Müşfiq Hətəmov: “Dünya kino industriyasını Azərbaycana cəlb etmək üçün mütləq güzəştlər olmalıdır” Hüseyn Mehdiyev: “Ümid edirəm ki, bu güzəştlərin tətbiqi…”
Kinematoqrafiya sahəsinə göstərilən dövlət dəstəyi yerli kino sektorunun inkişafına təkan verir. Dövlət dəstəyi ilə filmlər çəkilir, kinonun maddi-texniki bazası gücləndirilir, yeni kadrlar yetişdirilir və s. Eyni zamanda da kinonun inkişafı üçün qanunvericilik bazası təkmilləşdirilir. Məlum olduğu kimi, “Kinematoqrafiya haqqında” qanun layihəsi hazırlanaraq müzakirə üçün Milli Məclisə təqdim edilib.
Qanun layihəsində əksini tapan məsələlər hələ ictimaiyyətə açıqlanmadığı üçün, onun məzmunu haqqında danışmaq tezdir. Bu sahədə əsas məsələlərdən biri kinematoqrafiya sahəsinə güzəştli verginin və s. tətbiqidir. Milli Məclisin Mədəniyyət komitəsinin sədri Rafael Hüseynov iclaslardan birində çıxışı zamanı qeyd edib ki, kinematoqrafiya sahəsində güzəştlərin tətbiqi üçün əvvəlcə vergi, gömrük qanunvericiliyində bu sahə ilə bağlı dəyişikliklər edilməlidir: “Artıq müvafiq nazirliklər bu layihəyə müsbət rəy veriblər. Lakin burada olan bir necə məsələyə görə layihəni hələlik komitədə müzakirəyə çıxara bilmirik. Azərbaycan kinosunun tarixi dünya kinosu ilə, demək olar ki, eyni vaxtda başlayıb. Amma bu gün Azərbaycan kinosunun dünya kinosuna öz töhfəsini verməsi üçün sıçrayışa ehtiyacı var. Biz kinematoqrafiya sahəsində güzəştlərin olması üçün əvvəlcə vergi, gömrük qanunvericiliyində bu sahə ilə bağlı dəyişikliklər edilməlidir. Bu dəyişiklik olduqdan sonra onları “Kinematoqrafiya haqqında” qanun layihəsinə daxil edə bilərik. Müvafiq qurumlar bu məsələyə müsbət rəy verdikdən sonra biz “Kinematoqrafiya haqqında” qanun layihəsini müzakirəyə çıxaracağıq”. Kinematoqrafiya sahəsində güzəştlərin tətbiqi üçün əvvəlcə vergi, gömrük qanunvericiliyində bu sahə ilə bağlı dəyişikliklər edilərsə, bu, milli kinonun inkişafına nə kimi müsbət təsir göstərəcək?
“Azərbaycanfilm” kinostudiyasının direktoru Müşfiq Hətəmov “Bakı-Xəbər”ə açıqlamasında qeyd etdi ki, sözügedən sahələrə dair qanunvericilikdə kinematoqrafiya ilə bağlı dəyişikliklər edilərsə, bunun kino sektorunun tərəqqisinə böyük faydası olacaq: “Sözügedən güzəştlər Mədəniyyət və Turizm Nazirliyi tərəfindən təklif olunub. Dünyada kinonun, kinoturizmin inkişafı ilə bağlı belə bir təcrübə var. Xarici kinoşirkətlərin bizimlə əməkdaşlıq etməsi, birgə fəaliyyət göstərməsi, dünya kino industriyasını Azərbaycana cəlb etmək üçün mütləq güzəştlər olmalıdır”.
M.Hətəmov bildirdi ki, xaricdən kino avadanlıqlarının ölkəmizə gətirilməsi üçün gömrük güzəştləri olmalıdır. O, həmçinin, qeyd etdi ki, film istehsalında vergilərin sadələşdirilməsi vacibdir: “Biz bunu belə etməliyik ki, ölkəmizə kino sahəsində yeni sərmayələr gəlsin və kino inkişaf etsin”.
Professional Kinorejissorlar Gildiyasının rəhbəri, kinorejissor-ssenarist Hüseyn Mehdiyevin fikrincə də gömrük və vergi qanunvericiliyinə dəyişikliyin edilməsi kino sahəsinə faydasız olmayacaq: “Mən güzəştlər təklifini müsbət qarşılayıram. “Kinematoqrafiya haqqında” qanun layihəsinə gəlincə, demək istəyirəm ki, belə bir qanun var, yeni qanuna ehtiyac yoxdur, bu qanunda hər şey öz əksini tapıb. Mövcud olan “Kino haqqında” Qanuna əlavələr etmək olar. Yəni artıq bəzi yeniliklər var, o yeniliklər vurğulanmalıdır. Qanuna 2-3 vacib əlavənin edilməsi zəruridir. Bura o cümlədən də kinematoqrafiya sahəsinə vergi və gömrük güzəştlərinin tətbiq edilməsi də aiddir. Bu hazırda olduqca lazımlı bir məsələdir”.
H.Mehdiyev hesab edir ki, kinematoqrafiya sahəsinə vergi və gömrük güzəştlərinin tətbiqi bu sahədəki bəzi problemlərin həlli üçün bir addım olardı. “Ümid edirəm ki, bu güzəştlərin tətbiqi, gömrük və vergi qanunvericiliyinə kinematoqrafiya ilə bağlı dəyişikliklərin edilməsi nələrisə dəyişəcək. Çünki vergi və gömrük güzəştləri çox vacibdir. Bilirsiniz, xaricdən gətirilən kino avadanlıqlarına görə gömrük rüsumu bahadır. Qanunvericilikdə dəyişikliklər olarsa, bu sahədə güzəştlər həyata keçirilər. Kinoteatrlarda, film göstərilən ticarət mərkəzlərində film nümayişi ilə məşğul olan qurumlara vergi və gömrük rüsumları tətbiq edilərsə, bu da kino nümayişi sahəsinə təkan ola bilər”.
H.Mehdiyev qeyd edir ki, Azərbaycanda da, Rusiya, Ukrayna, Gürcüstan və digər dövlətlərdə olduğu kimi, bir neçə illiyə kino sahəsi vergidən azad edilsə, bunun böyük faydası olar. Bunun kinonun inkişafına dəstək olacağını deyən H.Mehdiyev bildirdi ki, beləliklə, kinomuz böyük nəticələr əldə edə bilər.
İradə SARIYEVA
