19/09/2019 17:23
728 x 90

Azərbaycanda sənaye əhəmiyyətli meşələr salınması nə deməkdir…

“Texniki ağaclar əkilən zaman müasir texnoloji qaydalara əməl olunmalıdır ki, istənilən nəticə əldə olunsun”

img

Azərbaycanda sənaye əhəmiyyətli meşələr salına bilər. Bu barədə Meşələrin İnkişafı Departamentinin direktoru Ağaqardaş Qaraşov media nümayəndələrinə açıqlamasında bildirib.

O qeyd edib ki, yaxın vaxtlarda Azərbaycanda sənaye əhəmiyyətli meşələrin salınması planlaşdırılır. Bu məqsədlə tez böyüyən ağac cinslərindən istifadə olunacaq ki, həmin ağaclar kəsilib ağac emalı sənayesinin inkişafında davamlı olaraq istifadə olunsun: “Meşə təsərrüfatından sənaye məqsədlərilə istifadə üçün yaxın perspektivdə bu sahədə geniş işlərin görülməsi nəzərdə tutulub. Fiziki və hüquqi şəxslərə, iş adamlarına tövsiyə edirik ki, özlərinə məxsus torpaq sahələrində bu tip ağac cinslərini yetişdirsinlər. Bu işdə biz Ekologiya və Təbii Sərvətlər Nazirliyi olaraq bütün müraciətlərə açığıq. Öz tövsiyələrimizi verə və ağac cinslərinin seçilməsində kömək edə bilərik. Eyni zamanda, meşə fondunun açıq sahələri də bu məqsədlə sahibkarlara icarəyə verilə bilər”.

  • Natiq Cəfərli: “Sənaye əhəmiyyətli meşələr salınarsa, bu sektor ölkəyə kifayət qədər gəlir gətirər”

Azərbaycanda sənaye əhəmiyyətli meşələrin salınmasının vacibliyi barəsində fikir bildirən iqtisadçı-ekspert Natiq Cəfərli “Bakı-Xəbər”ə açıqlamasında qeyd etdi ki, bu sahə üzrə ən qabaqcıl ölkə Finlandiyadır. Texniki təyinatlı meşələrin salınması üzrə adıçəkilən ölkə ciddi texnoloji üstünlüklər əldə edib. Məlumdur ki, bir neçə il ərzində texniki ağac növləri yetişir. Həmin ağaclardan həm mebel sənayesində, həm də kağız və karton məmulatlarının hazırlanmasında istifadə olunur. Finlandiya ilə yanaşı, Estoniyada da sənaye əhəmiyyətli meşələr geniş yayılıb. Azərbaycanda da belə bir addımın atılması müsbət haldır. O ağaclar əkildikdən sonra onların emal olunması da həll olunmalıdır. Bunun üçün xüsusi infrastruktur yaradılmalıdır. Nəzərə almaq lazımdır ki, o tip ağaclar gəlir gətirən sahədir. Çin və digər ölkələr xammal kimi aldıqları ağac məhsullarını emal etdikdən sonra həmin məhsulu hazır formada 3-4 dəfə artıq qiymətə Rusiya bazarına satırlar”.

Həmsöhbətimiz onu da vurğuladı ki, texniki ağaclar əkilən zaman müasir texnoloji qaydalara əməl olunmalıdır ki, istənilən nəticə əldə olunsun. İnfrastruktur qurularsa, qeyd olunan sahəni kifayət qədər gəlirli sahəyə çevirmək olar.

Günel CƏLİLOVA

Son xəbərlər