat edir və bu addımı atarsa, nəticəsi nə ola bilər?
Qarabağ Azadlıq Təşkilatının sədri Akif Nağı “Bakı-Xəbər”ə açıqlamasında bildirdi ki, bütün bu vasitələrdən Ermənistan doğrudan da uzun illərdir şantaj vasitəsi kimi istifadə edib: “Çalışıblar ki, indiyə qədər hansısa başqa bir ölkəyə bunu tanıtsınlar. Ancaq bunun məsuliyyətini dərk edən heç bir normal ölkə belə addım atmadı. Ermənistan müstəqilliyi tanıyacağını müharibədən əvvəl ara-sıra bəyan edirdi. Hərbi əməliyyatlarda dərslərini alandan sonra bunu daha tez-tez səsləndirməyə başlayıblar. Müharibəyə qədər bu mövzuda ehtiyatlı davranmalarının səbəbi vardı. Bilirdilər ki, belə bir addım atacaqları təqdirdə, beynəlxalq hüquq Azərbaycanın tərəfinə keçmiş olacaq. Bu bizim mövqeyimizi daha da möhkəmləndirərdi və Azərbaycanın hərbi əməliyyatlara başlaması üçün əlində vasitəyə çevrilərdi. Onları daha çox çəkindirən bu amil idi. Onlar çalışırdılar ki, proseslər sakit getsin, faktiki olaraq həmin dönəmdə də Dağlıq Qarabağı işğal olunmuş ərazilərlə birlikdə idarə etsinlər. Necə ki, uzun illər buna nail ola bildilər. Vəziyyətin gərginləşdiriləcəyi onları bu addımdan çəkindirirdi. Azərbaycan artıq öz müharibəsini başlayıb. Bütün beynəlxalq hüquqlara istinad edərək, biz ərazimizi uğurla işğalçılardan təmizləyirik. Bundan sonra bizim üçün Dağlıq Qarabağın Ermənistan tərəfindən tanınmasının heç bir əhəmiyyəti yoxdur. Bu səbəbdən də, Azərbaycan Prezidenti açıq şəkildə “buyursunlar, tanısınlar” mesajını verir. Azərbaycan artıq situasiyanı dəyişib. Həm ətraf rayonlar, həm də Dağlıq Qarabağın daxilində xeyli ərazini nəzarətə götürüb. Yaranmış situasiyada Ermənistan belə bir addımı atarsa, bu daha bir avantürist addım kimi dəyərləndirilər və bizim əlimizə onların başını daha da əzmək üçün əlavə şanslar verər. Başqa ölkələrdən hansısa bu addımı atarsa, bu, Azərbaycanla bütün diplomatik əlaqələrin kəsiləcəyi anlamına gələ bilər. Ölkə başçısı da bunu aydın şəkildə bəyan edib. Düşünmürəm ki, kimsə özünü belə problemə salmaq istəyər”.
Ermənistanın bu şantajının da keçərli olmadığı məlum olur. Yaxşı olar ki, Ermənistan rəhbərliyi özlərini xilas etmək üçün daha məqbul bir variant barədə düşünsün.
Məhəmmədəli QƏRİBLİ
