Şamil Əliyev: “Cumhuriyyətin 100 illiyi ilə bağlı filmin Bakı Media Mərkəzi tərəfindən çəkilməsi düzgün qərardır” Zülfiyyə Eldarqızı: “Cumhuriyyət tarixi haqqında film çəkilməsi xalqımızın, dövlətimizin öz tarixinə sahib çıxmasının təzahürüdür”
Milli dövlətçilik tariximizin formalaşmasında müstəsna rolu olan Azərbaycan Xalq Cumhuriyyətinin 100 yaşı tamam olur. Məlum olduğu kimi, bir müddət əvvəl Azərbaycan Respublikasının Prezidenti İlham Əliyev Xalq Cumhuriyyətinin 100 illiyinin qeyd edilməsi və 2018-ci ilin “Cumhuriyyət ili” élan olunması ilə bağlı Sərəncam imzalayıb. “Cumhuriyyət ili” çərçivəsində bir sıra layihələr həyata keçirilməyə başlayıb.
Azərbaycan Xalq Cumhuriyyətinin 100 illiyi münasibətilə görülən işlər sırasına bədii-sənədli filmin çəkilməsi də daxildir. Məlumatlara görə, Bakı Media Mərkəzi Azərbaycan Xalq Cumhuriyyətinin 100 illiyinə həsr edilən bədii-sənədli filmin çəkilişlərinə başlayıb.
Mərkəzdən mətbuata verilən məlumata görə, Heydər Əliyev Fondunun dəstəyi və “BP Azərbaycan” şirkətinin sponsorluğu ilə hazırlanan filmin baş prodüsseri Bakı Media Mərkəzinin prezidenti Arzu Əliyevadır.
Qeyd edək ki, filmin əsas məqsədi 23 aylıq şərəfli yol keçən Azərbaycan Xalq Cumhuriyyətinin keşməkeşli tarixinin son günlərinə işıq salmaq və hökumətin öz son qərarını hansı çətin şəraitdə verdiyini vurğulamaqdır.
Onu da nəzərə çatdıraq ki, ekran əsərində Cumhuriyyət qurucularının müstəqilliyimizin düşmənlərinə - istər işğalçı ordu, istərsə də bu ordunun daxili havadarlarına qarşı son anadək apardıqları qeyri-bərabər və ümidsiz, lakin dönməz və qəti mübarizə əks olunur. Bu mübarizənin sonu faciəli olsa da, onun Azərbaycanın istiqlal tarixinin şərəfli bir səhifəsi olduğu vurğulanır. Filmdə, həmçinin, Azərbaycan Xalq Cumhuriyyətinin bu şərəfli tarixinin və faciəli taleyinin Azərbaycanın yenidən müstəqilliyə qovuşmasına böyük örnək olduğu ön plana çəkilir.
Məlumatlara görə, filmin 28 May-Respublika Günü ərəfəsində geniş ictimaiyyətə təqdim olunması nəzərdə tutulub.
Yeri gəlmişkən, Bakı Media Mərkəzi Azərbaycanın audiovizual məhsulların istehsalı ilə məşğul olan aparıcı və innovativ media şirkətidir. Mərkəzin son işləri sırasında “Hədəf Bakıdır. Hitler neft uğrunda döyüşü necə uduzdu?”, “Əbədi ezamiyyət”, “Multikulturalizm ili”nə həsr olunmuş “Bir günəş altında” və digər filmlər yer alır.
Bakı Media Mərkəzi tərəfindən Cumhuriyyətin 100 illiyinə həsr edilən filmin çəkilşlərinə başlanmasını təqdir edən tanınan kinorejissor Şamil Əliyev bizimlə söhbətində bildirdi ki, filmin çəkilməsi olduqca müsbət haldır. Ş.Əliyev qeyd etdi ki, Azərbaycan dövləti hər zaman tarixi keçmişimizə, tariximizin şərəfli, işıqlı səhifələrinə böyük qayğı və diqqətlə yanaşır: “Bu, dövlətimiz üçün siyasi, ictimai, mədəni əhəmiyyəti olan bir layihədir. Bilirsiniz ki, cənab Prezident Xalq Cumhuriyyətinin 100 illiyinin qeyd edilməsi və “Cumhuriyyət ili”nin elan edilməsi ilə bağlı Sərəncam imzalayıb. Cumhuriyyətin 100 illiyinə həsr edilən filmin çəkilməsi də sərəncamın tərkib hissəsinə daxildir. Deyim ki, Cumhuriyyətin 100 illiyi ilə bağlı keçiriləcək tədbirlərin ən vaciblərindən biri məhz filmin çəkilməsidir. Düşünürəm ki, bu mövzuda filmin çəkilməsi böyük əhəmiyyətə malikdir. Mədəniyyətin digər sahələrində də Cumhuriyyətin 100 illiyi ilə bağlı maraqlı layihələr həyata keçiriləcəyinə inanıram. Cumhuriyyətlə bağlı kinematoqraflar əhəmiyyətli, vacib işlər görürlər. Bu layihə olduqca ciddi və məsuliyyətli bir layihədir. Bakı Media Mərkəzinin bu layihəni həyata keçirərək Cumhuriyyət haqqında film çəkməsi çox yerinə düşdü. Onu da deyim ki, bu layihənin həyata keçirilməsi işinə zamanında başlanıb. Bildirim ki, Cumhuriyyətin 100 illiyi ilə bağlı filmin Bakı Media Mərkəzi tərəfindən çəkilməsi düzgün qərardır. Çünki Bakı Media Mərkəzinin maddi-texniki bazası çox genişdir, orada professional Azərbaycan kinematoqrafları çalışırlar. Əminəm ki, bu filmin çəkilişləri olduqca yüksək səviyyədə həyata keçiriləcək və bu, Cumhuriyyət tarixinə böyük bir töhfə olacaq”.
Bu filmin Cumhuriyyət tarixinin, Cumhuriyyət qurucularının təbliğində əhəmiyyətli rol oynadığını deyən Ş.Əliyev hesab edir ki, hər bir tarixi filmin dövlətçilik ənənəsinin, siyasətinin təbliğində rolu böyükdür. “Bu film Azərbaycanın dövlətçilik tarixinin ən işıqlı, ən parlaq səhifələrindən bəhs edir. Biz film təqdim ediləndən sonra bütün bu işıqlı cəhətləri daha yaxından görə biləcəyik. Bilirsiniz ki, dövlətimiz bu itiqamətdə çəkilən filmlərin təbliğatına xüsusi önəm, əhəmiyyət verir. Biz sənət adamları, elm xadimləri dövlətçilik ənənələrinin təbliği ilə bağlı dəstəyimizi əsirgəməməliyik” - deyə bildirən Ş.Əliyevin fikrincə, indiyə qədər Bakı Media Mərkəzi tərəfindən çəkilən digər bədii filmlər kimi, Cumhuriyyət tarixindən bəhs edən filmin də beynəlxalq aləmdə təbliğatı həyata keçirilə bilər. O qeyd etdi ki, Mərkəz tərəfindən ekranlaşdırılan bir sıra filmlər dünya telekanallarında nümayiş olunur.
Ş.Əliyev hesab edir ki, Mərkəzin Cumhuriyyətlə bağlı çox səviyyəli bir film çəkəcəyinə inanır: “Sözsüz ki, bu film çəkildikdən sonra onun ölkəmizlə yanaşı, dünyada da təbliğatı həyata keçiriləcək. Onu da qeyd edim ki, Bakı Media Mərkəzinin istehsal etdiyi “Əli və Nino” filmində də Cumhuriyyət haqqında kadrlar var və o film Avropa Şurasında nümayiş olunub. Müşahidələr göstərir ki, Bakı Media Mərkəzi bu cür layihələri çox yüksək səviyyədə həyata keçirir”.
Sənətşünaslıq üzrə fəlsəfə doktoru, aktrisa Zülfiyyə Eldarqızının fikrincə də Cumhuriyyətin 100 illiyi ilə bağlı filmin çəkilməsi olduqca müsbət haldır. Aktrisanın sözlərinə görə, dövlətin azərbaycançılıq ideologiyasına, Cumhuriyyətin 100 illiyinə verdiyi böyük dəyərin təzahürü olaraq belə bir filmin çəkilişlərinə start verilib: “Cumhuriyyət tarixinin geniş təbliğatı olduqca vacibdir. Dövlət tərəfindən bu istiqamətdə çox böyük işlər görülür, layihələr həyata keçirilir. Müstəqil Azərbaycan dövləti Azərbaycan Xalq Cumhuriyyətinin varisidir. Dövlətimiz hər zaman bu varislik ənənəsinə sadiq qalıb. Azərbaycan Xalq Cumhuriyyətinin 100 illiyi ilə bağlı bədii-sənədli filmin çəkilməsini çox yüksək dəyərləndirirəm. Bu filmin çəkilişlərinə başlanması ictimaiyyət nümayəndələri tərəfindən yüksək qiymətləndirilir. Şanlı tariximizin səhifələrinə, bu tarixi yaradan şəxsiyyətlərin işıqlı xatirəsinə ayna tutan bu filmin gənc nəslin Cumhuriyyət ənənələrinə bağlanmasında önəmli rolu olacaq. Düşünürəm ki, Cumhuriyyət tarixi haqqında film çəkilməsi xalqımızın, dövlətimizin öz tarixinə sahib çıxmasının təzahürüdür”.
İradə SARIYEVA
