Bahadur Bilalov: “Bu festival baş tutarsa, biz həm qədim mədəniyyətimizi, həm də turizm potensialımızı təqdim edə bilərik” Ənvər Çingizoğlu: “Avropa gənclər paytaxtları və qardaşlaşmış şəhərlərin mədəniyyət festivalı” keçirilərsə, bu, bölgənin tanıdılmasında, yeni dostluq körpülərinin qurulmasında böyük əhəmiyyət daşıyar”
Bölgələrdə ənənəvi mədəniyyət tədbirlərinin, festivallarının keçirilməsi yerli sakinlər tərəfindən müsbət qarşılanır. Onlar hesab edirlər ki, rayon və şəhərlərdə keçirilən hər bir festival, mədəni tədbir yerli sakinlərə fayda verir. Bilirik ki, son illər respublikamızın regionlarında müxtəlif profilli festivallar, mədəni tədbirlər təşkil olunur. Bu tədbirlərin əhəmiyyəti bölgənin mədəniyyətinin, folklorunun, tarixinin geniş səviyyədə təbliğ edilməsi və s. baxımından çoxdur.
Gəncə Azərbaycanın qədim mədəniyyət mərkəzlərindən biri kimi bu gün də öz dəyərini, əhəmiyyətini saxlayır. Qədim şəhər mədəniyyətimizin, tariximizin unikal nümunələrinin yaşadığı Gəncə şəhəri əcnəbilərin xoşuna gələn məkanlardandır.
Bu günlərdə mədəniyyət və turizm naziri Əbülfəs Qarayev Naftalanda ətraf rayonların sakinləri ilə görüşüb. Görüş zamanı Gəncə sakinləri nazirdən xahiş ediblər ki, şəhərdə regionlararası bir sıra festivalların, o cümlədən də “Avropa gənclər paytaxtları və qardaşlaşmış şəhərlərin mədəniyyət festivalı”nın keçirilməsinə yardımçı olsun.
Gəncə ictimaiyyətinin nazirə müraciətinin müsbət hal olduğunu deyən ekspertlərin fikrincə, bu o deməkdir ki, artıq ictimaiyyət özü bu kimi mədəni tədbirlərin keçirilməsində maraqlıdır. Ekspertlər qeyd edirlər ki, ictimaiyyətlə dövlətin maraqları üst-üstə düşərsə, ölkəmizin mədəni, turizm resurslarının təbliği sahəsində böyük nailiyyətlər əldə edə bilərik.
Azərbaycan Turizm və Menecment Universitetinin kafedra müdiri, turizm sahəsi üzrə ekspert Bahadur Bilalov “Bakı-Xəbər”ə açıqlamasında bildirdi ki, ictimaiyyət tərəfindən edilən bu təklif olduqca maraqlıdır: “Təklif çox maraqlıdır və deyərdim ki, onun reallaşması Gəncə-Qazax bölgəsinin xarici turistlər arasında tanıtımı üçün böyük əhəmiyyət kəsb edə bilər. Məlumdur ki, “Əsrin müqaviləsi” imzalandıqdan sonra ölkəmizin paytaxtı Bakı şəhəri neft diyarı kimi tanınmağa başladı. 2012-ci ildə keçirilmiş “Avroviziya” mahnı müsabiqəsi Bakını xarici turistlərə mədəniyyət mərkəzi kimi, İlk Avropa Oyunları, İslam Oyunları və Formula-1yarışması idman şəhəri kimi məşhurlaşdırdı. Yəni xarici turistlər arasında Bakının kifayət qədər tanındığını söyləyə bilərik. Bu festival baş tutarsa, biz həm qədim mədəniyyətimizi, həm də turizm potensialımızı təqdim edə bilərik. Qarşımızda duran əsas məsələ xarici turistlərə Azərbaycanımızın bölgələrini tanıtmaqdır”.
B.Bilalov hesab edir ki, Gəncə və Gəncə ətrafında Azərbaycan mədəniyyətinin ən qiymətli örnəkləri, abidələri mövcuddur: “Bu işdə isə müxtəlif vasitələrdən istifadə etmək lazımdır. Hesab edirəm ki, təklifin reallaşdırılması Gəncə-Qazax bölgəsinin adət-ənənələrinin, yaşam tərzinin, bölgənin mətbəxinin, tarixi-memarlıq abidələrinin, əsrarəngiz təbiətinin xarici ölkələrdə tanıtımı üçün bir fürsət ola bilər. Bu isə, öz növbəsində, yeni turistlərin ölkəmizə maraq göstərməsinə gətirib çıxarar”.
Tanınmış etnoqraf-alim Ənvər Çingizoğlu da ictimaiyyətin yeni festival keçirilməsi təklifi ilə nazirə müraciət etməsinin olduqca müsbət addım olduğunu dedi. Ekspertin sözlərinə görə, Gəncə qədimdən multikultural, mədəni dəyərlərin qorunduğu məkanlardan biridir.
Ə.Çingizoğlu bildirdi ki, Gəncə “Avropa gənclər paytaxtları və qardaşlaşmış şəhərlərin mədəniyyət festivalı”nın keçirilməsi üçün tam uyğun bir şəhərdir: “İctimaiyyətin bu təklifini ancaq alqışlamaq olar. Hesab edirəm ki, Mədəniyyət və Turizm Nazirliyi belə bir festivalın keçirilməsi işində Gəncə ictimaiyyətinə dəstək olacaq. Vaxt vardı dövlət qurumları bölgələrdə tədbirlər, festivallar keçirilməsi ilə bağlı təşəbbüs irəli sürürdülər. Bu gün isə artıq bu işə ictimaiyyət qoşulub. Bu ondan irəli gəlir ki, dövlətin mədəniyyət siyasəti tam olaraq özünü doğruldub. Son illər respublikamızın ayrı-ayrı bölgələrində keçirilən festivallara ictimaiyyətin marağı çox böyükdür. Bu festivallar çərçivəsində bölgənin bütün imkanları, resursları tanıdılır, təbliğ edilir. Gəncə və Gəncəətrafı rayonların olduqca maraqlı mədəniyyəti, özünəməxsus mətbəxi, adət-ənənəsi, folkloru, etnoqrafiyası var. Tarixən bu ətrafda xalqımızla yanaşı, digər xalqlar da yaşayıb. Burada alman mədəniyyətinin də zəngin izləri var. Bilirsiniz, bu festival baş tutarsa, ətraf rayonlar da, lap elə xarici ölkələrin təmsilçiləri də orada iştirak edə bilərlər. Bu, bölgənin geniş səviyyədə təbliğində əhəmiyyətli rol oynaya bilər. Gəncə mədəniyyəti çox unikaldır və bu torpaqda Azərbaycan poeziyasının nəhənglərinin izləri yaşayır. İslam mədəniyyətinin də bir sıra örnəkləri Gəncədə yerləşir. “Avropa gənclər paytaxtları və qardaşlaşmış şəhərlərin mədəniyyət festivalı” keçirilərsə, bu, bölgənin tanıdılmasında, yeni dostluq körpülərinin qurulmasında böyük əhəmiyyət daşıyar”.
İradə SARIYEVA
