Aprelin 4-də Qırğız Respublikasının Mədəniyyət, İnformasiya və Turizm Nazirliyi və Azərbaycanın bu ölkədəki Səfirliyinn birgə təşkilatçılığı ilə Qırğız Respublikasının Abdılas Maldıbayev adına Milli Akademik Opera və Balet Teatrında görkəmli Azərbaycan ədibi və mütəfəkkiri Mir Cəlalın 110 illiyi münasibətilə təntənəli yubiley gecəsi və qala-konsert keçirilib.
Teatrın direktoru, Qırğızstanın əməkdar mədəniyyət xadimi Bolotbek Osmonov tədbiri açaraq, səfirliklə sıx əməkdaşlıq şəraitində rəhbərlik etdiyi teatrda keçirilən yubileylərin iki qardaş xalqın daha da yaxınlaşmasına xidmət etdiyini qeyd edib.
Sonra çıxış edən Qırğız Respublikası Mədəniyyət, İnformasiya və Turizm nazirinin müavini Aynura Temirbekova növbəti dəfə belə böyük tədbirin Bişkekdə keçirilməsinə və son vaxtlar iki qardaş ölkənin mədəniyyət sahəsində əlaqələrinin inkişafına xidmət edən fəaliyyətinə görə Azərbaycan Respublikasının Qırğızıstan Səfirliyinə təşəkkürünü bildirib. O, Mir Cəlalın böyük yazıçı, mütəfəkkir və pedaqoq, görkəmli ədəbiyyatçı olaraq Azərbaycanda xüsusi yeri olduğu kimi, bütün türk dünyasında, eləcə də Qırğızstanda da ehtiramla dəyərləndirildiyini qeyd edib.
Növbəti çıxış edən Azərbaycan Respublikası Milli Məclisinin deputatı Cavanşir Feyziyev görkəmli alim Mir Cəlalın Azərbaycanda ədəbiyyatşünaslığın yaradıcısı olduğunu vurğulayıb. Yazıçının ədəbi janrın bütün növlərindən məharətlə istifadə edərək dövrünün aktual məsələlərinin gündəmə gətirmək bacarığından söhbət açan deputat qeyd edib ki, Çingiz Aytmatov qırğız xalqını necə hiss edirdisə, Mir Cəlal da öz əsərlərində Azərbaycan xalqının arzu və duyğularının əhatə edib, milliliyi saxlayıb və bununla yanaşı, Mir Cəlalın yaradıcılığı bütün dünyaya aiddir.
Qırğızstanın xalq şairi Mar Bayciyev çıxışında Mir Cəlalın tələbələrindən biri olması ilə fəxr etdiyini bildirib. O, ədibin dövrünün aktual məsələlərinə biganə qalmadığını, cəmiyyətdə baş verənlərin onu düşündürdüyünü göstərən əsərlərinin cəmiyyət üçün əvəzsiz olduğunu deyib. Azərbaycanın Qırğızıstandakı fövqəladə və səlahiyyətli səfiri Hidayət Orucov görkəmli Azərbaycan ədibi, alimi və mütəfəkkiri Mir Cəlalla bağlı özəl xatirələrini bölüşərək, müəllimi ilə şəxsi ünsiyyətin həyatında xüsusi yeri olduğunu vurğulayıb. Bildirib ki, Mir Cəlal böyük yazıçı, görkəmli alim, tarixin və dövrünün toxunulmamış mövzularını tədqiq etmiş mütəfəkkir, bir çox nəsillər üçün əvəzolunmaz pedaqoqdur və fəaliyyətinin hər bir sahəsində əldə etdiyi nailiyyət və tapıntılar elə yüksək səviyyədədir ki, bunlardan yalnız biri olsaydı belə, Mir Cəlal Azərbaycan tarixində əbədi olaraq görkəmli yerini alacaqdı. Səfir Mir Cəlalın ədəbi yaradıcılığı barədə fikirlərini bölüşərək, onun Azərbaycan nəsrini yeni səviyyəyə yüksəltdiyini, öz dəsti-xətti ilə rövnəqləndirdiyini deyib. Diplomat qeyd edib ki, belə miqyaslı, görkəmli fəaliyyətinə baxmayaraq, ədib özünün ən böyük əsərinin ailəsi olduğunu deyirdi və hazırda Mir Cəlalın övladları, nəvələri, nəticələri Azərbaycan elminin, mədəniyyətinin, təhsilinin, dövlət idarəçiliyinin və cəmiyyətinin fəal iştirakçılarıdır.
Səfir sonda Mir Cəlal işığına toplaşanlara minnətdarlığını bildirib.
Tədbirin ardınca keçirilən möhtəşəm qala-konsertdə dost ölkənin tanınmış sənətkarları qırğız və Azərbaycaan bəstəkarlarının əsərlərini ifa edib.
Tədbirdə Qırğız Respublikasının Hökumət üzvləri və digər rəsmilər, deputatlar, Qırğızstanda akkreditasiya olunmuş səfirliklərin və beynəlxalq təşkilatların nümayəndəliklərinin rəhbərləri və əməkdaşları, görkəmli elm, mədəniyyət, ədəbiyyat xadimləri, ictimaiyyətin tanınmış üzvləri, soydaşlarımız və KİV nümayəndələri, o cümlədən "Azərbaycan Televiziya və Radio Verilişləri" Qapalı Səhmdar Cəmiyyətinə və Azərbaycanın İctimai Televiziya və Radio Yayımları Şirkətinin Mərkəzi Asiya üzrə xüsusi müxbirləri iştirak edib.
Xəbər xidməti
