Zülfiyyə Eldarqızı: “Son illər Azərbaycan kinematoqraflarının çəkdiyi filmlər xarici tamaşaçıları özünə cəlb edir” Təranə Əlizadə: “Xaricdə “Azərbaycan mədəniyyəti günləri” çərçivəsində filmlərimizin təqdim edilməsi milli kinomuzun təbliğinə xidmət edir”
Azərbaycan kinosu artıq dünyaya çıxmaqdadır. Milli kinomuzun xarici ölkələrdə təbliğ edilməsi sahəsində dövlətin aidiyyəti qurumları tərəfindən məqsədyönlü işlər aparılır. Azərbaycan kinosunun dünyaya çıxışı yalnız müxtəlif festivallar vasitəsilə həyata keçirilmir, həm də xarici ölkələrdə “Azərbaycan kinosu günləri” keçirilir. Xarici ölkələrdə Azərbaycan kinosunun təqdim edilməsi sözsüz ki, kinomuzun təbliğinin həyata keçirilməsi istiqamətində atılan addımdır.
Xaricdə “Azərbaycan kinosu günləri”nin keçirilməsinin əhəmiyyətini qeyd edən ekspertlər vurğulayırlar ki, bu amil kinomuzun geniş səviyyədə tanınmasına xidmət edir.
Kinoşünaslar bildirirlər ki, Prezident İlham Əliyevin təsdiqlədiyi “Azərbaycan kinosunun 2008-2018-ci illər üzrə inkişafına dair Dövlət Proqramı” milli kino sənətinin inkişafında yeni mərhələnin başlanması hesab edilir. Qeyd edilənə görə, Dövlət Proqramının əsas istiqamətlərindən biri Azərbaycan kinosunun beynəlxalq aləmdə təbliği ilə bağlıdır. Xarici ölkələrdə “Azərbaycan kinosu günləri”nin təşkil edilməsinin faydalı olduğunu deyən ekspertlər bildirirlər ki, müasir Azərbaycan kinosu əcnəbi tamaşaçılar tərəfindən maraqla qarşılanır.
Ekspertlər deyirlər ki, milli kino sənayesinin inkişafı istiqamətində son illər görülən işlər çoxlu nailiyyətlərin əldə edilməsinə səbəb olub.
Ekspertlərə görə, bu il kinomuzun 120 illiyi münasibətilə daha çox ölkədə “Azərbaycan kinosu günləri” keçirilməlidir. Azərbaycan kinosunun ötən müddətdə əlamətdar hadisələrlə zəngin inkişaf yolu keçdiyini vurğulayan ekspertlər deyirlər ki, bu filmlər xalqımızın mədəni-mənəvi həyatında müstəsna əhəmiyyətə malikdir.
Azərbaycan kinosunun xarici ölkələrdə təbliğatından danışan sənətşünaslıq üzrə fəlsəfə doktoru Zülfiyyə Eldarqızı bizimlə söhbətində vurğuladı ki, xarici ölkələrdə keçirilən “Azərbaycan mədəniyyəti günləri” çərçivəsində Azərbaycan kinosunun da əcnəbilərə təqdim edilməsi təqdirəlayiq haldır. “Ölkəmiz müstəqillik əldə etdikdən sonra ilk illərdə məlum səbəblərdən kino sənayesi tənəzzül dövrü yaşayıb. Ancaq şükür ki, bu hal uzun sürmədi və kino sənayemiz də inkişaf etməyə başladı. O dövrdə Azərbaycan kinosunu “ölümdən” ümummilli lider Heydər Əliyev qurtardı.
Ölkə başçısının 2008-ci il 4 avqust tarixli Sərəncamı ilə təsdiq olunan “Azərbaycan kinosunun 2008-2018-ci illər üzrə inkişafına dair Dövlət Proqramı” milli kino sənətinin inkişafında yeni mərhələnin başlanması idi. Bu gün Azərbaycanda maraqlı filmlər yaranıb. Bu filmlər artıq xarici ölkə tamaşaçılarına da təqdim edilir. Kino inkişaf edirsə, onun tərəqqisi gözdən qaça bilməz. Son illər Azərbaycan kinematoqraflarının çəkdiyi filmlər xarici tamaşaçıları özünə cəlb edir. Yaxşı haldır ki, milli kinomuz həm ənənəvi simasını qoruyur, həm də müasirliyə can atır. Dünya isə bunu qəbul edir. Ümumiyyətlə, hər bir xalqın kinosunda özünəməxsus çalarların olması mütləq lazımdır. Bizim kino Avropa kinosunu təqlid etsə, maraqsız görünər. Deyim ki, klassik Azərbaycan filmləri də xarici ölkələrdə nümayiş etdirilməlidir. Çünki bu filmlər olduqca maraqlı, özünəməxsus milli filmlərdir. İnanıram ki, bu filmlərə əcnəbilər maraqla baxarlar” - deyə bildirən Z.Eldarqızı qeyd etdi ki, son illərdə kino sahəsinin inkişafı məqsədilə dövlət büdcəsindən ayrılmış vəsait hesabına 44 tammetrajlı bədii, 50 qısametrajlı bədii çəkilib. O hesab edir ki, xaricdə keçirilən “Azərbaycan kinosu günləri” çərçivəsində bu filmlər növbəli şəkildə təqdim edilə bilər: “İndiyə qədər bir sıra ölkələrdə “Azərbaycan kinosu günləri” çərçivəsində filmlərimiz nümayiş olunub. Rəsmi məlumata görə, Azərbaycanın mədəniyyətini, tarixini, adət-ənənələrini, turizm potensialını, ölkəmizin müasir inkişafını əks etdirən bədii və sənədli filmlərin nümayişi məqsədilə Rusiya, İtaliya, Fransa, Türkiyə, İran, Macarıstan, Gürcüstan, Braziliya, İngiltərə, Koreya, Özbəkistan və Tacikistanda Azərbaycan kinosu günləri keçirilib”.
Z.Eldarqızı hesab edir ki, milli kino sənayesinin inkişafı istiqamətində, filmlərimizin təbliği sahəsində görülən işlər nəticəsində müxtəlif ölkələrdə “Azərbaycan mədəniyyəti günləri” proqramı çərçivəsində keçiriləcək tədbirlər sırasında milli kinomuzun nümayişi də var.
Qeyd edək ki, bu il “Azərbaycan mədəniyyəti günləri” proqramı çərçivəsində Türkiyədə sərgilər, konsertlər, o cümlədən də Azərbaycan filmlərinin nümayişi keçiriləcək.
Sənətşünas Təranə Əlizadə də hesab edir ki, xarici ölkələrdə “Azərbaycan kinosu günləri”nin keçirilməsinin əhəmiyyəti böyükdür: “Son illər davamlı olaraq Azərbaycan filmləri dünyanın müxtəlif ölkələrində nümayiş olunur. Bu olduqca müsbət haldır. Xaricdə “Azərbaycan mədəniyyəti günləri” çərçivəsində filmlərimizin təqdim edilməsi milli kinomuzun təbliğinə xidmət edir. Azərbaycan kinosu artıq dünya kino ailəsinin hüquqi üzvüdür. Son illər çox maraqlı filmlər çəkilib. O filmlər xarici ölkə tamaşaçılarında Azərbaycanla bağlı təəssürat yaradır. Belə tədbirlərə Qarabağ müharibəsi ilə bağlı filmlər də salmaq olar. Çünki bu olduqca vacib məsələdir”.
İradə SARIYEVA
