Zülfiyyə Eldarqızı: “İnanın ki, o videoçarxların altında həmin adamların hərəkətini pisləyən yüzlərlə şərh yazılır” Xəyalə Rais: “Bəs görəsən onlara ailələri, yaxınları, övladları nə deyir, necə qiymət verirlər?”
Səhnədə, efirdə olan insanlar, istər-istəməz, ictimaiyyətin diqqətində olurlar. Bu baxımdan, onlar bütün hərəkətlərinə, davranışlarına ciddi fikir verməlidirlər. İllər əvvəl sənət adamları bu məsələyə ciddi yanaşsalar da, son illər bu sahədə ciddi problemlər var. Bir vaxtlar şou müğənniləri intim görüntülərin də yer aldığı kliplər çəkdirirdilərsə, bu səhnələri klipin formatına, məzmununa uyğun etdiklərini deyirdilər.
Bu gün isə tamamilə başqa bir mənzərə yaranıb. Bir çox şou müğənniləri və bəzi teleaparıcıların müxtəlif sosial şəbəkələrdə intim videoçarxları, fotoları yayılır. Onlar özlərini çəkdirib videonu sosial şəbəkələrdə yayırlar. Təəssüf ki, bir çox halda öpüş səhnələri, eləcə də digər intim hərəkətlər bu videoçarxlarda yer alır. Buna görə nə müğənnilər, nə də bəzi aparıcılar hər hansı bir açıqlama verirlər. Bunun səbəbini də soruşduqda deyirlər ki, kim istəmir baxmasın, bu mənim həyat tərzimdir.
Sosial şəbəkələrdə ifaçıların intim videoçarxlarının yayılması onların həmkarları tərəfindən də ciddi tənqid olunur.
Əməkdar artist Lalə Məmmədova intim videoçarxları yayılan həmkarlarını qınayaraq, onları bu yoldan çəkinməyə çağırıb: “Bütün bunlar məni çox narahat edir, xüsusilə də hamının onlara baxması. O cür videoları yayan adamlar düşünməlidirlər ki, onların da şəxsi həyatı var və onları leylək gətirməyib. Sabah bu şeylər onların uşaqlarının da başına gələ bilər. Hər şeyə mənəvi nöqteyi-nəzərdən baxmaq lazımdır. Mən həmkarlarımın da intim videolarını yaymaqla məşğul olan adamları qınayıram. Biz elə zəmanədə yaşayırıq, kiminləsə danışanda da qorxursan ki, birdən səsini yazarlar”.
Sənətşünaslıq üzrə fəlsəfə doktoru, aktrisa Zülfiyyə Eldarqızı qeyd etdi ki, müğənni və aparıcıların intim videoçarxlarının sosial şəbəkələrdə yayılması olduqca mənfi haldır və o, buna olduqca çox pis baxır: “Təəssüflər olsun ki, bu mənzərə ilə hər bir sosial şəbəkə istifadəçisi rastlaşır. Hər dəfə də bu videolara ikrah hissi ilə baxırlar. Son zamanlar bu, adi hala çevrilib və kim gündəmə gəlmək istəyirsə, özünün intim videosunu sosial şəbəkələrə yükləyir. İnanın ki, o videoçarxların altında həmin adamların hərəkətini pisləyən yüzlərlə şərh yazılır. Hətta bu yaxınlarda yerli telekanallardan birində gecə yayımlanan verilişlərdən birində aparıcı özünü küçə adamı kimi aparırdı. O intim söhbətlər edir, açıq-saçıq geyimi, hərəkətləri ilə öz aləmində tamaşaçıları “ovsunlayırdı”. Bu hallar cəmiyyətdə çox pis qarşılanır. O qadınlar düşünməlidirlər ki, onlara bütün xalq baxır. Bu azmış kimi, mənfur qonşularımız da o videoçarxları öz saytlarında yayır, paylaşırlar. Mən bu videoçarxları yayanları qınayıram. Bəzi şou müğənniləri elə bilirlər ki, bu videoçarxla müsbət nələrəsə nail olurlar, əksinə, tamaşaçıların nifrətini qazanırlar. Səhnənin öz tələbi var təbii ki. Elə məsələlər var ki, onu səhnədə tamaşa naminə etmək olar, ancaq bu da açıq şəkildə olmalı deyil. Bu gün səhnədə öz yerini tuta bilməyənlər sosial şəbəkələr vasitəsilə özlərini tanıtmaq istəyirlər. Ancaq tamaşaçı onları yaxşı tərəfdən yox, pis tərəfdən tanıyır”.
Teatrşünas Xəyalə Rais də hesab edir ki, bəzi müğənni, aparıcı və aktrisaların intim videoçarxlarının yayılması mənfi haldır. Onların ucuz məşhurlaşmaq yolu tutduğunu təəssüflə qeyd edən teatrşünasın sözlərinə görə, bu adamlar ancaq tamaşaçının nifrətini qazanırlar: “Biz azərbaycanlı olduğumuzu unutmamalıyıq. Ancaq bəziləri bunu unudur və əxlaqsız hərəkətlərini çəkib camaata göstərirlər. Bir də görürsən ki, hansısa qadın müğənni kişi müğənninin qucağında oturub şəkil çəkdirir, yaxud video çəkdirir, dərhal da onu “İstagram”da yayır. Bu gün elə videolar əsasən “İstagram”da yayılır. Müğənnilər əvvəl bir-birini söyüb, qalmaqal edib gündəmə gəlirdilər, bu gün isə qalmaqal ikinci plana keçib, onlar intim videolar yayıb paylaşırlar. Özü də çılpaq, yarımçılpaq şəkildə hərəkətlər edirlər. Belələri qadın gözəlliyinə xələl gətirənlərdir. Bəs görəsən onlara ailələri, yaxınları, övladları nə deyir, necə qiymət verirlər? Bax, bu maraqlıdır. Sanki bu adamlar yiyəsiz-sahibsizdirlər”.
Aytəkin KƏRİMLİ
