Fevralın 1-də Mədəniyyət və Turizm Nazirliyinin və Azərbaycan Aşıqlar Birliyinin birgə təşkilatçılığı ilə Rəşid Behbudov adına Mahnı Teatrında 2 fevral - Gənclər Günü münasibətilə gənc aşıqlar konsert proqramı ilə çıxış etdilər.
Konsert öncəsi çıxış edən Azərbaycan Aşıqlar Birliyinin sədri, əməkdar elm xadimi, professor Məhərrəm Qasımlı bildirdi ki, gənc yaradıcı qüvvələrin, o cümlədən də gənc aşıqların yaradıcılığına qayğı siyasətinin əsası Heydər Əliyev tərəfindən qoyulub. Bu gün respublikamızın əksər musiqi məktəblərində saz siniflərinin açıldığını, burada gənclərin aşıq sənətinin sirlərini öyrəndiyini qeyd edən M.Qasımlı dedi ki, ölkə başçısı İlham Əliyev də gənc aşıqlara böyük qayğı göstərir. Gənc aşıqların konsert tədbirinin keçiririlməsinin gənclərə qayğının təzahürü olduğunu vurğulayan Birlik sədrinin sözlərinə görə, son illər gənclər arasında aşıq sənətinə böyük maraq var. O, həmçinin, dedi ki, gənc aşıqlardan ibarət yeni-yeni qruplar da yaranaraq fəaliyyət göstərir.
Sonra meydan gənclərə verildi. İlk olaraq səhnəyə əməkdar mədəniyyət işçisi Gülarə Azaflının rəhbərlik etdiyi “Çeşmə” qrupu çıxdı, onlar Şirvan aşıq mühitinə xas olan “Ayaq şəşəngi” havasını təqdim etdilər. İstedadlı solo saz ifaçıları Roman Azaflı, Xətai Kərimli, Bəxtiyar Qurbanov və Sahib İsmiyev isə “Ruhani” havasını təqdim etdilər. Sahib Hacılı və Fidan Qurbanova sazsevərlərə “Orta müxəmməs”, Şəhriyar Laçınlı “Dilqəmi” ifa etdi. Konsertdə yeni yaranan “Şirvanşah” sazçı folklor qrupunun üzvləri Sahib İsmiyev, Xəyal Məsimoğlu, Elçin Rəşidoğlu, Sahib Hacılı, Fərhad Natiqoğlu və Rəvan Əlvanoğlu da ifa etdilər. Könül Bayramova və Roman Azaflı “Yanıq Kərəmi”, amerikalı gənc saz ifaçısı Marta Lauri “Ovşarı”, Xəyalə Göyçəli “Cəlili”, Məharət Habiloğlu, Asif Xasanoğlu, Haqverdi Babaoğlu və Yusif Niftəliyev “Pənah gözəlləməsi”, Kərəm Vəliyev və Toğrul Gədəbəyli “Kərəm gözəlləməsi”, Vüsalə Quliyeva “Baş sarıtel”, Dilqəm Əsgərov “Baş dubeyti”, Qabil Faxralı “Qaraçı” havasını təqdim etdilər. “Misri” qrupunun ifası da maraqla qarşılandı. Gənc aşıqlar Murad Məmmədli, Əli Dərələyəzli, Şəmşad Məmmədov və Nəsib Nüsrətoğlu “Hüseyni”, “Laçın” folklor qrupu isə “Osmanlı divanisi” havasını ifa etdilər.
Gənc aşıqların 2 fevral - Gənclər Gününə həsr etdikləri konsert proqramı “Paşaköçdü” havası ilə sona çatdı.
İradə SARIYEVA
