Azərbaycan Bəstəkarlar İttifaqında (ABİ) “Heydər Əliyev ili” çərçivəsində tədbirlər silsiləsindən yeni tədbir - qurumun ərsəyə gətirdiyi “Heydər Əliyev və musiqi mədəniyyəti” kitabının təqdimat mərasimi keçirilib.
Tanınmış musiqişünas, sənətşünaslıq üzrə fəlsəfə doktoru, Əməkdar mədəniyyət işçisi Səadət Təhmirazqızının tərtibçi-müəllifi olduğu kitabın məsləhətçi və rəyçisi - ABİ sədri Xalq artisti, AMEA-nın müxbir üzvü, professor Firəngiz Əlizadə tədbiri giriş sözü ilə açaraq İttifaqın aktiv fəaliyyət istiqamətlərindən danışıb. O, öz nitqində Heydər Əliyevlə bağlı gənclik illərinin parlaq xatirələrini dilə gətirərək deyib: “Bu il Ulu Öndər Heydər Əliyevin 100 illiyi ölkə səviyyəsində silsilə tədbirlərlə qeyd olunur. Biz də Bəstəkarlar İttifaqı olaraq bu işdə öz töhfəmizi vermiş oluruq. Azərbaycan Bəstəkarlar İttifaqına Ümummilli Lider Heydər Əliyevin çox böyük diqqəti, dəstəyi və qayğısı olub. İttifaqımız il ərzində silsilə tədbirlər keçirir və bu təqdimat tədbiri də həmin tədbirlərdən biridir. Biz, həmçinin il ərzində Ulu Öndər Heydər Əliyevə həsr olunan bir neçə elmi konfrans da təşkil etmişik. Musiqişünas və bəstəkarlarımız bu cür gözəl tədbirlərə hər zaman öz töhfələrini layiqincə verirlər”.
Sonra Səadət Təhmirazqızı müəllifi olduğu kitab haqqında danışaraq Ulu Öndər Heydər Əliyevin mədəniyyət sahəsinə diqqət və qayğısından söz açıb: “Bu gün burada təqdim olunan “Heydər Əliyev və musiqi mədəniyyəti” adlı kitab üzərində işləyərkən çalışdıq ki, Ümummilli Liderin anadan olmasının 100 illiyinə Azərbaycan musiqi ictimaiyyəti adından bu gözəl ədəbiyyat nümunəsini ərməğan edək. Belə bir ədəbiyyatın bu günün və gələcəyin musiqiçiləri üçün masaüstü kitab olacağından əminik”.
Kulturoloq, professor Fuad Məmmədov “Heydər Əliyev və Azərbaycan mədəniyyəti” mövzusunda çıxış edib. O deyib: “Ümummilli Lider hər zaman Azərbaycan mədəniyyətinə böyük diqqət göstərib və həmişə vurğulayıb ki, Azərbaycan xalqı ziyalıları ilə tanınıb. Bu cür gözəl kitabın yaradılması təqdirəlayiq addımdır və mən hesab edirəm ki, yüksək mədəniyyətli azərbaycanlının formalaşdırılması, inkişafı indiki zamanda çox önəmli məsələdir. Düşünürəm ki, bu cür kitabların, həmçinin musiqi mədəniyyətinin daxili zənginlik üçün böyük əhəmiyyəti var”.
Sonra təqdim olunan kitabın redaktorları, sənətşünaslıq üzrə elmlər doktoru, dosent Leyla Zöhrabova “Yeni nəşr olunmuş “Heydər Əliyev və musiqi mədəniyyəti” kitabı haqqında”, sənətşünaslıq üzrə fəlsəfə doktoru, dosent Jalə Qulamova “Heydər Əliyev və Azərbaycan Bəstəkarlar İttifaqı”, L.və M.Rostropoviçlər ev-muzeyinin icraçı rəhbəri Günay Əliyeva isə “Siyasəti və mədəniyyəti birləşdirən iki dahi şəxsiyyət: Heydər Əliyev və Mstislav Rostropoviç” adlı məruzələrlə çıxış ediblər. Natiqlər görkəmli dövlət xadimi, müdrik siyasətçi Heydər Əliyevin universal insan, şəxsiyyət kimi elmə, mədəniyyətə, o cümlədən musiqiyə verdiyi dəyərdən, göstərdiyi diqqət və qayğıdan geniş danışıblar.
Çıxışlar arası maraqlı musiqi parçaları, video və foto slaydlar bir-birini əvəz edib. Əməkdar artist Ramil Qasımov pianoçu Əməkdar artist Fəridə Hüseynovanın müşayiətilə Müslüm Maqomayevin Nəbi Xəzrinin sözlərinə bəstələdiyi məşhur “Azərbaycan”, Cahangir Cahangirovun Zeynal Cabbarzadənin sözlərinə yazdığı dillər əzbəri olan “Alagöz” mahnılarına yeni nəfəs verib. Xalq artistləri Ülviyyə Hacıbəyova və Yeganə Axundovanın iki piano ilə ifasında Soltan Hacıbəyovun “Uvertüra”sı zövq oxşayıb.
“Qafqaz-Media” ictimai birliyi Səadət Təhmirazqızını “Heydər zirvəsi-100” diplom və medalı ilə mükafatlandırıb. Bunun ardınca Firəngiz Əlizadənin öz sözlərinə bəstələdiyi, Xalq artisti Fəxrəddin Kərimovun dirijorluğu ilə Üzeyir Hacıbəyli adına Azərbaycan Dövlət Simfonik Orkestri və Xalq artisti Gülbacı İmanovanın bədii rəhbərliyilə Azərbaycan Dövlət Xor Kapellasının ifa etdiyi “Zəfər marşı”nın lent yazısı səslənib. Xüsusi diqqətlə qarşılanan və dərin təəssürat oyadan bu əsərin ifasından sonra tədbir başa çatıb.
