“Yaxşı olar ki, Qida Festivalında ayaqüstü yeməklər deyil, qədim yeməklər nümayiş olunsun”
Bakıda bir sıra festivallar keçirilir. Festivallarda ölkəyə məxsus müxtəlif növ qidalar, təamlar və meyvələr təqdim olunur. Növbəti Qida Festivalı 15 iyunda başlayacaq və 1 iyul tarixinə qədər davam edəcək.
Qeyd edək ki, “Baku Street Food Festival” və “Sweet November”in uğurundan sonra İçərişəhər Dövlət Tarix-Memarlıq Qoruğu İdarəsinin dəstəyi ilə “Meal For” Real kulinar platforması yeni layihə “Summer Food Fest” ilə qayıdır. Paytaxtımızın 20-dən çox restoran və kafesi, sevdiyiniz yeməklərdən əlavə, tədbirə uyğun xüsusi menyuları təqdim edəcək.
Məlumat üçün bildirək ki, qastronomik bayram İçərişəhərin Qoşa Qala ərazisində keçiriləcək. Hər gün saat 11:00-dan 23:00-a qədər davam edəcək festival qurmanlar üçün maraqlı proqramla təşkil olunacaq: müxtəlif viktorinalar, master klasslar, uşaqlar üçün əyləncə, atmosferə uyğun musiqi və DJ setləri.
Maraqlıdır, ölkəmizdə keçirilən Qida Festivalı Azərbaycan mətbəxinin təbliğ olunmasında necə rol oynayır?
Milli Kulinariya Assosiasiyasının prezidenti Tahir Əmiraslanov bizimlə söhbətində qeyd etdi ki, bu günə kimi ölkədə müxtəlif növ yemək festivalları keçirilib: “Yaxşı olar ki, festivalda milli yeməklər təbliğ olunsun. Həmin festivallarda “fast-food”lar deyil, qədim yeməklər nümayiş olunmalıdır. Ötən il keçirilən festivalda əsasən “fast-food”lar nümayiş olunmuşdu. Yaxşı olar ki, bu il ayaqüstü qidalar deyil, milli mətbəxə aid təamlar nümayiş olunsun. “Fast-food”larla Azərbaycan milli mətbəxini təbliğ etmək mümkün deyil”.
Həmsöhbətimiz hesab edir ki, ölkəmizdə keçirilən müxtəlif növ qida festivalları turistlərin diqqətini cəlb edir: “Bəllidir ki, istənilən ölkənin vətəndaşı hansısa ölkəyə getməzdən öncə ilk olaraq oranın mətbəxi ilə virtual tanış olur. Turistlər səyahət etdiyi ölkədə keçirilən hər hansı bir festivala qatılırlar. Keçirilən festivallar həm ölkənin təbliği, həm də turistlərin cəlb olunması baxımından vacibdir”.
Onun sözlərinə görə, festivalda turistin diqqətini cəlb etmək üçün maraqlı viktorinalar təşkil olunur. Bu oyunlar həm festivala qatılmaq istəyənlərin sayına təsir edir, həm də Azərbaycan turizminin inkişafına səbəb olur.
Günel CƏLİLOVA
