Beynəlxalq İqtisadi Forum dünya ölkələrinin turizm sahəsində rəqabətədavamlılıq reytinqini yeniləyib. Builki reytinqdə dünyanın 180 ölkəsi yer alıb. Qurumun ekspertləri turizm sahəsində rəqabətə ən dayanıqlı ölkələrin reytinqini açıqlayıblar.
Reytinq tərtib olunan zaman sıralamada rəqabətədavamlılıq göstəriciləri olaraq tarixi və mədəni irs, iqtisadi, nəqliyyat, bank sektoru, kommunikasiya, viza rejimi, səhiyyə, sakinlərin qonaqpərvərliyi və s. amillər nəzərə alınıb.
Siyahıda Azərbaycan bu göstəricilərin cəminə görə 71-ci pillədə qərarlaşıb. Gürcüstan cəmi 3 pillə önə çıxaraq, 68-ci yeri tutub. Cənubi Qafqazın sonuncu təmsilçisi Ermənistan isə 79-cu pillənin sahibi olub. Göründüyü kimi, Azərbaycan Cənubi Qafqazda Gürcüstandan 3 pillə geri qalsa da, Ermənistandan öndədir. Qonşu İrandan isə xeyli öndədir. Belə ki, qonşu ölkələrdən turizmi rəqabətə ən dayanıqlı ölkələr sırasında Türkiyə 43-cü, Rusiya 39-cu, Ukrayna 78-ci, İran isə 89-cu yerdə qərarlaşıb.
Reytinqin liderləri isə İspaniya (1), Fransa (2), Almaniya (3), Yaponiya (4) və ABŞ (5) seçiliblər.
Reytinq cədvəlində qeyd edilən turizm sahəsində rəqabətədavamlılıq sıralamasından belə məlum olur ki, Azərbaycan bu sahədə mövqelərini xeyli yaxşılaşdırıb. Eyni zamanda, bir sıra ölkələri qabaqlayıb.
Maraqlıdır, ekspertlər bu istiqamətdə müşahidə olunan müsbət tendensiyanı necə dəyərləndirirlər?
Elçin Rüstəmov: “İndiki şəraitdə turizm sahəsində rəqabətədavamlılıq reytinqində 180 ölkə arasında 71-ci yerdə qərarlaşmaq müsbət göstəricidir”
Məsələyə münasibət bildirən turizm sahəsi üzrə ekspert Elçin Rüstəmov Azərbaycanın turist cəlb etmək baxımından mövqelərini yaxşılaşdırmasını bir sıra amillərlə əlaqələndirdi: “Bunun başlıca səbəbi bu sahədə görülən işlərlə bağlıdır. Məsələ ondadır ki, son illər ölkədə turizmin inkişafı ilə bağlı görülən işlər xaricdən turistlərin cəlbinə öz təsirini göstərir. Nəzərə almaq lazımdır ki, bir sıra ölkələrdə sərgilər, Azərbaycan günləri təşkil edilir. Belə tədbirlər sayəsində xarici ölkələrdə Azərbaycana maraq artır. Bu da həmin dünya dövlətlərindən ölkəmizə turist axınına stimul verir. Səbəblərdən biri bununla bağlıdır. Digər tərəfdən, Rusiyanın Gürcüstana tətbiq etdiyi məlum sanksiyalar da buna öz təsirini göstərib. Həmin sanksiyalardan sonra Rusiyadan olan turistlər ya Türkiyəyə üz tutur, ya da Azərbaycana. Deməyim odur ki, bu kimi siyasi məsələlərin də bunda müəyyən rolu var. Yəni bütün bunlar sözügedən göstəricilərə öz təsirini göstərir. Bununla belə, turizmlə bağlı prosedurların sadələşdirilməsi bu məsələdə vacib rol oynayıb. Məsələ ondadır ki, vizaların sadələşdirilməsi, onlayn vizanın alınması turistlərin ölkəyə gəlməsini asanlaşdırır. Çünki bir sıra ərəb ölkələrindən gələn turistlərə hava limanında vizanın verilməsi buna çox müsbət təsir edir. Ən nəhayət, Azərbaycanda otellərin və hostellərin sayı artır. Bu zaman ölkənin daha çox turist qəbul etmək potensialı genişlənir. Nəticədə həm rəqabət yaranır, həm də qiymətlərin aşağı düşməsinə zəmin formalaşir. Onu da nəzərə almaq lazımdır ki, Azərbaycan turizm sahəsində yeni bir ölkədir. Ona görə də biz birdən-birə bu sahədə sıçrayış əldə edilməsini gözləməməliyik. Yavaş-yavaş bu sahədə irəliləyə bilərik. İndiki şəraitdə turizm sahəsində rəqabətədavamlılıq reytinqində 180 ölkə arasında 71-ci yerdə qərarlaşmaq müsbət göstəricidir”.
Vidadi ORDAHALLI
